ໃນລະຫວ່າງທ້າຍເດືອນພະຈິກ ຫາ ກາງເດືອນທັນວາ 2023 ປກສ ເມືອງຫຼວງນໍ້າທາ ແຂວງຫຼວງນໍ້າທາ ສາມາດຈັບຜູ້ຖືກຫາຄະດີຢາເສບຕິດໄດ້ 03 ຄົນ ພ້ອມຂອງກາງຢາບ້າ 5.266 ເມັດ. ຕາມການລາຍງານຂອງໜ່ວຍງານຄະດີອາຍາ ປກສ ເມືອງຫຼວງນໍ້າທາ ໃຫ້ຮູ້ວ່າ: ໃນວັນທີ 22 ພະຈິກ 2023 ໄດ້ມີພົນລະເມືອງດີເກັບໄດ້ກະເປົາເງີນທີ່ຕົກເຮ່ຍຢູ່ ບ້ານນໍ້າສ່າ ເມືອງຫຼວງນໍ້າທາ ຢູ່ໃນກະເປົ່າດັ່ງກ່າວມີເງິນ ສົດຈໍານວນ 181,000 ກີບ ແລະຢາບ້າ ຈໍານວນ 156 ເມັດ ມາມອບໃຫ້ເຈົ້າໜ້າທີ່ ປກສ ກຸ່ມບ້ານຈະເລີນສຸກ.

 

ມາຮອດວັນທີ 01 ທັນວາ 2023 ທາງພະແນກຕໍາຫຼວດ ປກສ ເມືອງຫຼວງນໍ້າທາ ໄດ້ລົງສົມທົບກັບ ປກສ ກຸ່ມບ້ານຈະເລີນສຸກ ຕິດຕາມເປົ້າໝາຍເຈົ້າຂອງກະເປົ່າເງິນ ສາມາດກັກຕົວ ທ້າວ ອູລີ ອາຍຸ 35 ປີ ປະຊາຊົນ ບ້ານນໍ້າລື ເມືອງ ແລະແຂວງຫຼວງນໍ້າທາ ພ້ອຂອງກາງຢາບ້າ 105 ເມັດ, ຜູ້ກ່ຽວຮັບສະລາພາບວ່າ: ເງິນ ແລະຢາບ້າທີ່ເຮັດຕົກເຮ່ຍຢູ່ ບ້ານນໍ້າສາ ນັ້ນ ແມ່ນຂອງຜູ້ກ່ຽວແທ້ ເຊິ່ງເປັນເຂດທີ່ຜູ້ກ່ຽວກັບພັກພວກໄດ້ເຄື່ອນໄຫວຄ້າ-ຂາຍຢາເສບຕິດ ຕົກມາຮອດວັນທີ 14 ທັນວາ 2023 ຈຶ່ງໄດ້ກັກຕົວ ນາງ ລີລີ ອາຍຸ 34 ປີ ພ້ອມຂອງກາງຢາບ້າ 400 ເມັດ ແລະນາງ ເຕົ່າຢາ ອາຍຸ 30 ປີ ພ້ອມຂອງກາງຢາບ້າ 4.605 ເມັດ ທັງສອງແມ່ນປະຊາຊົນບ້ານຫາດຍາວ ເມືອງ ແລະແຂວງຫຼວງນໍ້າທາ ລວມຂອງກາງຢາບ້າທັງໝົດ 5.266 ເມັດ.

ປະຈຸບັນ ເຈົ້າໜ້າທີ່ພວມດຳເນີນຄະດີຕາມລະບຽບກົດໝາຍ.

ແຫຼ່ງຂ່າວ: ປກສ ເມືອງຫຼວງນໍ້າທາ.