2024 ລາວ ແລະ UNFPA ພ້ອມຈະສືບຕໍ່ຮ່ວມມື

ກະຊວງແຜນການ ແລະການລົງທຶນ (ຜທ) ແລະອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ໄດ້ຈັດກອງປະຊຸມທົບທວນ ແລະວາງແຜນປະຈຳປີ ເພື່ອທົບທວນຄວາມຄືບໜ້າໃນການບັນລຸໝາກຜົນຂອງກອບແຜນງານການຮ່ວມມືຮອບວຽນທີ 7 ໃນໄລຍະປີ 2022 -2026 ແລະເພື່ອຈັດບຸລິມະສິດໃຫ້ແກ່ວຽກງານທີ່ສໍາຄັນໃນປີ 2024 ໂດຍການເປັນປະທານຂອງທ່ານນາງ ພອນວັນ ອຸທະວົງ ຮອງລັດຖະມົນຕີກະຊວງ ຜທ ແລະເປັນປະທານຮ່ວມໂດຍ ທ່ານ ດຣ. ບາກທິຢໍ ຄາດິເຣິບ ຜູ້ຕາງໜ້າອົງການ UNFPA.

ກອງປະຊຸມທົບທວນ ແລະວາງແຜນປະຈຳປີໄດ້ເຕົ້າໂຮມບັນດາຄູ່ຮ່ວມມືຈັດຕັ້ງປະຕິບັດແຜນງານຈາກບັນດາກະຊວງ, ອົງການຈັດຕັ້ງມະຫາຊົນ, ຄູ່ຮ່ວມພັດທະນາ ແລະ ອົງການຈັດຕັ້ງທາງສັງຄົມເພື່ອເລັງໃສ່ລະດົມທຶນເຂົ້າໃນການກໍ່ສ້າງ, ເພີ່ມທະວີ ແລະຮັບປະກັນການຮ່ວມມືຂອງແມ່ຍິງແລະ ເດັກຍິງ, ໄວໜຸ່ມ, ຄົນພິການ, ກຸ່ມຊົນເຜົ່າ ແລະປະຊາກອນກຸ່ມທີ່ມີຄວາມສ່ຽງອື່ນໆ ໂດຍອີງໃສ່ຫຼັກການກ້າວໄປພ້ອມກັນໂດຍບໍ່ປະຖິ້ມໃຜຢູ່ເບື້ອງຫຼັງ.

ກອງປະຊຸມໄດ້ຍົກໃຫ້ເຫັນບັນດາຜົນງານອັນພົ້ນເດັ່ນທີ່ອົງການ UNFPA ແລະບັນດາຄູ່ຮ່ວມຈັດຕັ້ງປະຕິ ບັດໄດ້ສໍາເລັດຜົນໃນປີ 2023 ທີ່ຜ່ານມາ. ໃນນັ້ນລວມມີການຮັບ ຮອງເອົາໂຮງຮຽນຜະດຸງຄັນທີ່ມີຄຸນນະພາບ 3 ແຫ່ງ ໂດຍສະຫະພັນຜະດຸງຄັນສາກົນ, ການສ້າງຕັ້ງສູນປົກປ້ອງໃຫ້ແກ່ຜູ້ລອດຊີວິດຈາກຄວາມຮຸນແຮງ 4 ແຫ່ ແລະໜ່ວຍງານບໍລິການປະຕູດຽວທີ່ໂຮງໝໍມະໂຫສົດ, ການນໍາເອົາເພດສຶກສາເຂົ້າໃນກົດໝາຍວ່າດ້ວຍການສຶກສາສາມັນສະບັບປັບປຸງ, ການຈັດກອງປະຊຸມລະດັບຊາດ ວ່າດ້ວຍປະຊາກອນ ແລະການພັດທະນາ, ການລາຍງານໄລຍະ 10 ຂອງການຈັດຕັ້ງປະຕິບັດສົນທິ ສັນຍາ CEDAW ແລະການຮັບປະກັນການມີສ່ວນຮ່ວມໃນການສໍາຫຼວດພົນລະເມືອງປີ 2025 ເປັນຕົ້ນ.

ທ່ານຮອງລັດຖະມົນຕີ ກະຊວງ ຜທ ກ່າວວ່າ “ໃນປີ 2024, ສປປ ລາວ ໄດ້ຮັບກຽດເປັນປະທານອາຊຽນ ແລະພ້ອມທັງເປັນປີທ່ອງທ່ຽວອາຊຽນ ເຊິ່ງຈະໄດ້ມີກິດຈະກໍາປິ່ນອ້ອມຫຼາຍຢ່າງ. ສະນັ້ນ, ທຸກພາກສ່ວນຕ້ອງໄດ້ເປັນເຈົ້າການຮ່ວມກັນໃນການກະກຽມແຜນສະໜັບສະໜູນສໍາລັບປີ 2024 ເຊິ່ງມີຄວາມສຳຄັນຫຼາຍ ຂໍໃຫ້ບັນດາທ່ານໄດ້ປະກອບຄໍາຄິດຄໍາເຫັນໃຫ້ແຜນປີ 2024 ເປັນແຜນທີ່ບຸກທະລຸເພື່ອສະໜັບສະໜູນການຈັດຕັ້ງປະຕິບັດຍຸດທະສາດການຮ່ວມມື ຮອບວຽນທີ 7 ໃນໄລຍະ 2022-2026 ນີ້, ແຜນການພັດທະນາເສດຖະກິດ-ສັງຄົມແຫ່ງຊາດ (NSEDP) ແລະ ເປົ້າໝາຍການພັດທະນາແບບຍືນຍົງ.”

ປີ 2023 ຍັງເປັນປີທີ່ສະແດງໃຫ້ເຫັນເຖິງຄວາມເປັນເຈົ້າການ ແລະການຊີ້ນໍານຳພາທີ່ຫ້າວຫັນຂອງລັດຖະບານ ສປປ ລາວ ເພື່ອບັນລຸແຜນດຳເນີນງານກອງປະຊຸມສາກົນວ່າດ້ວຍປະຊາກອນແລະ ການພັດທະນາ (ICPD PoA). ກອງປະຊຸມລະດັບຊາດ ວ່າດ້ວຍປະຊາກອນ ແລະ ການພັດທະນາຄັ້ງທີ 1 ທີ່ໄດ້ໃຫ້ ຄໍາໝາຍໝັ້ນ 14 ຫົວຂໍ້ ທີ່ສຸມໃສ່ການສ້າງຕັ້ງຄະນະປະສານງານ ແລະ ຕິດຕາມລະດັບຊາດ ສຳລັບນະໂຍບາຍປະຊາກອນ ແລະ ການພັດທະນາ, ການໃຫ້ບຸລິມະສິດ ແລະຮັບປະກັນການສຳຫຼວດພົນລະເມືອງ ໃນປີ 2025 ແລະການສໍາຫຼວດດັດສະນີໝາຍສັງຄົມລາວ ຄັ້ງທີ IIIເພື່ອສືບຕໍ່ຜັນຂະຍາຍໃນແຜນພັດທະນາເສດຖະກິດສັງຄົມແຫ່ງຊາດ (NSEDP) ຄັ້ງທີ 10 (2026-2030), ພ້ອມທັງສຸມໃສ່ການລົງທຶນເຂົ້າໃນວຽກງານສົ່ງເສີມສຸຂະພາບທາງເພດ ແລະ ສຸຂະພາບຈະເລີນພັນ, ລົບລ້າງຄວາມຮຸນແຮງບົນພື້ນຖານທາງເພດ, ເສີມສ້າງລະບົບການຄຸ້ມຄອງຂໍ້ມູນແຫ່ງຊາດ, ຊຸກຍູ້ວຽກງານເພດສຶກສາ, ການກະກຽມ ແລະການຕອບໂຕ້ໃຫ້ຄວາມຊ່ວຍເຫຼືອດ້ານມະນຸດສະທໍາ ແລະຍົກສູງການຮ່ວມມືໃຫ້ກວ້າງຂວາງ.

ການວາງແຜນຮ່ວມກັນໄດ້ຍົກໃຫ້ເຫັນເຖິງຄວາມຈຳເປັນທີ່ຕ້ອງສ້າງໂຄງປະກອບການປະສານງານທີ່ເຂັ້ມແຂງໃນລະດັບສູງ ເຊັ່ນ ຄະນະກຳມະການປະສານງານວຽກງານນະໂຍບາຍປະຊາກອນແຫ່ງຊາດ, ເຊິ່ງແມ່ນໜຶ່ງໃນຂໍ້ສະເໜີແນະຂອງກອງປະຊຸມລະດັບຊາດວ່າດ້ວຍປະຊາກອນ ແລະການພັດທະນາ NCPD ແລະ ທັງເປັນຄໍາຖະແຫຼງຂອງລັດຖະບານໃນກອງປະຊຸມໃຫຍ່ດ້ານປະຊາກອນໃນຂົງເຂດອາຊີ ປາຊີຟິກ (APPC) ຄັ້ງທີ 7.

ທ່ານ ດຣ. ບາກທິຢໍ ຄາດິເຣິບ, ຜູ້ຕາງໜ້າອົງການ UNFPA ກ່າວວ່າ, "ມື້ນີ້, ໃນຂະນະທີ່ພວກເຮົາສະເຫຼີມສະຫຼອງຜົນສໍາເລັດຂອງພວກເຮົາຮ່ວມກັນ, ສິ່ງສໍາຄັນສໍາລັບພວກເຮົາແມ່ນຕ້ອງຮຽນຮູ້ຈາກບົດຮຽນທີ່ຖອດຖອນໄດ້ ເພື່ອກ້າວໄປສູ່ການວາງແຜນໃນປີຫນ້າຂອງພວກເຮົາ. ຍ້ອນວ່າພວກເຮົາຮັບຜິດຊອບໃນການສະໜອງການຊ່ວຍເຫຼືອໃຫ້ແກ່ຜູ້ໄດ້ຮັບຜົນປະໂຫຍດ,ໂດຍສະເພາະແມ່ນແມ່ຍິງ ແລະເດັກຍິງ,ໃຫ້ສາມາດຮັບຮູ້ສິດທິ ແລະກ້າວເດີນໄປພ້ອມກັນໂດຍບໍ່ປະຖິ້ມຜູ້ໃດຢູ່ເບື້ອງຫຼັງ. ເຊິ່ງວຽກງານເຫຼົ່ານີ້ຕ້ອງມີຂໍ້ມູນ ແລະ ຫຼັກຖານທີ່ໜັກແໜ້ນ, ເຮັດວຽກໂດຍເນັ້ນໃສ່ຜົນໄດ້ຮັບເປັນຫລັກ, ມີການເຊື່ອມສານລະຫວ່າງຜູ້ຈັດຕັ້ງປະຕິບັດ ແລະເອົາປະຊາຊົນເປັນໃຈກາງ."

ອີງໃສ່ບົດຮຽນທີ່ຖອດຖອນໄດ້, ບັນດາຄູ່ຮ່ວມມືໄດ້ປຶກສາຫາລືກ່ຽວກັບແນວທາງຍຸດທະສາດເພື່ອເຂົ້າເຖິງຜູ້ທີ່ຢູ່ຫ່າງໄກທີ່ສຸດ, ໝູນໃຊ້ນະວັດຕະກໍາ ແລະ ຄວາມເປັນເຈົ້າການໃນຂັ້ນແຂວງ, ການຫັນເປັນດິຈິຕ້ອນໃນດ້ານການເກັບກໍາຂໍ້ມູນ, ການໃຫ້ຄໍາປຶກສາດ້ານສຸຂະພາບທາງໄກ, ການລົງເຜີຍແຜ່, ແລະສ້າງໂຄງການທີ່ເລັງໃສ່ຊຸມຊົນ, ພ້ອມທັງເຮັດວຽກຢ່າງໃກ້ຊິດກັບບັນດາແຂວງໃນການອອກແບບ ແລະ ການຈັດຕັ້ງປະຕິບັດໂຄງການ.

ແນວທາງການເອົາປະຊາຊົນເປັນໃຈກາງ, ກ້າວເດີນໄປພ້ອມກັນໂດຍບໍ່ປະຖິ້ມຜູ້ໃດຢູ່ເບື້ອງຫຼັງ ແມ່ນໝາກຫົວໃຈສໍາຄັນຂອງການສ້າງກິດຈະກໍາ, ເນັ້ນໜັກເຖິງຄວາມມານະພະຍາຍາມອັນຈຳເປັນຂອງການຄຸ້ມຄອງຂໍ້ມູນທີ່ເຂັ້ມແຂງ ແລະ ລະບົບການຄຸ້ມຄອງທີ່ຖືເອົາຜົນໄດ້ຮັບເປັນຫລັກ, ລວມໄປເຖິງ ກົນໄກການຕິດຕາມ ແລະ ປະເມີນຜົນທີ່ດີ. ຜົນສຳເລັດຂອງກອງປະຊຸມປະຈຳປີນີ້ ໄດ້ຍົກລະດັບໃຫ້ການຈັດຕັ້ງປະຕິບັດ ແລະ ການປະສານງານຂອງແຜນງານຂຶ້ນໄປອີກລະດັບໜຶ່ງ.
ອົງການ UNFPA ແລະລັດຖະບານ ສປປ ລາວຂໍສະແດງຄວາມຂອບໃຈຢ່າງຈິງໃຈຕໍ່ຜູ້ໃຫ້ທຶນຫຼັກຂອງແຜນດຳເນີນງານຂອງກອງປະຊຸມ ICPD ກໍ່ຄື: ລັດຖະບານ ຍີ່ປຸ່ນ, ອົດສະຕຣາລີ, ລຸກຊໍາບວກ, ອົງການ KOICA ແລະ ອົງການ USAID ທີ່ໃຫ້ການສະໜັບສະໜູນທີ່ສອດຄ່ອງກັບ ແຜນພັດທະນາເສດຖະກິດ-ສັງຄົມແຫ່ງຊາດລາວ ແລະວາລະ 2030 ເພື່ອການພັດທະນາແບບຍືນຍົງ.
**END**
ນັບຕັ້ງແຕ່ປີ 1976 ເປັນຕົ້ນມາ, ອົງການ UNFPA ໄດ້ສືບຕໍ່ສະໜັບສະໜູນລັດຖະບານ ແຫ່ງ ສປປ ລາວ ໃຫ້ສາມາດບັນລຸການເຂົ້າເຖິງດ້ານສຸຂະພາບທາງເພດ ແລະການຈະເລີນພັນລວມທັງການເຂົ້າເຖິງສິດທິຂອງທຸກຄົນ. UNFPA ຈະສືບຕໍ່ຮ່ວມມື ແລະປະສານງານກັບລັດຖະບານເພື່ອເລັ່ງລັດການຈັດຕັ້ງປະຕິບັດ ICPD PoA ໃນສາມເປົ້າໝາຍສໍາຄັນຄື: ອັດຕາການເສຍຊີວິດຂອງແມ່ທີ່ສາມາດປ້ອງກັນໄດ້ໃຫ້ເປັນສູນ, ບໍ່ມີຄວາມຮຸນແຮງບົນພື້ນຖານທາງເພດ ແລະ ສາມາດເຂົ້າເຖິງການວາງແຜນຄອບຄົວ. ອີງຕາມແຜນຍຸດທະສາດຂອງ UNFPA, ກອບການຮ່ວມມືແບບຮອບວຽນທຸກໆ 5 ປີ ໄດ້ຖືກນຳໃຊ້ເປັນບ່ອນອີງໃນການສະໜັບສະໜູນລັດຖະບານໃຫ້ສາມາດປະຕິບັດຄຳໝັ້ນສັນຍາຕໍ່ ICPD25, ບັນລຸແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 9 ປີ 2021-2025 ແລະຂອບການຮ່ວມມືການພັດທະນາແບບຍືນຍົງຂອງອົງການສະຫະປະຊາຊາດ ( UNSDCF).

แชร์