ເລຂາທິການໃຫຍ່ ສະເໜີ ສພຊ ແລະ ສພຂ ເອົາໃຈໃສ່ຫຼາຍບັນຫາສໍາຄັນ

ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ໄດ້ໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມກາງສະໄໝ ຂອງສະພາແຫ່ງຊາດ ຊຸດທີ 9 ແລະ ສະພາປະຊາຊົນຂັ້ນແຂວງ ຊຸດທີ ທີ່ຈັດຂຶ້ນໃນລະຫວ່າງວັນທີ 21-22 ທັນວາ 2023, ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສະພາແຫ່ງຊາດ.

ທ່ານນາງ ສູນທອນ ໄຊຍະຈັກ ຮອງປະທານຄະນະປະຈໍາສະພາແຫ່ງຊາດ ໄດ້ລາຍງານຫຍໍ້ວ່າ: ກອງປະຊຸມໄດ້ຮັບຟັງການລາຍງານຂອງຕາງໜ້າຄະນະປະຈໍາສະພາແຫ່ງຊາດ ຊຶ່ງໄດ້ຕີລາຄາຄືນການເຄື່ອນໄຫວວຽກງານຂອງສະພາແຫ່ງຊາດ ແລະສະພາປະຊາຊົນຂັ້ນແຂວງ ແຕ່ປີ 2021-2023 ເປັນຕົ້ນ: ດ້ານວຽກການເມືອງ-ແນວຄິດ; ດ້ານການປະຕິບັດໜ້າທີ່ການເມືອງ (ດ້ານນິຕິບັນຍັດ ແລະນິຕິກຳຂອງທ້ອງຖິ່ນ, ດ້ານການຕົກລົງບັນຫາສໍາຄັນພື້ນຖານຂອງຊາດ ແລະຂອງທ້ອງຖິ່ນ ແລະ ດ້ານການຕິດຕາມກວດກາ); ວຽກງານ ການຕ່າງປະເທດ; ວຽກງານການສ້າງຄວາມເຂັ້ມແຂງ, ວຽກງານພົວພັນປະສານງານ ແລະ ທິດທາງ ແຜນການທ້າຍສະໄໝ ຈົນຮອດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ X. ຜ່ານການຟັງບົດລາຍງານ ແລະ ການປະກອບຄຳເຫັນຂອງຜູ້ແທນກອງປະຊຸມ, ສາມາດສະຫຼຸບໄດ້ເນື້ອໃນຕົ້ນຕໍ ດັ່ງນີ້: ດ້ານນິຕິບັນຍັດ: ສພຊ ໄດ້ຮັບຮອງເອົາກົດໝາຍໄດ້ 51 ສະບັບ ໃນນັ້ນສ້າງໃໝ່ 15 ສະບັບ ແລະ ປັບປຸງ 36 ສະບັບ, ສະພາປະຊາຊົນຂັ້ນແຂວງ ໄດ້ຮັບຮອງເອົາມະຕິ 82 ສະບັບ ໃນນັ້ນ ສ້າງໃໝ່ 66 ສະບັບ, ປັບປຸງ 16 ສະບັບ. ດ້ານການພິຈາລະນາບັນຫາພື້ນຖານຂອງຊາດ ແລະທ້ອງຖິ່ນ: ສພຊ ໄດ້ພິຈາລະນາຮັບຮອງເອົາມະຕິ ຈຳນວນ 121 ສະບັບ, ສະພາປະຊາຊົນຂັ້ນແຂວງ ພິຈາລະນາເອົາມະຕິ ຈຳນວນ 586 ສະບັບ.

ໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ສະພາແຫ່ງຊາດ ແລະສະພາປະຊາຊົນຂັ້ນແຂວງຍາດມາໄດ້, ພ້ອມນັ້ນ ສະຫາຍ ເລຂາທິການໃຫຍ່ ຍັງໄດ້ສະເໜີໃຫ້ເອົາໃຈໃສ່ບາງບັນຫາສໍາຄັນ ດັ່ງນີ້: 1). ສະເໜີໃຫ້ປັບປຸງກ່ຽວກັບການປະຕິບັດບົດບາດດ້ານນິຕິບັດຍັດ; ເພີ່ມທະວີ ກ່ຽວກັບບົດບາດການຕົກລົງບັນຫາສຳຄັນພື້ນຖານຂອງຊາດ, ຂອງທ້ອງຖິ່ນ; ສພຊ ແລະ ສພຂ ສົມທົບກັບອົງການກວດກາ, ອົງການກວດສອບ, ແນວລາວສ້າງຊາດ ແລະ ອົງການຈັດຕັ້ງມະຫາຊົນເພີ່ມທະວີການຕິດຕາມ, ກວດກາ ການເຄົາລົບ, ປະຕິບັດລັດຖະທຳມະນູນ, ກົດໝາຍຂອງບັນດາອົງການລັດຊອກໃຫ້ເຫັນດ້ານດີ, ດ້ານຕັ້ງໜ້າເພື່ອຊຸກຍູ້ສົ່ງເສີມ ແລະເສີມຂະຫຍາຍສູ່ລວງເລິກຢ່າງກວ້າງຂວາງ, ພ້ອມນັ້ນກໍ່ແກ້ໄຂບັນຫາທີ່ເກີດຂຶ້ນໃຫ້ຖືກຕ້ອງ ແລະແທດກັບຕົວຈິງ.

2). ຕໍ່ກັບການປະຕິບັດປ່ຽນແປງໃໝ່ດ້ານຈິນຕະນາການກ່ຽວກັບເນື້ອໃນການສືບຕໍ່ບູລະນະລັດປະຊາທິປະໄຕປະຊາຊົນ, ປັບປຸງແບບແຜນ, ກົນໄກປະສານງານຂອງບັນດາອົງການອຳລັດດ້ວຍກັນກໍ່ຄືການເສີມຂະຫຍາຍປະຊາທິປະໄຕໃນລະບົບສະພາຂອງພວກເຮົານັ້ນ: ໃຫ້ທົບທວນກ່ຽວກັບລັກສະນະລວມຂອງສະພາຂອງປະເທດຕ່າງໆ ໃນໂລກທີ່ມີລະບອບການເມືອງການປົກຄອງແຕກຕ່າງກັນນັ້ນວ່າ: ລະບົບອຳນາດລັດ ຂອງປະເທດໃດກໍ່ຕາມ ປະກອບດ້ວຍລັດຖະສະພາ, ສະພາແຫ່ງຊາດ, ສະພາປະຊາຊົນຂັ້ນ ແຂວງ, ທ້ອງຖິ່ນ; ບາງປະເທດມີສອງສະພາຄືສະພາສູງ ແລະສະພາຕໍ່າທີ່ມີການແບ່ງງານ, ແບ່ງພາລະບົດບາດເພື່ອເຮັດໜ້າທີ່ສ້າງກົດໝາຍ, ຮັບຮອງກົດໝາຍ, ຕິດຕາມ ແລະກວດກາ ອົງການບໍລິຫານ ແລະຕຸລາການ ໃນການປະຕິບັດກົດໝາຍ.

ນອກຈາກນັ້ນ ສະຫາຍເລຂາທິການໃຫຍ່ຍັງໄດ້ສະເໜີໃຫ້ສຸມໃສ່ສ້າງພື້ນຖານ ແລະກະກຽມບັນດາເງື່ອນໄຂໃຫ້ແກ່ການຍູ້ແຮງການຜັນຂະຫຍາຍແນວທາງປ່ຽນແປງໃໝ່ຂອງພັກສູ່ລວງເລິກ; ເພີ່ມທະວີຄວາມສາມັກຄີເປັນເອກະພາບ, ຄວາມຮັບຜິດຊອບການເມືອງຂອງສະມາຊິກສະພາແຫ່ງຊາດ ແລະຜູ້ທີ່ເຮັດວຽກງານໃນອົງການນິຕິບັນຍັດ; ສືບຕໍ່ເພີ່ມທະວີການພົວພັນຮ່ວມມື ກັບລັດຖະສະພາ ຂອງປະເທດເພື່ອນມິດ ແລະການເຊື່ອມໂຍງກັບລັດຖະສະພາສາກົນຢ່າງເປັນເຈົ້າການ.

แชร์