ເປີດນໍາໃຊ້ຮູບຈໍາລອງແຄນລາວ ຢູ່ເມືອງໃໝ່

ພິທີເປີດນໍາໃຊ້ຮູບຈໍາລອງແຄນລາວ ທີ່ເທສະບານເມືອງໃໝ່ ແຂວງຜົ້ງສາລີ ຈັດຂຶ້ນໃນວັນທີ 19 ທັນວາ 2023 ຜ່ານມາໂດຍມີທ່ານ ອາລຸນໄຊ ສູນນະລາດລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ທ່ານ ສອນສະໜຸກ ສີສຸລາດ ເຈົ້າເມືອງໆໃໝ່, ທ່ານ ອາຈົ່ງ ຮອງປະທານບໍລິສັດຊິໂນອາກຣີ ຈຳກັດ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ສອນສະໜຸກ ສີສຸລາດ ເຈົ້າເມືອງໆໃໝ່ ໄດ້ລາຍໃຫ້ຮູ້ວ່າ: ແຄນ ແມ່ນເຄື່ອງດົນຕີປະເພດເປົ່າຊະນິດໜຶ່ງ ຂອງຄົນລາວ, ມີປະຫວັດຄວາມເປັນມາຄຽງຄູ່ຊາດລາວເຮົາ ເປັນເວລາຫລາຍພັນປີສາມາດເວົ້າໄດ້ວ່າ ແຄນ ເປັນສ່ວນໜຶ່ງທີ່ສໍາຄັນທີ່ສຸດ ໃນການດຳລົງຊີວິດຂອງປະຊາຊົນລາວບັນດາເຜົ່າ; ສຽງແຄນລາວເປັນມໍລະດົກທາງວັດທະນາທຳຂອງຄົນລາວເຊິ່ງໄດ້ຖືກຮັບຮອງເປັນມໍລະດົກໂລກຈາກອົງການສຶກສາວິທະຍາສາດ ແລະວັດທະນາທຳ ແຫ່ງສະຫະປະຊາຊາດ ໃນວັນທີ 7 ທັນວາ 2017 ທີ່ເກາະເຊຈຸ, ສ ເກົາຫລີ. ສຳລັບການສ້າງແຄນລາວຢູ່ເມືອງໃໝ່ ແມ່ນໄດ້ຮັບການເຫັນດີຈາກ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຜົ້ງສາລີ, ເປັນແນວຄິດລິເລີ່ມຂອງ ທ່ານ ອາລຸນໄຊ ສູນນະລາດ ແລະນຳພາປະຕິບັດໂດຍທ່ານເຈົ້າເມືອງໆໃໝ່ພ້ອມດ້ວຍການນຳຂອງເມືອງ ສະໄໝທີ XIV ເຊິ່ງອອກແບບການກໍ່ສ້າງໂດຍທ່ານ ຄໍາແພງ ໄຊຍະສານ ຮອງຫົວໜ້າຫ້ອງການ ຖວທ ເມືອງ, ໄດ້ເລີ່ມກໍ່ສ້າງໃນວັນທີ 28 ກັນຍາ ແລະສຳເລັດໃນວັນທີ 19 ຕຸລາ 2023, ມີມູນຄ່າການກໍ່ສ້າງ 21 ລ້ານກ່ວາກີບ ໂດຍການລະດົມທຶນຂອງທ່ານລັດຖະມົນຕີ, ຫົວໜ້າ ຫສນຍ ແລະໄດ້ຮັບການສະໜັບສະໜູນທຶນຈາກບໍລິສັດ ຊີໂນ ອາກຣີ ຈຳກັດ.

ໂອກາດນີ້, ທ່ານ ອາລຸນໄຊ ສູນນະລາດ ກໍໄດ້ມີຄຳເຫັນຕໍ່ພິທີໂດຍໄດ້ແຈ້ງໃຫ້ຊາບກ່ຽວກັບຈຸດປະສົງຂອງການເຄື່ອນໄຫວເຮັດວຽກຢູ່ແຂວງຜົ້ງສາລີກໍຄືເມືອງໃໝ່ໃນຄັ້ງນີ້ ໂດຍສະເພາະເພື່ອຊຸກຍູ້ການພັດທະນາເສດຖະກິດ-ສັງຄົມຂອງແຂວງ, ຂອງເມືອງ ຕິດພັນກັບການແກ້ໄຂຄວາມ ທຸກຍາກຂອງປະຊາຊົນ ແລະເສີມຂະຫຍາຍມູນເຊື້ອອັນດີງາມຂອງເມືອງທີ່ເປັນພື້ນຖານການປະຕິວັດຂອງ ສປປ ລາວ ເຂົ້າໃນການພັດທະນາ, ລວມທັງແນວຄິດ ແລະຄວາມເປັນມາ ໃນການກໍ່ສ້າງຮູບຈຳລອງແຄນລາວ ຢູ່ເທສະບານເມືອງໃໝ່. ພ້ອມນີ້, ທ່ານໄດ້ສະເໜີການນຳຫລັກແຫລ່ງ ແລະ ພາກສ່ວນກ່ຽວຂ້ອງຂອງເມືອງພິຈາລະນາຕື່ມບາງດ້ານເປັນຕົ້ນສືບຕໍ່ເສີມຂະຫຍາຍມູນເຊື້ອອັນດີງາມຂອງທ້ອງຖິ່ນ ໂດຍສະເພາະ ມູນເຊື້ອປະຕິວັດ, ມູນເຊື້ອວິລະຊົນຄົນອາດຫານ, ມູນເຊື້ອຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນ ເຂົ້າໃນການພັດທະນາເສດຖະກິດ-ສັງຄົມຂອງເມືອງ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມຶ້ດີຂຶ້ນເປັນກ້າວໆ.

ໃນໂອກາດເຄື່ອນໄຫວຢ້ຽມຢາມ ແລະເຮັດວຽກຢູ່ເມືອງໃໝ່ຄັ້ງນີ້, ທ່ານລັດຖະມົນຕີ, ຫົວໜ້າ ຫສນຍ ຍັງໄດ້ເປັນສັກຂີພິຍານໃນພິທີການມອບ-ຮັບເງິນສົມທົບ ເພື່ອກໍ່ສ້າງໂຮງຮຽນຢູ່ກຸ່ມບ້ານສະຫລວງ(ຫ່າງຈາກເທສະບານເມືອງໃໝ່ 90 ກວ່າກິໂລແມັດ) ມູນຄ່າ 497 ລ້ານກີບ ເຊິ່ງກ່າວມອບໂດຍ ທ່ານ ອາຈົ່ງ ຮອງປະທານບໍລິສັດ ຊິໂນ ອາກຣີ ຈຳກັດ ແລະກ່າວຮັບໂດຍ ທ່ານ ສອນສະໜຸກ ສີສຸລາດເຈົ້າເມືອງໆໃໝ່. ພ້ອມນີ້, ຍັງໄດ້ມອບເຄື່ອງນຸ່ງຫົ່ມກັນໜາວ ໃຫ້ປະຊາຊົນບ້ານຊ່າງແຄນ ແລະ ໄດ້ໄປເບິ່ງສະຖານທີ່ດຳເນີນກອງປະຊຸມໃຫຍ່ຄັ້ງທີ II ຂອງອົງຄະນະພັກແຂວງຜົ້ງສາລີ ທີ່ໄດ້ຈັດຂຶ້ນໃນເດືອນສິງຫາ 1971 ທີ່ບ້ານຫ້ວຍອຸ່ນ ເພື່ອເປັນຂໍ້ມູນຄົ້ນຄວ້າ ສ້າງຂະບວນການ ຫລືກິດຈະກຳກ່ຽວກັບການຫວນຄືນມູນເຊື້ອປະຫວັດສາດຂອງສະຖານທີ່ ແລະເນື້ອໃນທີ່ປະທານ ໄກສອນ ພົມວິຫານ ໄດ້ເຂົ້າຮ່ວມຊີ້ນຳກອງປະຊຸມຄັ້ງດັ່ງກ່າວຕາມຄວາມເໝາະສົມຕື່ມອີກ.
ຂ່າວ-ພາບ: ກົມປະຊາສຳພັນ ຫສນຍ

แชร์