ເຊກອງ ປະຕິບັດ 5 ວຽກຈຸດສຸມ ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ

ແຂວງເຊກອງ ໄດ້ເອົາໃຈໃສ່ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ໂດຍສະເພາະແມ່ນ 5 ວຽກຈຸດສຸມຄື: ສົ່ງເສີມການຜະລິດກະສິກຳເປັນສິນຄ້າສົ່ງອອກ ເພື່ອທົດແທນການນຳເຂົ້າ ແລະ ບໍລິການດ້ານການທ່ອງທ່ຽວ; ສ້າງຄວາມເຂັ້ມແຂງການຈັດເກັບລາຍຮັບເຂົ້າງົບປະມານ; ສົ່ງເສີມການປະຢັດ, ຕ້ານການຟູມເຟືອຍ, ຍົກສູງປະສິດທິພາບການລົງທຶນ, ແກ້ໄຂໜີ້ສິນພາຍໃນ ແລະຕ່າງປະເທດ; ເອົາໃຈໃສ່ສ້າງສະຖຽນລະພາບດ້ານເງິນຕາ; ຍົກສູງປະສິດທິພາບການຄຸ້ມຄອງລັດ ແລະຄຸ້ມຄອງສັງຄົມດ້ວຍລະບຽບກົດໝາຍ.

ທ່ານ ຄຳປະກອນ ອຸເທນທະປັນຍາ ກ່າວວ່າ: ນັບແຕ່ປີ 2021 ຫາ 2023 ແຂວງໄດ້ນໍາເຂົ້າ-ສົ່ງອອກສິນຄ້າມີມູນຄ່າທັງໝົດ 421,25 ລ້ານໂດລາ. ໃນນີ້, ມູນຄ່າສົ່ງອອກບັນລຸ 274,34 ລ້ານໂດລາ ທຽບໃສ່ແຜນ 5 ປີ ປະຕິບັດໄດ້ລື່ນແຜນ 40,14% (ແຜນ 5 ປີ 195,75 ລ້ານໂດລາ) ແລະ ຄຸ້ມຄອງການນໍາເຂົ້າຢູ່ໃນລະດັບ 146,91 ລ້ານໂດລາ ທຽບໃສ່ແຜນ 5 ປີ ປະຕິບັດໄດ້ 97,86%; ເກັບລາຍຮັບເຂົ້າງົບປະມານ (2021 ຫາເດືອນ 10/2023) ໄດ້ 489,4 ຕື້ກີບ; ຜະລິດເຂົ້າໄດ້ 89.721 ໂຕນ; ພືດສະບຽງອາຫານ 77.364 ໂຕນ; ຜະລິດເປັນສິນຄ້າໄດ້ 728.923 ໂຕນ; ອອກໃບຕາດິນໄດ້ 9.478 ຕອນ; ຂຶ້ນສໍາໂນທີ່ດິນໄດ້ 3.921 ຕອນ; ສັງລວມລົດລັດບໍລິຫານທົ່ວແຂວງ (ປະຕິບັດຕາມດໍາລັດ 599/ນຍ) ທັງໝົດຈໍານວນ 1.560 ຄັນ. ພ້ອມທັງ ເອົາໃຈໃສ່ຕິດຕາມ ກວດກາ ແລະ ຊຸກຍູ້ບັນດາໂຄງການດ້ານພະລັງງານ ແລະ ບໍ່ແຮ່ໃຫ້ດຳເນີນໄປຕາມລະບຽບກົດໝາຍ, ມີບາງໂຄງການດໍາເນີນການກໍ່ສ້າງ ແລະ ບາງໂຄງການສໍາເລັດສາມາດຜະລິດ-ສົ່ງອອກ; ຫັນການເກັບລາຍຮັບໄປສູ່ລະບົບທັນສະໄໝ, ດໍາເນີນມາດຕະການເພີ່ມລາຍຮັບ, ຄຸ້ມຄອງ-ຈໍາກັດລາຍຈ່າຍ, ສໍາຫລວດຖານລາຍຮັບໃໝ່, ຊຸກຍູ້ຜັກດັນໃຫ້ຜູ້ປະກອບການ, ຫົວໜ່ວຍວິສາຫະກິດທຸກປະເພດຫັນມາຖືບັນຊີຖືກຕ້ອງ ເພື່ອກ້າວສູ່ການກວດສອບທີ່ໂປ່ງໃສ; ຫລຸດຜ່ອນລາຍຈ່າຍທີ່ບໍ່ຈໍາເປັນ ຕາມນະໂຍບາຍປະຢັດ ແລະຕ້ານການຟຸມເຟືອຍຂອງລັດຖະບານ;ສ້າງສະຖຽນລະພາບດ້ານເງິນຕາ,ຫັນການເບີກຈ່າຍຊໍາລະສະສາງເງິນຕາຜ່ານລະບົບທະນາຄານ, ນໍາໃຊ້ສະກຸນເງິນກີບ ແລະຈໍາກັດລະບົບການແລກປ່ຽນເງິນຕາແບບຊະຊາຍຜິດກົດໝາຍ;ສ້າງ ແລະປັບປຸງນິຕິກໍາລຸ່ມກົດໝາຍ,ຊຸກບັນດາພະແນກການ, ຫ້ອງການ ແລະອົງການທຽບປະຕິບັດໜ້າທີ່ວຽກງານໃຫ້ຖືກຕ້ອງ-ສອດຄ່ອງຕາມລະບຽບກົດໝາຍຢ່າງເຂັ້ມງວດ.

ທ່ານ ຄໍາປະກອນ ອຸເທນທະປັນຍາ ກ່າວຕື່ມວ່າ: ເພື່ອສືບຕໍ່ແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ມີຜົນສໍາເລັດ, ມີປະສິດທິພາບ ແລະ ປະສິດທິຜົນນັ້ນ, ແຂວງຕ້ອງສືບຕໍ່ສົ່ງເສີມການສ້າງຖານການຜະລິດ-ທຸລະກິດ, ການບໍລິການ ແລະ ສ້າງຄວາມເຂັ້ມແຂງ ຂອງຖານລາຍຮັບ ໂດຍເລີ່ມຈາກການກວດກາ ແລະຈັດຕັ້ງການຜະລິດດ້ວຍຫລາຍຮູບແບບ, ຫລາຍລະດັບແຕ່ຮາກຖານຂຶ້ນມາ; ສ້າງເງື່ອນໄຂອັນເອື້ອອໍານວຍໃຫ້ແກ່ການຄ້າ ແລະ ການລົງທຶນເພື່ອຍູ້ແຮງການຜະລິດຕາມທິດສ້າງຄວາມເຂັ້ມແຂງໃຫ້ແກ່ການຜະລິດພາຍໃນ, ເພີ່ມການສົ່ງອອກໃຫ້ຫລາຍຂຶ້ນ; ປັບປຸງກົນໄກສົ່ງເສີມດ້ວຍການຈັດລຽງບູລິມະສິດ ແລະ ກຳນົດ ລາຍການສິນຄ້າທີ່ເປັນທ່າແຮງ ແລະເຂດທີ່ຈະຜະລິດຢ່າງລະອຽດ; ດຳເນີນມາດຕະການສົ່ງເສີມ ແລະປົກປ້ອງຜູ້ຜະລິດພາຍໃນຈາກຖານຜະລິດສູ່ຕະຫລາດຊົມໃຊ້; ປະຕິບັດນະໂຍບາຍສົ່ງເສີມ ແລະ ພັດທະນາ SMEs ໃຫ້ເປັນຮູບປະທຳ; ຫັນການຄຸ້ມຄອງເສດຖະກິດໃຫ້ເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ມປະສິດທິພາບການຄຸ້ມຄອງລັດ ດ້ວຍກົດໝາຍ, ຫັນໄປສູ່ສັງຄົມການຜະລິດ, ສັງຄົນນໍາໃຊ້ເງິນກີບ; ແກ້ໄຂການຮົ່ວໄຫລຂອງການຈັດເກັບງົບປະມານ, ດຳເນີນມາດຕະການເພີ່ມລາຍຮັບງົບປະມານເຂົ້າລັດໃຫ້ສູງຂຶ້ນ, ດຳເນີນມາດຕະການ, ວິທີການຊຸກຍູ້ ແລະສົ່ງເສີມໃຫ້ວິສາຫະກິດທຸກປະເພດຫັນມາຖືບັນຊີທີ່ຖືກຕ້ອງເພື່ອກ້າວສູ່ການກວດສອບທີ່ໂປ່ງໃສ; ສ້າງກົນໄກ ແລະປະຕິບັດມາດຕະການເດັດຂາດ,ເຂັ້ມງວດຕໍ່ພະນັກງານລັດ,ຜູ້ປະກອບການທີ່ເຮັດຜິດກົດໝາຍ ແລະລະບຽບວິໃນດ້ານແຜນການ-ການເງິນ; ເລັ່ງແກ້ໄຂບັນຫາໜີ້ສິນ ແລະດຳເນີນການກວດສອບ,ກວດກາ, ປະເມີນຜົນບັນດາໂຄງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດ ທີ່ບໍ່ມີປະສິດທິພາບ-ປະສິດທິຜົນ; ແກ້ໄຂບັນຫາເງິນຕາ ດ້ວຍການຄວບຄຸມການຊື້-ຂາຍເງິນຕາ ແລະ ການຊຳລະສະສາງຜ່ານລະບົບທະນາຄານ, ມີມາດຕະການ ໃຫ້ບໍລິສັດ ແລະຜູ້ປະກອບການຕ້ອງຊຳລະສະສາງເປັນສະກຸນເງິນກີບ, ເງິນຕາ, ຜ່ານທະນາຄານພາຍໃນ;ແກ້ໄຂໜີ້ສິນສາທາລະນະ ດ້ວຍການບໍລິຫານຈັດການຢ່າງເປັນລະບົບ ແລະມີປະສິດທິພາບ.
---
ຂຽນໂດຍ: ສັນຍາ

แชร์