ເມືອງບົວລະພາ ກຽມພ້ອມ 6 ກິດຈະກຳຕ້ອນຮັບປີທ່ອງທ່ຽວລາວ 2024

ທ່ານ ບຸດດາ ໄຊຍະວົງ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ເມືອງບົວລະພາ ແຂວງຄໍາມ່ວນ ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ:ເມືອງບົວລະພາໄດ້ກຳນົດ 6 ກິດຈະກຳເພື່ອຮອງຮັບໃຫ້ແກ່ປີທ່ອງທ່ຽວລາວ 2024 ຄື: 1. ກິດຈະກຳການທ່ອງທ່ຽວຊົມຖໍ້າ ນໍ້າລອດເຊບັ້ງໄຟບ້ານໜອງປີງ ຊຶ່ງບັນດານັກທ່ອງທ່ຽວທີ່ເຂົ້າມາທ່ຽວຊົມສາມາດກາງເຕັ້ນນອນ ແລະຂີ່ເຮືອ ລອດຖໍ້າ, 2 ກິດຈະກຳຂີ່ເຮືອຈາກບ້ານປາກພະນັງຂຶ້ນມາຫາຖໍ້ານໍ້າລອດເຊບັ້ງໄຟ,3.ກິດຈະກຳທ່ຽວຊົມທຳມະຊາດ ນໍ້າຕົກຕາດ 2 ຊູ້ບ້ານໜອງບົວ, 4. ກິດຈະກຳທ່ຽວຊົມຖໍ້າຜາກູດ ແລະຊ່ອງກ້ອງເບິ່ງສັດທີ່ບ້ານໜອງແສງ, 5.

ກິດຈະກຳທ່ຽວຊົມຖໍ້ານົກແອ່ນ ແລະຖ້ານໍ້າອອກ ( ກາງເປນອນຄ້າງຄືນ ) ທີ່ບ້ານທົ່ງຊໍາ ແລະ 6. ກິດຈະກຳທ່ຽວ ຊົມຮ່ອງຮອຍສົງຄາມ ( ຊາກຍົນຕົກ, ລູກລະເບີດ ) ທີ່ບ້ານຜານົບ. ພິເສດຈະມີການເປີດແຫຼ່ງທ່ອງທ່ຽວໃໝ່ຄື: ຕາດສຽງລືເປັນແຫຼ່ງທ່ອງທ່ຽວໃນຮູບແບບການອະນຸລັກທຳມະຊາດທີ່ມີນໍ້າຕົກຕາດສວຍງາມ, ມີຕົ້ນໄມ້ໃຫຍ່, ສັດປ່າຫຼາຍຊະນິດທີ່ຍັງຄົງຄວາມອຸດົມສົມບູນຂອງທຳມະຊາດ. ຄາດວ່າໃນປີ 2024 ຈະມີນັກທ່ອງທ່ຽວເຂົ້າມາທ່ຽວເມືອງບົວລະພາບໍ່ຕໍ່າກວ່າ 3.000 ເທື່ອຄົນ.

ປັດຈຸບັນທົ່ວເມືອງບົວລະພາມີສະຖານທີ່ທ່ອງທ່ຽວທີ່ຂຶ້ນບັນຊີຂອງເມືອງທັງໝົດ 32 ແຫ່ງ, ໃນນັ້ນສະຖານທີ່ທ່ອງທ່ຽວທາງທຳມະຊາດ 25 ແຫ່ງ, ວັດທະນະທຳ 2 ແຫ່ງ ແລະທາງປະຫວັດສາດ 5 ແຫ່ງ, ມີ ເຮືອນພັກ 7 ແຫ່ງ, ລີສອດ 1 ແຫ່ງ ມີຫ້ອງນອນເພື່ອຮອງຮັບແຂກທັງໝົດ 140 ຫ້ອງ, ຕຽງຄູ່ 35 ຫ້ອງ, ຕຽງດ່ຽວ 105 ຫ້ອງ. ນອກນັ້ນຍັງມີຮ້ານອາຫານ 12 ຮ້ານ, ຮ້ານກິນດື່ມ 2 ຮ້ານ ແລະຮ້ານບັນເທີງ 2 ຮ້ານ.
ທີ່ມາ: ປະຊາຊົນ

แชร์