ທຫລ ຮ່ວມກັບ ນວ ເຜີຍແຜ່ການຈັດຕັ້ງປະຕິບັດນິຕິກຳຄຸ້ມຄອງເງິນຕາຕ່າງປະເທດ

ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ (ທຫລ) ຮ່ວມກັບ ອົງການປົກຄອງນະຄອນຫຼວງວຽງຈັນ (ນວ) ຈັດກອງປະຊຸມເຜີຍແຜ່ກ່ຽວກັບການຈັດຕັ້ງປະຕິບັດນິຕິກຳຄຸ້ມຄອງເງິນຕາຕ່າງປະເທດຂັ້ນນະຄອນຫຼວງວຽງຈັນ ຂຶ້ນໃນວັນທີ 20 ທັນວາ 2023 ນີ້ ທີ່ຫ້ອງວ່າການນະຄອນຫຼວງວຽງຈັນ ໂດຍການເປັນປະທານຂອງທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ມີຫົວໜ້າກົມຮອງກົມຈາກກົມຄຸ້ມຄອງເງິນຕາຕ່າງປະເທດ ທຫລ ແລະກົມການຄ້າພາຍໃນ ກະຊວງອຸດສາຫະກຳ ແລະການຄ້າພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.

ທ່ານຮອງເຈົ້າຄອງນະຄອນຫຼວງ ກ່າວວ່າ: ວຽກງານໃນຂົງເຂດຄຸ້ມຄອງເງິນຕາຕ່າງປະເທດຖືວ່າມີຫຼາຍບັນຫາທີ່ທ້າທາຍຫຼາຍສົມຄວນເປັນຕົ້ນ ການນຳໃຊ້ເງິນຕາຕ່າງປະເທດຢູ່ພາຍໃນ,ການຄຸ້ມຄອງເງິນຕາຕ່າງປະເທດດ້ານການຄ້າ, ການລົງທຶນ, ໜີ້ສິນຕ່າງປະເທດ ແລະການບໍລິການເງິນຕາຕ່າງປະເທດທີ່ບໍ່ໄດ້ຮັບອະນຸຍາດ, ໃນໄລຍະຜ່ານມາ ທຫລ ໄດ້ມີການຄົ້ນຄວ້າປັບປຸງກົນໄກໃນການຄຸ້ມຄອງເງິນຕາຕ່າງປະເທດໃນນັ້ນໄດ້ມີການປັບປຸງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດສຳເລັດໃນປີ 2022, ຫຼັງຈາກນັ້ນ ທຫລ ກໍສຸມໃສ່ຄົ້ນຄວ້າເພື່ອຜັນຂະຫຍາຍເປັນນິຕິກໍາລຸ່ມກົດໝາຍດັ່ງກ່າວເພື່ອເຮັດໃຫ້ການຈັດຕັ້ງປະຕິບັດກົດໝາຍມີປະສິດທິພາບຍິ່ງຂຶ້ນ ປະຈຸບັນພວມຢູ່ໃນຂັ້ນຕອນການຄົ້ນຄວ້າຮ່າງນິຕິກຳ 20 ສະບັບ ໃນນັ້ນຄຳສັ່ງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ສະບັບເລກທີ 10/ນຍ ລົງວັນທີ 14 ກໍລະກົດ 2023 ແມ່ນເປັນໜຶ່ງໃນນິຕິກໍາທີ່ຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ຊຶ່ງໄດ້ມີການກໍານົດລະອຽດຕໍ່ກັບທິດທາງການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດຂອງບັນດາກະຊວງອົງການສັງຄົມໃຫ້ມີຄວາມເປັນເອກະພາບເພື່ອຮັບປະກັນໃຫ້ການເຄື່ອນໄຫວເງິນຕາຕ່າງປະເທດສອດຄ່ອງຕາມກົດໝາຍ ແລະລະບຽບການກ່ຽວຂ້ອງ.

ທ່ານ ພູວົງ ວົງຄຳຊາວ ກ່າວຕື່ມວ່າ: ຢູ່ນະຄອນຫຼວງວຽງຈັນ ປະຈຸບັນກຳລັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ IX ກາງສະໄໝ ພ້ອມທັງກຳລັງຂຸ້ນຂ້ຽວຈັດຕັ້ງປະຕິບັດການເກັບລາຍຮັບທ້າຍປີງົບປະມານ ປີ 2023 ໃນປີນີ້ ນວ ໄດ້ຄາດຄະເນຈະເກັບລາຍຮັບໃຫ້ບັນລຸ 7.431 ຕື້ກີບ ເທົ່າກັບ 127,78% ຂອງແຜນການປີ ຄາດຄະເນເປັນເງິນລື່ນແຜນ 1.615,43 ຕື້ກີບ ໃນນັ້ນລາຍຮັບພູດສູນກາງຄາດຄະເນສູ້ຊົນປະຕິບັດໝົດປີ 2023 ໃຫ້ໄດ້ 5.295,30 ຕື້ກີບ ເທົ່າກັບ 126,08% ຄາດຄະເນເປັນເງິນລື່ນ 1.095 ຕື້ກີບ, ລາຍຮັບທ້ອງຖິ່ນ ນວ ຄາດຄະເນສູ້ຊົນປະຕິບັດໝົດປີ 2023 ໃຫ້ໄດ້ 2.136 ຕື້ກີບ ເທົ່າກັບ 132,19% ຂອງແຜນການປີ, ຄາດຄະເນເປັນເງິນລື່ນແຜນ 520,13 ຕື້ກີບ.

ສໍາລັບເອກະສານທີ່ນຳມາເຜີຍແຜ່ໃນຄັ້ງນີ້ປະກອບມີ: ການເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ); ຄໍາສັ່ງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ; ຄໍາສັ່ງກ່ຽວກັບການຄຸ້ມຄອງ, ຕິດຕາມ ກວດກາ ການກຳນົດໂຄງປະກອບລາຄາ, ການຕິດປະກາດ ຫຼືການໂຄສະນາສິນຄ້າເປັນເງິນຕາຕ່າງປະເທດ. ພ້ອມນີ້ຜູ້ເຂົ້າຮ່ວມກອງປະຊຸມຍັງໄດ້ເອົາໃຈໃສ່ຕິດຕາມຄົ້ນຄວ້າປະກອບຄໍາຄິດຄໍາເຫັນຢ່າງກົງໄປກົງມາເພື່ອໃຫ້ການຈັດຕັ້ງປະຕິບັດຄໍາສັ່ງດັ່ງກ່າວໄດ້ຮັບຜົນສຳເລັດເປັນຢ່າງດີ.

แชร์