ເຊກອງ ກຳນົດ 6 ກິດຈະກຳເປີດປີທ່ອງທ່ຽວລາວ 2024

ແຂວງເຊກອງ ໄດ້ກະກຽມຄວາມພ້ອມເປີດປີທ່ອງທ່ຽວລາວ 2024 ໂດຍກຳນົດມີ 6 ກິດຈະກຳຄື: ບຸນຊ່ວງເຮືອເມືອງລະມາມ ປະຈໍາປີ 2023; ບຸນປະເພນີ 10 ເຜົ່າ ເສົາຫຼັກເມືອງ; ບຸນສະຫລອງຜົນສໍາເລັດຂອງເຜົ່າກະຕູ ບ້ານກັນດອນໃໝ່ ເມືອງທ່າແຕງ; ບຸນຊ່ວງເຮືອ-ແພເມືອງດາກຈຶງ; ບຸນພາເຂົ້າໂດຍສານບ້ານຈະແຣະ ເມືອງກະລຶມ ແລະງານສະເຫລີມສະຫລອງວັນສ້າງຕັ້ງແຂວງເຊກອງ ຄົບຮອບ 40 ປີ ຊຶ່ງຄາດວ່າ ຈະມີນັກທ່ອງທ່ຽວເຂົ້າມາທ່ຽວໃນປີ 2024 ຈໍານວນ 50 ພັນຄົນ.

ທ່ານ ບຸນທົງ ຖິ່ນດອນໂຂງ ຮັກສາການຫົວໜ້າພະແນກຖະແຫລງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງເຊກອງ, ຮອງປະທານ ຜູ້ປະຈໍາຄະນະຊີ້ນໍາເປີດປີທ່ອງທ່ຽວລາວ 2024 ຂັ້ນແຂວງ ໃຫ້ຮູ້ວ່າ: ພິທີເປີດປີທ່ອງທ່ຽວລາວ 2024 ທີ່ແຂວງເຊກອງ ແມ່ນຈະຈັດຂຶ້ນໃນທ້າຍເດືອນມັງກອນ 2024 ຕິດພັນກັບການຈັດງານບຸນປະເພນີ 10 ເຜົ່າ ເສົາຫລັກເມືອງ ຊຶ່ງທາງແຂວງໄດ້ມີການກະກຽມຄວາມພ້ອມດ້ານຕ່າງໆ ໂດຍໄດ້ແຕ່ງຕັ້ງຄະນະຮັບຜິດຊອບຊີ້ນໍາ ແລະອະນຸກໍາມະການຕ່າງໆຂັ້ນແຂວງ; ເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກິດຈະກໍາຕ່າງໆເປັນຕົ້ນ, ກິດຈະກໍາປະກວດສິລະປະ-ວັນນະຄະດີ; ເຄື່ອນໄຫວເກັບກໍາ-ຂໍ້ມູນຂຶ້ນບັນຊີແຫລ່ງທ່ອງທ່ຽວ; ຊຸກຍູ້ການໂຄສະນາທ່າແຮງດ້ານການທ່ອງທ່ຽວ; ຜະລິດປະຕິທິນງານບຸນປະເພນີບັນດາເຜົ່າ; ປັບປຸງຍົກລະດັບທາງດ້ານການບໍລິການດ້ວຍຮູບການຈັດຝຶກອົບຮົມໃຫ້ແກ່ຫົວໜ່ວຍທຸລະກິດ, ຜູ້ປະກອບການສະຖານທີ່ພັກແຮມ, ຮ້ານອາຫານ, ຮ້ານກິນດື່ມ-ບັນເທີງ ແລະ ຮ້ານຄາຣາໂອເກະ.

ທ່ານ ບຸນທົງ ຖິ່ນດອນໂຂງ ໃຫ້ຮູ້ອີກວ່າ: ແຂວງເຊກອງມີແຫລ່ງທ່ອງທ່ຽວທັງໝົດ 42 ແຫ່ງ. ໃນນີ້, ແຫລ່ງທ່ອງທ່ຽວທໍາມະຊາດ 22 ແຫ່ງ, ແຫລ່ງທ່ອງທ່ຽວວັດທະນະທໍາ 7 ແຫ່ງ, ແຫລ່ງທ່ອງທ່ຽວປະຫວັດສາດ 9 ແຫ່ງ ແລະ ແຫລ່ງທ່ອງທ່ຽວກະສິກໍາ 4 ແຫ່ງ; ນອກນີ້, ຍັງມີໂຮງແຮມ 8 ແຫ່ງ, ເຮືອນພັກ 33 ແຫ່ງ, ຮ້ານອາຫານ 19 ແຫ່ງ ແລະຮ້ານບັນເທີງ 2 ແຫ່ງ; ຊຶ່ງນັບແຕ່ເດືອນມັງກອນ ຫາ ເດືອນພະຈິກ 2023 ມີນັກທ່ອງທ່ຽວເຂົ້າມາທ່ຽວແຂວງທັງໝົດ 48.379 ຄົນ. ໃນນີ້, ນັກທ່ອງທ່ຽວພາຍໃນ 29.534 ຄົນ ແລະ ນັກທ່ອງທ່ຽວຕ່າງປະເທດ 18.845 ຄົນ, ສາມາດສ້າງລາຍຮັບໄດ້ເກືອບ 3 ລ້ານໂດລາສະຫະລັດ.
---
ຂ່າວ-ພາບ: ສັນຍາ

แชร์