ຜົນກອງປະຊຸມລັດຖະບານເປີດກວ້າງ ຄັ້ງທີ II ປີ 2023

ກອງປະຊຸມລັດຖະບານເປີດກວ້າງຄັ້ງທີII ປີ 2023 ໄດ້ໄຂຂຶ້ນໃນວັນທີ 26 ແລະໄດ້ອັດລົງໃນ ວັນທີ 27 ທັນວາ 2023 ທີ່ຫໍປະຊຸມແຫ່ງຊາດ, ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ ສະມາຊິກລັດຖະບານ ເຈົ້າແຂວງ,ເຈົ້າຄອງນະຄອນຫຼວງວຽງຈັນ, ຜູ້ຕາງໜ້າອົງການຈັດຕັ້ງພັກ-ລັດທຽບເທົ່າກະຊວງ, ສູນກາງແນວລາວສ້າງຊາດ, ອົງການນິຕິບັນຍັດ, ອົງການຕຸລາການ, ສະຫະພັນນັກຮົບເກົ່າແຫ່ງຊາດລາວ, ບັນດາອົງການຈັດຕັ້ງມະຫາຊົນ, ອົງການກວດກາແຫ່ງລັດ ແລະອົງການກວດສອບແຫ່ງລັດເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ໄດ້ພ້ອມກັນຄົ້ນຄວ້າ, ປຶກສາຫາລື ແລະປະກອບຄຳເຫັນດ້ວຍຄວາມເອົາໃຈໃສ່ຕໍ່ 03 ວາລະສໍາຄັນດັ່ງນີ້: ວາລະທີ 1) ກອງປະຊຸມເຫັນດີດ້ານຫຼັກການຮັບຮອງເອົາບົດລາຍງານສະຫຼຸບການປະຕິບັດມະຕິກອງປະຊຸມລັດຖະບານເປີດກວ້າງຄັ້ງທີI ແລະ ກໍານົດທິດທາງແຜນວຽກຈຸດສຸມຂອງລັດຖະບານປີ 2024, ໃນນັ້ນກອງປະຊຸມໄດ້ເນັ້ນໜັກຕື່ມສືບຕໍ່ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດປີ 2024; ແຜນງົບປະມານແຫ່ງລັດ ແລະແຜນເງິນຕາປະຈຳປີ 2024; ແຜນການແກ້ໄຂຜົນການກວດສອບ ແລະມະຕິຂອງລັດຖະບານສະບັບເລກທີ 17, ລົງວັນທີ 12 ທັນວາ 2023. ພ້ອມກັນນັ້ນກໍ່ໃຫ້ສືບຕໍ່ການຈັດຕັ້ງປະຕິບັດ 2 ວາລະແຫ່ງຊາດ; ແລະການແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າແລະໜີ້ສິນຕ່າງປະເທດໃຫ້ປະສົບຜົນສຳເລັດແລະເປັນຮູບປະທຳຕາມແຜນທີ່ກຳນົດໄວ້.

ວາລະທີ 2: ກອງປະຊຸມ ໄດ້ປຶກສາຫາລືການແບ່ງຄວາມຮັບຜິດຊອບຕົວຈິງໃຫ້ທ້ອງຖິ່ນໃນວຽກງານຈໍານວນໜຶ່ງແລະໄດ້ເຫັນດີດ້ານຫຼັກການຮັບຮອງເອົາ: (1) ການມອບຄວາມຮັບຜິດຊອບໃຫ້ທ້ອງຖິ່ນເປັນເຈົ້າການຕິດຕາມກວດກາ, ຊຸກຍູ້ ແລະຄຸ້ມຄອງໂຄງການລົງທຶນທີ່ສູນກາງອະນຸມັດໂດຍໃຫ້ເຮັດເປັນຂໍ້ຕົກລົງຂອງນາຍົກລັດຖະມົນຕີແບ່ງຂັ້ນຄຸ້ມຄອງໂຄງການລົງທຶນພາກເອກະຊົນລະຫວ່າງສູນກາງ ແລະທ້ອງຖິ່ນພ້ອມທັງໃຫ້ມີບັນຊີໂຄງການຕົວຈິງມອບໃຫ້ແຕ່ລະແຂວງ ແລະມອບງົບປະມານໃຫ້ພ້ອມ; (2) ສໍາລັບການແບ່ງ ແລະມອບໂອນຫົວໜ່ວຍລາຍຮັບທີ່ເປັນພູດຂອງສູນກາງໃຫ້ທ້ອງຖິ່ນເປັນຜູ້ເກັບຜ່ານການທົດລອງເຫັນວ່າມີປະສິດທິຜົນດີຈຶ່ງເຫັນດີໃຫ້ສືບຕໍ່ຂະຫຍາຍໂດຍໃຫ້ກະຊວງການເງິນເຮັດເປັນບັນຊີຫົວໜ່ວຍລາຍຮັບມອບໃຫ້ແຕ່ລະແຂວງ ແລະແນະນຳວິທີປະຕິບັດໃຫ້ລະອຽດ.

ວາລະທີ 3: ກອງປະຊຸມໄດ້ພິຈາລະນາ ແລະເຫັນດີດ້ານຫຼັກການຮັບຮອງເອົາ: (1) ການສະຫຼຸບວຽກງານແຂ່ງຂັນຍ້ອງຍໍລະດັບຊາດປີ 2023 ແລະ ສະເໜີທິດທາງ ແລະຂໍ້ແຂ່ງຂັນຮັກຊາດແລະພັດທະນາປະຈຳປີ 2024; (2) ລາຍງານຜົນການແກ້ໄຂບັນຫາເຂດແດນເຊື່ອມຕໍ່ລະຫວ່າງນະຄອນຫຼວງວຽງຈັນກັບແຂວງ, ລະຫວ່າງແຂວງກັບແຂວງໃນທົ່ວປະເທດ; (3) ການສະເໜີໂຄງການແຂ່ງຂັນຮັກຊາດແລະພັດທະນາຂອງຕົນໃນປີ 2024 ຂອງບັນດາຂະແໜງການແລະທ້ອງຖິ່ນ.

ນອກຈາກນັ້ນກອງປະຊຸມໄດ້ຮັບຟັງການເຜີຍແຜ່ແຜນແມ່ບົດ “ວ່າດ້ວຍການສ້າງຄູ່ຮ່ວມຊາຕາກຳລາວ-ຈີນສະບັບປີ 2024-2028” ໂດຍໄດ້ເນັ້ນໜັກໃຫ້ຂະແໜງການແລະພາກສ່ວນກ່ຽວຂ້ອງເອົາໃຈໃສ່ແກ້ໄຂບັນດາຂໍ້ຄົງຄ້າງ ແລະປະກົດການຫຍໍ້ທໍ້ຕ່າງໆທີ່ຕິດພັນກັບໂຄງການຮ່ວມມືລາວ-ຈີນໃນໄລຍະຜ່ານມາໃຫ້ໄດ້ຮັບຜົນດີ, ພ້ອມທັງສືບຕໍ່ຊຸກຍູ້ການພັດທະນາບັນດາໂຄງການຮ່ວມມືລາວ-ຈີນໃຫ້ມີຄວາມຄືບໜ້າໄວ, ດຳເນີນຖືກຕ້ອງຕາມສັນຍາ, ກົດໝາຍແລະລະບຽບການທີ່ກ່ຽວຂ້ອງບົນຈິດໃຈຍາດແຍ່ງເອົາການລົງທຶນ, ການສະໜັບສະໜູນຊ່ວຍເຫຼືອທາງດ້ານຕ່າງໆໃຫ້ຫຼາຍຂຶ້ນ.

ໃນໂອກາດກ່າວປິດກອງປະຊຸມ, ທ່ານນາຍົກລັດຖະມົນຕີ ໄດ້ຮຽກຮ້ອງມາຍັງບັນດາທ່ານສະມາຊິກລັດຖະບານ, ເຈົ້າແຂວງ ແລະເຈົ້າຄອງນະຄອນຫຼວງວຽງຈັນຕ້ອງໄດ້ຍົກສູງຄວາມຮັບຜິດຊອບ ແລະຄວາມເປັນເຈົ້າການໃນການຈັດຕັ້ງປະຕິບັດວຽກງານໃນຄວາມຮັບຜິດຊອບໃຫ້ສູງກວ່າເກົ່າແທ້ໆໂດຍຫັນເປັນແຜນປະຕິບັດງານລະອຽດ, ມີຄາດໝາຍຊັດເຈນ, ມີການແບ່ງຄວາມຮັບຜິດຊອບໃຫ້ການຈັດຕັ້ງ ແລະບຸກຄົນຢູ່ແຕ່ລະຂັ້ນໃນແຕ່ລະໄລຍະໃຫ້ຈະແຈ້ງ, ທັງສອດຄ່ອງກັບເງື່ອນໄຂສະພາບຄວາມເປັນຈິງຂອງແຕ່ລະບ່ອນ ແລະໄດ້ຮັບຜົນສຳເລັດເປັນກ້າວໆ. ພ້ອມກັນນັ້ນ, ກໍໃຫ້ກະຊວງ, ອົງການແລະອົງການປົກຄອງທ້ອງຖິ່ນຈັດຕັ້ງເຜີຍແຜ່ບັນດານິຕິກຳທີ່ໄດ້ເນັ້ນໜັກໃນກອງປະຊຸມຄັ້ງນີ້ໃຫ້ເຂົ້າໃຈເປັນເອກະພາບແລະທົ່ວເຖິງ, ພ້ອມທັງຕິດຕາມ, ຊຸກຍູ້ຂະແໜງການກ່ຽວຂ້ອງໂດຍສະເພາະກະຊວງທີ່ເປັນເຈົ້າການປະຕິບັດຕ້ອງໄດ້ມີການສົມທົບກົມກຽວກັບອົງການປົກຄອງທ້ອງຖິ່ນທີ່ຕິດພັນກັບໜ້າວຽກນັ້ນໆແຕ່ຫົວທີເພື່ອສາມາດແກ້ໄຂທັນສະພາບການໃນກໍລະນີມີບັນຫາຂໍ້ຫຍຸ້ງຍາກໃນການປະຕິບັດ; ຮຽກຮ້ອງອົງການແນວລາວສ້າງຊາດ, ສະຫະພັນນັກຮົບເກົ່າ ແລະອົງການຈັດຕັ້ງມະຫາຊົນແຕ່ລະຂັ້ນຈົ່ງສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ-ພະນັກງານແລະສັງຄົມໃຫ້ຮັບຮູ້ ແລະເຂົ້າໃຈເຖິງສະພາບການຕົວຈິງ ແລະ ຄວາມພະຍາຍາມຂອງລັດຖະບານໃນການແກ້ໄຂບັນຫາເສດຖະກິດໃນແຕ່ລະໄລຍະ.
ຂ່າວ ແລະ ພາບ: ກົມປະຊາສຳພັນ ຫສນຍ.

แชร์