ສະພາແຫ່ງຊາດ ແລະສະພາປະຊາຊົນແຂວງ ສະຫຼຸບວຽກງານກາງສະໄໝ

ກອງປະຊຸມສະຫຼຸບຖອດຖອນບົດຮຽນການເຄື່ອນໄຫວວຽກງານຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໄລຍະກາງສະໄໝ ຂອງແຜນການ 5 ປີ (2021-2025), ໄດ້ຈັດຂຶ້ນໃນວັນທີ 21 ທັນວາ 2023 ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີພົນເອກຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີບັນດາທ່ານຮອງປະທານສະພາແຫ່ງຊາດ, ກໍາມະການຄະນະປະຈໍາສະພາແຫ່ງຊາດ, ມີບັນດາລັດຖະມົນຕີ, ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ໄຊສົມພອນ ພົມວິຫານ ກ່າວວ່າ: ກອງປະຊຸມຄັ້ງນີ້ຈຸດປະສົງຕົ້ນຕໍແມ່ນເພື່ອສະຫຼຸບຕີລາຄາຖອດຖອນບົດຮຽນການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄລຍະກາງສະໄໝ ຊຶ່ງຈະໄດ້ຍົກໃຫ້ເຫັນດ້ານດີ ເພື່ອເສີມຂະຫຍາຍ, ຕີລາຄາຢ່າງກົງໄປກົງມາ ດ້ານອ່ອນຄົງຄ້າງ ທີ່ຈະຕ້ອງສືບຕໍ່ປັບປຸງແກ້ໄຂ. ກອງປະຊຸມຈະໄດ້ຮັບຟັງ, ປຶກສາຫາລື ແລະ ປ່ຽນບົດຮຽນນໍາກັນຕໍ່ບັນດາເນື້ອໃນສຳຄັນ ຄື: 1. ບົດລາຍງານຂອງຄະນະປະຈຳສະພາແຫ່ງຊາດ ກ່ຽວກັບການເຄື່ອນໄຫວວຽກງານ ຂອງສະພາແຫ່ງຊາດ ຊຸດທີ IX ແລະສະພາປະຊາຊົນຂັ້ນແຂວງ ຊຸດທີ II ໄລຍະກາງສະໄໝ (2021-2023) ແລະ ທິດທາງແຜນການເຄື່ອນໄຫວວຽກງານທ້າຍສະໄໝ (2023-2025); 2. ການປະກອບຄຳເຫັນໃນຫົວຂໍ້ຕ່າງໆ ຂອງບັນດາກຳມາທິການສະພາແຫ່ງຊາດ ແລະ ຄະນະປະຈຳສະພາປະຊາຊົນຂັ້ນແຂວງ ຈຳນວນ 8 ຫົວຂໍ້, ໃນນີ້ ສະພາແຫ່ງຊາດ ປະກອບມີ 4 ຫົວຂໍ້ ຄື: ການຍົກສູງຄຸນນະພາບໃນການສ້າງ ແລະ ປັບປຸງກົດໝາຍ; ປະສິດທິຜົນການຮັບຮອງ ແລະ ການຈັດຕັ້ງປະຕິບັດ ບັນຫາສໍາຄັນພື້ນຖານຂອງຊາດ; ເພີ່ມທະວີວຽກງານຕິດຕາມກວດກາຂອງສະພາແຫ່ງຊາດ ແລະສະພາປະຊາຊົນຂັ້ນແຂວງເພື່ອຮັບປະກັນການຄຸ້ມຄອງລັດຢ່າງມີປະສິດທິຜົນ ແລະການພິຈາລະແກ້ໄຂຄຳຮ້ອງຂໍຄວາມເປັນທຳຂອງສະພາແຫ່ງຊາດ.

ສຳລັບສະພາປະຊາຊົນຂັ້ນແຂວງຈະມີບົດປະກອບຄໍາເຫັນ 4 ຫົວຂໍ້ຄື: ການສ້າງ ແລະ ປັບປຸງນິຕິກໍາທີ່ສຳຄັນຂອງທ້ອງຖິ່ນເພື່ອຮັບປະກັນທັງປະລິມານ ແລະຄຸນນະພາບຈະຊ່ວຍເປັນເຄື່ອງມືສຳຄັນແກ່ການພັດທະນາເສດຖະກິດ-ສັງຄົມຂອງທ້ອງຖິ່ນໃຫ້ເຂັ້ມແຂງ; ປະສິດທິຜົນການຮັບຮອງ ແລະ ຈັດຕັ້ງປະຕິບັດບັນຫາສໍາຄັນພື້ນຖານຂອງທ້ອງຖິ່ນ; ການຕິດຕາມກວດກາຂອງສະພາປະຊາຊົນແຂວງມີຄວາມເຂັ້ມແຂງຈະຊ່ວຍໃຫ້ການພັດທະນາທ້ອງຖິ່ນມີປະສິດທິຜົນ ແລະການພົບປະປະຊາຊົນຂອງສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງເປັນການປະກອບສ່ວນປັບປຸງວຽກງານການເມືອງຢູ່ຂັ້ນຮາກຖານ.

ທ່ານປະທານສະພາແຫ່ງຊາດ ຍັງຮຽກຮ້ອງໃຫ້ທຸກທ່ານໄດ້ເອົາໃຈໃສ່ຄົ້ນຄວ້າ ແລະເປັນເຈົ້າການປະກອບຄວາມຄິດຄວາມເຫັນຕໍ່ແຕ່ລະເນື້ອໃນຢ່າງກົງໄປກົງມາ, ມີເຫດມີຜົນ, ຖືກກັບສະພາບຕົວຈິງບົນພື້ນຖານແນວທາງປ່ຽນແປງໃໝ່ຂອງພັກ, ລັດຖະທຳມະນູນ, ກົດໝາຍຂອງລັດ, ພ້ອມທັງພ້ອມກັນຊອກຫາວິທີການ, ມາດຕະການແກ້ໄຂບັນດາບັນຫາທີ່ຍັງເປັນຄວາມບົກຜ່ອງ, ມີຄວາມຫຍຸ້ງຍາກອຸດຕັນເພື່ອເຮັດແນວໃດໃຫ້ການຈັດຕັ້ງປະຕິບັດບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ກໍຄືບັນດາອົງການລັດທຸກຂັ້ນ ມີຄວາມຖືກຕ້ອງຕາມລັດຖະທຳມະນູນ ແລະກົດໝາຍຮ່ວມກັບລັດຖະບານ ແລະອົງການຕ່າງໆ ທັງຢູ່ສູນກາງ ແລະທ້ອງຖິ່ນເພື່ອນໍາພາປະເທດພວກເຮົາຈະເລີນກ້າວໜ້າຍິ່ງຂຶ້ນ, ນຳເອົາປະເທດຫຼຸດພົ້ນອອກຈາກຄວາມຫຍຸ້ງຍາກທີ່ພວມປະເຊີນໃນປະຈຸບັນ.

แชร์