ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ປະທານຈັດມະຫະກໍາບຸນຊ້າງ ປະຈໍາປີ 2024 ໄດ້ຖະແຫລງຂ່າວຕໍ່ສື່ມວນຊົນ ແຂວງໄຊຍະບູລີ ໃນວັນທີ 13 ທັນວາ 2023 ນີ້ວ່າ: ການຈັດມະຫະກໍາບຸນຊ້າງໃນປີນີ້ເປັນຄັ້ງທີ 17, ເຊິ່ງຈະມີກິດຈະກຳທີ່ຕິດພັນກັບປີທ່ອງທ່ຽວລາວ 2024 ຢູ່ແຂວງໄຊຍະບູລີ ທັງໝົດ 12 ກິດຈະກໍາປິ່ນອ້ອມເປັນຕົ້ນກິດຈະກໍາລະດັບຊາດແມ່ນກໍານົດເອົາມະຫະກໍາບຸນຊ້າງ ປະຈໍາປີ 2024 ແລະເປັນພິທີເປີດປີທ່ອງທ່ຽວລາວ 2024 ຂອງແຂວງ. ສຳລັບກິດຈະກໍາລະດັບແຂວງ ແມ່ນກໍານົດເອົາເທສະການບຸນກອງເຂົ້າໃຫຍ່ ເມືອງພຽງ ໃນລະຫວ່າງວັນທີ 9-12 ມັງກອນ 2024, ເປີດແຫລ່ງທ່ອງທ່ຽວສູນອະນຸລັກຊ້າງພູແຄນ ໃນເດືອນກຸມພາ 2024 ແລະກິດຈະກຳລະດັບເມືອງມີ 10 ກິດຈະກໍາ.

 

ສ່ວນກິດຈະກຳຕ່າງໆ ໃນມະຫະກໍາບຸນຊ້າງແຂວງໄຊຍະບູລີ ປະກອບມີ: ໃນລະຫວ່າງວັນທີ 12-13 ກຸມພາ 2024 ເປີດຕະຫລາດນັດວາງສະແດງສິນຄ້າທັງພາຍໃນ-ຕ່າງປະເທດ ແລະການສະແດງສິລະປະວັນນະຄະດີ, ວັນທີ 14-15 ກຸມພາ 2024 ຊ້ອມໃຫຍ່ຂະບວນແຫ່ກ້ອນສະແດງຕ່າງໆ ໃນພິທີເປີດງານ ແລະ ການແຂ່ງຂັນປະກວດນັກຮ້ອງສຽງດີ, ດົນຕີພື້ນເມືອງ ແລະປະກວດນາງສາວງາມທິດາບຸນຊ້າງ, ວັນທີ 16 ກຸມພາ 2024 ພິທີຕັກບາດອຸທິດສ່ວນກຸສົນໃຫ້ຊ້າງ ແລະ ກວດກາຄວາມພ້ອມຮອບດ້ານ ແລະແຂ່ງຂັນຕີກອງຫາງ, ວັນທີ 17 ກຸມພາ 2024 ເປີດງານມະຫະກໍາບຸນຊ້າງ ແລະ ເປີດປີທ່ອງທ່ຽວລາວ 2024 ຢູ່ແຂວງໄຊຍະບູລີ ຢ່າງເປັນທາງການພ້ອມຊົມການສະແດງໂດດຈ້ອງ, ວັນທີ 18 ກຸມພາ 2024 ສືບຕໍ່ກິດຈະກໍາທີ່ຕິດພັນກັບຊ້າງ ແລະ ການອະນຸລັກຊ້າງໂດຍສະເພາະການສະແດງຂອງຊ້າງຄຳຮູ້, ການໃຫ້ອາຫານຊ້າງ, ການບໍລິການຂີ່ຊ້າງ, ການສະແດງສິລະປະວັນນະຄະດີ ແລະຊົມການສະແດງກາຍຍະສິນຈາກກອງກາຍຍະສິນແຫ່ງຊາດ. ນອກຈາກນີ້, ຍັງມີກິດຈະກໍາທາງດ້ານກິລາ ເປັນຕົ້ນ ກິດຈະກໍາຍ່າງເພື່ອການກຸສົນ ແລະແຂ່ງຂັນຟຸດຊໍ ແລະອື່ນໆຕື່ມອີກ.

 

ທ່ານ ເພັດພິໄຊ ສູນວິໄລ ກ່າວຕື່ມວ່າ: ເພື່ອກະກຽນຄວາມພ້ອມດ້ານຕ່າງໆ ປັດຈຸບັນແຂວງໄຊຍະບູລີ ໄດ້ຈັດຝຶກອົບຮົມດ້ານການບໍລິການຮ້ານອາຫານ, ບ່ອນພັກເຊົາ ແລະສະຖານທີ່ບໍລິການຕ່າງໆ ໃຫ້ມີຄວາມສະອາດປອດໄພ, ໄດ້ຄວບຄຸມລາຄາສິນຄ້າທີ່ສົມເຫດສົມຜົນເພື່ອຕອບສະໜອງໃຫ້ແກ່ແຂກ ແລະນັກທ່ອງທ່ຽວທີ່ຈະມາທ່ຽວມາຊົມມະຫະກໍາບຸນຊ້າງໃນຄັ້ງນີ້ ໃຫ້ມີຄວາມປະທັບໃຈ.

ຂ່າວ-ພາບ: ມະໄລວັນ