ທ່ານ ພິມພອນ ສຸທິວົງ ຮອງປະທານບໍລິສັດ ລາວວີພີ ໂລຈິສຕິກ ຈໍາກັດຜູ້ດຽວ ກ່າວວ່າ: ໂຄງການພັດທະນາຈຸດຄ່ຽນຖ່າຍສິນຄ້າສະຖານີໂພນໂຮງຄາດຄະເນມູນຄ່າການລົງທຶນ 100 ລ້ານໂດລາສະຫະລັດ ເຊິ່ງເປັນການລົງທຶນພາຍໃນ 100% ໃນນີ້ເປັນທຶນຂອງບໍລິສັດ 70% ທຶນກູ້ຢືມຈາກທະນາຄານ 30% ມີເນື້ອທີ່ການພັດທະນາ 150 ເຮັກຕາ ໃນນີ້ເນື້ອທີ່ຈໍານວນໜຶ່ງແມ່ນເຊົ່າກັບພາກລັດເປັນພື້ນທີ່ເຊື່ອມຕໍ່ລະຫວ່າງສະຖານທາງດ່ວນໂພນໂຮງເສັ້ນທາງຫຼວງແຫ່ງຊາດ ເລກທີ 13 ເໜືອ ແລະ ສະຖານີຂົນສົ່ງໂດຍສານ ທາງລົດ ໄຟ ລາວ-ຈີນ ສະຖານີໂພນໂຮງ.

 

ຈຸດປະສົງຂອງການພັດທະນາໂຄງການເພື່ອສົ່ງເສີມການຜະລິດສິນຄ້າເພື່ອສົ່ງອອກເຊື່ອມຕໍ່ການຄ້າ ລະຫວ່າງ ພາຍໃນ ກັບ ສາກົນ ໃຫ້ມີຄວາມຄ່ອງຕົວດ້ວຍການປັບປຸງລະບົບການໃຫ້ບໍລິການທີ່ມີຄວາມສະດວກກະທັດຮັດຫຼຸດຜ່ອນເວລາ ແລະຄ່າໃຊ້ຈ່າຍທີ່ຕິດພັນກັບການຄ້າຂອງຫົວໜ່ວຍທຸລະກິດພາຍໃນສ້າງລະບົບສາງພາງ ແລະຈຸດຄ່ຽນຖ່າຍສິນຄ່າທີ່ມີຄວາມທັນສະໄໝອໍານວຍຄວາມສະດວກໃຫ້ການນໍາເຂົ້າ ແລະສົ່ງອອກເປັນລະບົບຄົບຊຸດສະດວກໃນການຄຸ້ມຄອງການເກັບລາຍຮັບເຂົ້າງົບປະມານປະກອບສ່ວນສ້າງພື້ນຖານເສດຖະກິດໃຫ້ເມືອງໂພນໂຮງເປັນເຂດພັດທະນາໃໝ່ໂດຍການພັດທະນາກິດຈະການປິ່ນອ້ອມພາຍໃນໂຄງການເປັນຕົ້ນເຂດການຄ້າ-ການບໍລິການ ເຂດທີ່ຢູ່ອາໄສເຂດການສຶກສາ ເຂດອຸດສາຫະກໍາ ເຂດສາງສິນຄ້າ ແລະສໍານັກງານບໍລິສັດຂົນສົ່ງ ເຂດສາງນໍ້າມັນ ແລະແກັສ ເຂດສະຖານີຄ່ຽນຖ່າຍສິນຄ້າ.

 

ໂອກາດນີ້ ທ່ານ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍຕໍ່ການຈັດຕັ້ງປະຕິບັດໂຄງການດັ່ງກ່າວເຊິ່ງມີຄວາມຄືບໜ້າເປັນໜ້າເພິ່ງພໍໃຈພ້ອມນີ້ທ່ານຍັງໄດ້ເນັ້ນໃຫ້ບໍລິສັດຜູ້ພັດທະນາເອົາໃຈໃສ່ປະຕິບັດເນື້ອໃນສັນຍາຢ່າງເຂັ້ມງວດເພື່ອຫຼີກຜົນກະທົບຕໍ່ປະຊາຊົນໃນທ້ອງຖິ່ນນອກນີ້ທ່ານຍັງຮຽກຮ້ອງໃຫ້ພາກສ່ວນກ່ຽວຂ້ອງອໍານວຍຄວາມສະດວກໃນການຈັດຕັ້ງປະຕິບັດໂຄງການດັ່ງກ່າວໃຫ້ມີຜົນສໍາເລັດຕາມເປົ້າໝາຍ.

ແຫລ່ງຂ່າວ: ວຽງຈັນໃໝ່