ຄວາມຄືບໜ້າໂຄງການກະສິກຳສະອາດ ບ້ານນໍ້າຍອນ ຂອງບໍລິສັດ ພູເບ້ຍ ມາຍນິງ

ໂຄງການກະສິກຳສະອາດ ໃນຂອບເຂດບ້ານນໍ້າຍອນ ເມືອງອານຸວົງ ແຂວງໄຊສົມບູນ, ເປັນໂຄງການໃຫຍ່ ແລະສໍາຄັນອີກໜຶ່ງໂຄງການ ທີ່ບໍລິສັດ ພູເບ້ຍ ມາຍນິງ ຈໍາກັດ ໄດ້ສຸມໃສ່ຈັດຕັ້ງປະຕິບັດແນໃສ່ປະກອບສ່ວນພັດທະນາຊົນນະບົດ ແລະແກ້ຄວາມທຸກຍາກຂອງປະຊາຊົນຊຶ່ງມາຮອດປະຈຸບັນໂຄງການດັ່ງກ່າວແມ່ນມີຄວາມຄືບໜ້າຫຼາຍພໍສົມຄວນ.

ທ່ານ ອິນປອນ ເທບເພັດລືສີ ຮອງຜູ້ຈັດການພະແນກພັດທະນາຊຸມຊົນຂອງບໍລິສັດ ພູເບ້ຍ ມາຍນິງ ຈໍາກັດ ໃຫ້ຮູ້ວ່າ: ໂຄງການກະສິກຳສະອາດເປັນໂຄງການໃຫຍ່ຂອງແຂວງ, ເມືອງ ແລະບໍລິສັດ ທີ່ເຮັດວຽກຮ່ວມກັນ ຊຶ່ງໂຄງການໄດ້ຈັດສັນກິດຈະກໍາໃນການປູກຝັງ-ລ້ຽງສັດ ໂດຍແບ່ງອອກເປັນ 2 ພາກສ່ວນຄື: ພາກສ່ວນດ້ານເທິງມີປະມານ 12 ກວ່າເຮັກຕາ ໃຊ້ເປັນພື້ນທີ່ປູກຫຍ້າລ້ຽງງົວ ໃຫ້ແກ່ການທອມງົວ ໂດຍຈະຈັດສັນໃຫ້ 20 ຄອບຄົວ ແລະພາກສ່ວນດ້ານລຸ່ມມີເນື້ອທີ່ປະມານ 13 ກວ່າເຮັກຕາ ຈະນໍາໃຊ້ເຂົ້າໃນການປູກພືດຜັກກະສິກຳສະອາດ ຈະຈັດສັນໃຫ້ປະມານ 50 ຄອບຄົວ. ປະຈຸບັນ, ໂຄງການໄດ້ເຮັດສຳເລັດວຽກກວດກູ້ລະເບີດໃນພື້ນທີ່ໂຄງການ, ສຳເລັດການບຸກເບີກໜ້າດິນກະກຽມແກ່ການຈັດສັນໃຫ້ປະຊາຊົນ ຄອບຄົວທີ່ຜ່ານການຄັດເລືອກເຂົ້າຮ່ວມໂຄງການ. ພ້ອມນີ້, ກໍກຳລັງສືບຕໍ່ສຸ່ມໃສ່ກໍ່ສ້າງລະບົບຊົນລະປະທານປະກອບມີ 8 ແທ່ງນໍ້າ ເຂົ້າມາໃຫ້ສຳເລັດ, ກໍ່ສ້າງລະບົບໄຟຟ້າ ແລະສືບຕໍ່ຈັດສັນດິນໃຫ້ຄອບຄົວທີ່ຮ່ວມໂຄງການ.

ນອກຈາກນີ້, ບໍລິສັດ ຍັງໄດ້ຄົ້ນຄວ້າ ການສ້າງຄູກັນນໍ້າເພື່ອບໍ່ໃຫ້ພື້ນທີ່ໂຄງການຖືກເຊາະເຈື່ອນຈາກນໍ້າທີ່ໄຫຼຈາກນໍ້າຫ້ວຍທີ່ໃກ້ຄຽງ; ສ່ວນພື້ນທີ່ໃດໃນໂຄງການທີ່ເປັນຫີນກໍຈະປັບປຸງປົວແປງໃຫ້ສາມາດເຮັດການຜະລິດໄດ້ຊຶ່ງຄາດວ່າຮອດໄຕມາດ 3 ຂອງປີ 2024 ຈະມີຄວາມຄືບໜ້າ ທີ່ເປັນໃບໜ້າໃໝ່ເກີດຂຶ້ນເນື່ອງຈາກປະຈຸບັນແຂວງ ແລະເມືອງກໍໄດ້ຄັດເລືອກສຳເລັດຊຶ່ງພື້ນທີ່ປູກຫຍ້າທອມສັດ ມີແລ້ວ 20 ຄອບຄົວ ແລະພື້ນທີ່ປູກຜັກປະສິກຳສະອາດເປັນສິນຄ້າກໍຄັດເລືອກໄດ້ແລ້ວ 30 ກວ່າຄອບຄົວ, ຍັງເຫຼືອປານ 10 ກວ່າຄອບຄົວ.

ທ່ານ ສຸລິ ສີສຸພັນທອງ ຜູ້ຈັດການພະແນກພື້ນຟູຊີວິດການເປັນຢູ່ ໄດ້ໃຫ້ຮູ້ວ່າ: ການຈັດສັນດິນເພື່ອໃຫ້ຄອບຄົວທີ່ຜ່ານການຄັດເລືອກເຂົ້າມາເຮັດການຜະລິດກະສິກຳ ແມ່ນໄດ້ມີຄວາມຄືບໜ້າດີສົມຄວນຊຶ່ງປະຈຸບັນໃນພື້ນທີ່ສ່ວນເທິງທີ່ຈະປູກຫຍ້າທອມງົວແມ່ນໄດ້ສຳເລັດໂດຍພື້ນຖານ ຄົບຈໍານວນ 20 ຄອບຄົວ ໂດຍກຳລັງດຳເນີນການຈັດສັນໃຫ້ຄອບຄົວລະ 4 ໄລ່. ສ່ວນດ້ານລະບົບນໍ້າກໍາລັງດຳເນີນຕາມແຜນການຊຶ່ງຈະແຈກຜ່ານທໍ່ນໍ້າຮູບແບບລະບົບສະປຣິງເກີ ໃຫ້ແຕ່ລະຄອບຄົວ ແລະກໍ່ສ້າງຄອກລ້ຽງສັດ ໃຫ້ຄອບຄົວລະ 1 ຄອກ ໃນຂະໜາດປະມານ 4 x 8 ແມັດ. ພ້ອມທັງກຳລັງດຳເນີນການປຸກເຮືອນຮົ່ມຖາວອນ ທີ່ເປັນເສົາຊີມັງ ແລະໂຄງເຫຼັກມູນຄ່າ 500 ກວ່າລ້ານກີບ ມີທັງໝົດ 15 ຫຼັງ ຊຶ່ງຈະມອບໃຫ້ຄອບຄົວທີ່ຖືກຄັດເລືອກມາເຮັດການຜະລິດ ປູກຜັກສະອາດ ເປັນສິນຄ້າ. ສ່ວນຕະຫຼາດເກັບຊື້ຜົນຜະລິດກະສິກຳຂອງປະຊາຊົນ ແມ່ນພູເບ້ຍ ມາຍນິງ ຍັງສືບຕໍ່ເປັນຕະຫຼາດຫຼັກ ໂດຍມີສັດສ່ວນເຖິງ 90% ໃນລາຄາກາງຕາມທ້ອງຕະຫຼາດ ແລະປະຊາຊົນຍັງກໍສາມາດນໍາໄປຂາຍຕາມທ້ອງຕະຫຼາດທົ່ວໄປໄດ້.

ນອກຈາກນີ້ບໍລິສັດ ພູເບ້ຍ ມາຍນິງ ແລະອົງການປົກຄອງແຂວງໄຊສົມບູນ ຍັງໄດ້ປຶກສາຫາລືກັບ ບໍລິສັດລາວຟູ໊ດ ເພື່ອໃຫ້ບໍລິສັດດັ່ງກ່າວມາມີສ່ວນຮ່ວມສົ່ງເສີມການຜະລິດ ແລະກາຍເປັນຕະຫຼາດຫຼັກໃນອະນາຄົດຊຶ່ງລາວຟູ໊ດກໍມີເຫັນດີ ແລະພ້ອມຈະນໍາເອົາແນວພັນ ແລະວິຊາການມາຊ່ວຍຕື່ມເພື່ອໃນອະນາຄົດເມື່ອພູເບ້ຍ ມາຍນິງ ປິດບໍ່ລົງ, ລາວຟູ໊ດ ຈະເປັນຕະຫຼາດຫຼັກເພື່ອໃຫ້ລາຍຮັບຂອງປະຊາຊົນຄົງທີ່ ແລະມີຄວາມຍືນຍົງ.

แชร์