ລັດຖະມົນຕີກະຊວງກະສິກໍາ ຢ້ຽມຢາມສະຫະກອນສົ່ງເສີມກະສິກໍາ ເມືອງຫົງສາ

ໃນວັນທີ 19 ທັນວາ 2023, ທ່ານ ປອ ເພັດ ພົມພິພັກ ລັດຖະມົນຕີກະຊວງກະສິກໍາ ແລະປ່າໄມ້ ແລະທ່ານ ຄໍາຫຼ້າ ຜິວວັນນາ ເລຂາພັກເມືອງເຈົ້າເມືອງຫົງສາ ພ້ອມດ້ວຍຄະນະໄດ້ເຂົ້າຢ້ຽມຢາມສະຫະກອນສົ່ງເສີມກະສິກໍາ ເມືອງຫົງສາ ທີ່ຫ້ອງການພາກສະໜາມພະແນກພັດທະນາສັງຄົມບໍລິສັດໄຟຟ້າຫົງສາ ຈຳກັດ ບ້ານນໍາແກ່ນຄໍາ ເມືອງຫົງສາ ແຂວງໄຊຍະບູລີ ໂດຍໃຫ້ການຕ້ອນຮັບມີທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ, ທ່ານ ຍຸດທະນາ ຈຸນພັນທອງ ຜູ້ອໍານວຍການຝ່າຍສື່ສານອົງກອນ ບໍລິສັດ ໄຟຟ້າ ຫົງສາ ຈໍາກັດ ພ້ອມດ້ວຍທີມງານ ພະແນກພັດທະນາສັງຄົມຝ່າຍສື່ສານອົງກອນ.

ຈຸດປະສົງກໍເພື່ອຮັບຊາບເຖິງການດໍາເນີນງານຂອງພະແນກພັດທະນາສັງຄົມ ແລະວຽກງານສະຫະກແນໃນປັດຈຸບັນທີ່ເປັນສ່ວນງານສໍາຄັນໃນການຊ່ວຍສົ່ງເສີມ, ພັດທະນາເສດຖະກິດ ແລະພັດທະນາອາຊີບໃຫ້ກັບປະຊາຊົນພາຍໃນທ້ອງຖິ່ນໃຫ້ມີຄວາມເປັນຢູ່ທີ່ດີຂຶ້ນພາຍໃຕ້ການສະໜັບສະໜຸນຂອງໂຄງການໂຮງໄຟຟ້າພະລັງງານຄວາມຮ້ອນຫົງສາສືບຕໍ່ໄປ.

ໂອກາດດັ່ງກ່າວທ່ານລັດຖະມົນຕີກະຊວງກະສິກໍາ ແລະປ່າໄມ້ພ້ອມຄະນະໄດ້ຮັບຟັງການລາຍງານສະພາບລວມຂອງການຈັດຕັ້ງປະຕິບັດຂອງສະຫະກອນສົ່ງເສີມກະສິກຳເຊິ່ງສະຫະກອນດັ່ງກ່າວແຕ່ກ່ອນໄດ້ຈັດຕັ້ງຕາມກຸ່ມອາຊີບ ໃນປີ 2015 (ຮູບແບບສະຫະກອນ), ປະກອບມີ 10 ກຸ່ມອາຊີບຄື: ກຸ່ມຜະລິດກະສິກຳ 3 ກຸ່ມ, ກຸ່ມປຸງແຕ່ງຜົນຜະລິດກະສິກໍາ 2 ກຸ່ມ, ຕັດຫຍິບ 2 ກຸ່ມ, ລ້ຽງສັດ 2 ກຸ່ມ, ຫັດຖະກໍາຈັກສານ 1 ກຸ່ມ ແລະຮວບ ຮວມຜົນຜະລິດ 1 ກຸ່ມ. ມີສະມາຊິກທັງ ໝົດ 96 ຄອບຄົວ, ໂດຍໄດ້ຮັບທຶນສະໜັບສະໜູນຈາກບໍລິສັດ ໄຟຟ້າຫົງສາ ຈໍາກັດ. ປີ 2018 ໄດ້ຈັດຕັ້ງເປັນສະຫະກອນສົ່ງເສີມກະສິກຳເມືອງຫົງສາ ຢ່າງເປັນທາງການ, ໂດຍມີສະມາຊິກທັງໝົດ 137 ຄອບຄົວ, ໃນນັ້ນມີຄະນະບໍລິຫານ 7 ທ່ານ ແລະກວດກາ 3 ທ່ານ. ມາຮອດປະຈຸບັນມີ 11 ກຸ່ມ (ເພີ່ມໃໝ່ກຸ່ມລ້ຽງເຜີ້ງ), ມີສະມາຊິກທັງ ໝົດ 145 ຄອບຄົວ.

ຜ່ານການຈັດຕັ້ງປະຕິບັດເຫັນໄດ້ວ່າ: ຜົນຜະລິດ ແລະຜະລິດຕະພັນຂອງສະຫະກອນແມ່ນມີຄຸນນະພາບ ແລະເປັນສິນຄ້າປອດສານພິດເຮັດໃຫ້ເປັນທີ່ຍອມຮັບຂອງສັງຄົມ.

แชร์