ຄະນະປະຈຳສະພາແຫ່ງຊາດ ພິຈາລະນາຫຼາຍບັນຫາສຳຄັນ

ກອງປະຊຸມຄະນະປະຈຳສະພາແຫ່ງຊາດປະຈຳເດືອນທັນວາ 2023 ໄດ້ດໍາເນີນໃນລະຫວ່າງວັນທີ 25- 26 ທັນວາຜ່ານມາໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານຄະນະປະຈຳສະພາແຫ່ງຊາດ; ມີບັນດາທ່ານຮອງປະທານ ແລະ ກຳມະການຄະນະປະຈຳສະພາແຫ່ງຊາດ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຜົນການຮຽບຮຽງເນື້ອໃນຂອງຮ່າງກົດໝາຍ ຈຳນວນ 7 ສະບັບ ທີ່ຜ່ານການພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX; ຮ່າງຄຳແນະນຳຂອງຄະນະປະຈຳສະພາແຫ່ງຊາດ ກ່ຽວກັບການສ້າງແຜນການສ້າງ ແລະປັບປຸງກົດໝາຍ ໄລຍະປີ 2026-2030; ບົດລາຍງານການຄົ້ນຄວ້າການສະເໜີແຕ່ງຕັ້ງຜູ້ພິພາກສາຊັ້ນໜຶ່ງຂອງສານປະຊາຊົນ, ສະເໜີແຕ່ງຕັ້ງປະທານ-ຮອງປະທານສານປະຊາຊົນທ້ອງຖິ່ນ, ສະເໜີອະນຸມັດສ້າງຕັ້ງກົມສັງລວມວິຊາການ ແລະສະຖິຕິສານຂອງສານປະຊາຊົນສູງສຸດ; ການສະເໜີຂໍພິຈາລະນາໃຫ້ສັດຕະຍາບັນແກ່ຂໍ້ຕົກລົງຮັບຮູ້ເຊິ່ງກັນ ແລະກັນດ້ານມາດຕະຖານຜະລິດຕະພັນຍານພາຫະນະອາຊຽນ; ລາຍງານຜົນສຳເລັດການເປັນເຈົ້າພາບຈັດກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1;ລາຍງານຜົນການຕ້ອນຮັບການຢ້ຽມຢາມສອງຝ່າຍຂອງສະ ພາແຫ່ງຊາດ ແຫ່ງຣາຊະອານາຈັກກຳປູເຈຍ ແລະ ສສ. ຫວຽດນາມ; ການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕິດພັນກັບຍຸດທະສາດການສົ່ງອອກອຸດສາຫະກຳປຸງແຕ່ງ; ໜັງສືສະເໜີຂອງລັດຖະບານກ່ຽວກັບການຂໍດັດປັບລັດຖະບັນຍັດ ສະບັບເລກທີ 002/ປປທ, ລົງວັນທີ 17 ມິຖຸນາ 2021 ວ່າດ້ວຍຄ່າທຳນຽມ ແລະຄ່າບໍລິການໃນຂົງເຂດກະຊວງປ້ອງກັນຄວາມສະຫງົບ ໃນການອອກບັດລົດ ແລະໜັງສືສະເໜີຂອງລັດຖະບານກ່ຽວກັບການສະເໜີຂໍດັດປັບລັດຖະບັນຍັດວ່າດ້ວຍຄ່າທຳນຽມ ແລະຄ່າບໍລິການ ສະບັບເລກທີ 002/ປປທ, ລົງວັນທີ 17 ມິຖຸນາ 2021 (ສະບັບປັບປຸງ 2021) ພາກທີ VIII ຄ່າທຳນຽມ ແລະ ຄ່າບໍລິການຂົງເຂດຕ່າງປະເທດ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)

แชร์