ສໍາເລັດການຍົກລະດັບທິດສະດີການເມືອງ ໃຫ້ສື່ມວນຊົນ

ຊຸດຝຶກອົບຮົມທິດສະດີການເມືອງສະເພາະດ້ານໄລຍະສັ້ນ 15 ວັນ ຊຸດທຳອິດໃຫ້ແກ່ສື່ມວນຊົນລາວທຸກຂະແໜງການອ້ອມຂ້າງສູນກາງທີ່ຈັດຂຶ້ນໃນລະຫວ່າງວັນທີ 6-26 ທັນວາ 2023 ຢູ່ສະຖາບັນສື່ມວນຊົນ,ວັດທະນະທຳ ແລະທ່ອງທ່ຽວ ນະຄອນຫລວງວຽງຈັນ ໄດ້ປິດລົງດ້ວຍຜົນສຳເລັດ ໃນວັນທີ 27 ທັນວາ 2023 ໂດຍມີ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ມີຫົວໜ້າກົມ, ຮອງກົມອ້ອມຂ້າງກະຊວງ ຖວທ ເຂົ້າຮ່ວມ.

ຊຸດຝຶກອົບຮົມຄັ້ງນີ້, ມີສຳມະນາກອນເຂົ້າຮ່ວມທັງໝົດ 51 ຄົນ, ຍິງ 21 ຄົນ ໄດ້ຮຽນຮູ້ຫລັກມູນທິດສະດີມາກ-ເລນິນ, ສະພາບສາກົນ ແລະທ່າອ່ຽງເສດຖະກິດ, ບັນຫາພື້ນຖານຂອງແນວທາງກ້າວຂຶ້ນສັງຄົມນິຍົມຢູ່ປະເທດເຮົາ, ການພັດທະນາເສດຖະກິດ-ສັງຄົມນິຍົມ, ຄຸນສົມບັດສິນທຳປະຕິວັດ ແລະຈັນຍາບັນຂອງການເປັນຜູ້ນຳແບບໃໝ່, ກໍ່ສ້າງພັກປອດໃສ ເຂັ້ມແຂງ ໜັກແໜ້ນ, ຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ການຄຸ້ມຄອງ ແລະ ການພັດທະນາຊັບພະຍາກອນມະນຸດໃນກົງຈັກລັດ, ຍົກສູງຂີດຄວາມສາມາດໃນການຫັນກຸ້ມຕົນເອງທາງດ້ານງົບປະມານ ວິຊາການ, ກົດໝາຍວ່າດ້ວຍສື່ມວນຊົນ, ຄຸ້ມຄອງ-ນຳໃຊ້ສື່ສັງຄົມອອນລາຍ, ການຂຽນຂ່າວ ແລະສົ່ງຂ່າວສື່ສັງຄົມອອນລາຍໂດຍມີອາຈານຈາກສະຖາບັນການເມືອງ ແລະ ການປົກຄອງແຫ່ງຊາດ ແລະອາຈານຈາກ ກະຊວງ ຖວທ ໃຫ້ກຽດມາຖ່າຍທອດບົດຂຽນເຊິ່ງຊຸດຝຶກອົບຮົມໃນຄັ້ງນີ້, ດຳເນີນໄປດ້ວຍບັນຍາກາດອັນຄຶກຄື້ນ, ສຳມະນາກອນນອກຈາກໄດ້ຮຽນຮູ້ທິດສະດີແລ້ວ, ຍັງໄດ້ແລກປ່ຽນບົດຮຽນ, ແລກປ່ຽນຄຳຄິດຄຳເຫັນ ເຊິ່ງກັນ ແລະກັນຕື່ມອີກ. ທັງນີ້, ແນໃສ່ສ້າງຄວາມເຂັ້ມແຂງທາງດ້ານທິດສະດີ ການເມືອງ-ການປົກຄອງໃຫ້ແກ່ບັນດາພະນັກງານສື່ມວນຊົນ ທຸກຂະແໜງການ ອ້ອມຂ້າງສູນກາງ ໄດ້ຮຽນຫລັກມູນພື້ນຖານ, ທິດສະດີມາກ-ເລນິນ, ແນວຄິດໄກສອນ ພົມວິຫານ, ຮຽນຮູ້ແນວທາງນະໂຍບາຍຂອງພັກ, ບັນດາກົດໝາຍ ແລະ ແຜນພັດທະນາເສດຖະກິດ-ສັງຄົມຂອງລັດຕາມໂຄງການຫລັກສູດທິດສະດີການເມືອງສະເພາະດ້ານທີ່ສະຖາບັນການເມືອງ ແລະ ການປົກຄອງແຫ່ງຊາດສ້າງໃຫ້ກະຊວງ ຖວທ ໃນການບຳລຸງຍົກລະດັບ, ຄຸນທາດການເມືອງ, ຄຸນສົມບັດສິນທຳປະຕິວັດ, ທັດສະນະຫລັກໝັ້ນພະນັກງານທີ່ເຮັດວຽກສື່ມວນຊົນຂອງກະຊວງ ຖວທ ແລະບັນດາສື່ມວນຊົນອ້ອມຂອງບັນດາກະຊວງທີ່ກ່ຽວຂ້ອງໃຫ້ສູງຂຶ້ນ.

ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ໄດ້ຕາງໜ້າໃຫ້ຄະນະພັກຄະນະນຳກະຊວງ ຖວທ ຂໍສະແດງຄວາມຊົມເຊີຍມາຍັງຄະນະຮັບຜິດຊອບຝຶກອົບຮົມຂອງ ສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວກະຊວງ ຖວທ ແລະກົມຄຸ້ມຄອງການຮຽນ-ການສອນ ຂອງສະຖາບັນການເມືອງ ແລະ ການປົກຄອງແຫ່ງຊາດທີ່ໄດ້ຮ່ວມກັນ ເຮັດວຽກດ້ວຍຄວາມຕັ້ງໜ້າ ພະຍາຍາມພົວພັນກັບບັນດາກົມກ່ຽວຂ້ອງທັງສອງຝ່າຍ ຈັດຕັ້ງຝຶກອົບຮົມຄັ້ງນີ້ດ້ວຍຜົນສຳເລັດຢ່າງຈົບງາມ ແລະຊົມເຊີຍມາຍັງບັນດາສຳມະນາກອນທີ່ສຳເລັດການຝຶກອົບຮົມພ້ອມທັງໄດ້ຮັບໃບຢັ້ງຢືນຈາກສະຖາບັນການເມືອງ ແລະການປົກຄອງແຫ່ງຊາດຢ່າງເປັນທາງການ.

ຊຸດຝຶກອົບໃນຄັ້ງນີ້, ຈະເປັນເຂັມທິດເຍືອງທາງໃນການປະຕິບັດໜ້າທີ່ທີ່ການຈັດຕັ້ງມອບໝາຍໃຫ້, ມີປະສິດທິຜົນດີຂຶ້ນ, ເພື່ອນຳໄປຝຶກຝົນຫລໍ່ຫລອມຕົນເອງໃຫ້ກາຍເປັນນັກສື່ມວນຊົນທີ່ກ້າວໜ້າທັນສະໄໝຮັບໃຊ້ການໂຄສະນາເຜີຍແຜ່ແນວທາງນະໂຍບາຍຂອງພັກ, ຜົນສຳເລັດການພັດທະນາເສດຖະກິດ-ວັດທະນະທຳສັງຄົມຂອງລັດ, ການປ້ອງກັນຊາດປ້ອງກັນຄວາມສະຫງົບທີ່ເຂັ້ມແຂງຂອງປະເທດພວກເຮົາລວມທັງສ່ອງແສງໃຫ້ເຫັນວຽກດີຄົນເດັ່ນຢູ່ສູນກາງຮອດທ້ອງຖິ່ນຢ່າງກວ້າງຂວາງ ແລະ ອື່ນໆ.

ໂອກາດດຽວກັນ, ທ່ານນາງ ບຸນມີ ຈຸນລະຈັກ ຮອງຫົວໜ້າສະຖາບັນການເມືອງການປົກຄອງ ແຫ່ງຊາດ ກໍໄດ້ຕາງໜ້າໃຫ້ສະຖາບັນມອບໃບຢັ້ງຢືນໃຫ້ສຳມະນາກອນຕື່ມອີກ.
ຂ່າວ: ຂປລ

แชร์