ພິທີເຊັນບົດບັນທຶກຄວາມເຂົ້າໃຈ MOU ວ່າດ້ວຍການຮ່ວມມືດ້ານວິຊາການກ່ຽວກັບວຽກງານສະກັດກັ້ນ ແລະຕ້ານອັກຄີໄພ

ພິທີເຊັນບົດບັນທຶກ ຄວາມເຂົ້າໃຈ MOU ວ່າການຮ່ວມມືດ້ານວິຊາການກ່ຽວກັບວຽກງານສະກັດກັ້ນ ແລະຕ້ານອັກຄີໄພ ລະຫວ່າງກົມຕຳຫຼວດສະກັດກັ້ນ ແລະ ຕ້ານອັກຄີໄພກົມໃຫ່ຍຕຳຫຼວດ ກະຊວງປ້ອງກັນຄວາມສະຫງົບ ແລະບໍລິສັດ ອິນດັດສເທັກ ຈຳກັດ ໄດ້ຈັດຂຶ້ນໃນຕອນເຊົ້າວັນທີ 11 ທັນວາ 2023 ຢູ່ທີ່ກົມຕຳຫຼວດສະກັດກັ້ນ ແລະ ຕ້ານອັກຄີໄພ, ໂດຍການເຂົ້າຮ່ວມຂອງທ່ານ ພັອ ວິລະພອນ ວົງຄຳມຸນຕີ ຫົວໜ້າກົມຕຳຫຼວດສະກັດກັ້ນ ແລະ ຕ້ານອັກຄີໄພ ແລະທ່ານ ພອນສະຫວັນ ໄຊປັນຍາ ປະທານບໍລິສັດ ອິນດັດສເທັກ ຈຳກັດ, ມີພະນັກງານຫຼັກແຫຼ່ງທີ່ກ່ຽວຂ້ອງສອງຝ່າຍ ແລະແຂກຖືກເຊີນເຂົ້າຮ່ວມ.

ທ່ານ ພັອ ວິລະພອນ ວົງຄຳມຸນຕີ ຫົວໜ້າກົມຕຳຫຼວດສະກັດກັ້ນ ແລະຕ້ານອັກຄີໄພໄດ້ໃຫ້ຮູ້ວ່າ: ວຽກງານສະກັດກັ້ນ ແລະຕ້ານອັກຄີໄພເປັນວຽກງານໜຶ່ງທີ່ສຳຄັນໃນການປົກປັກຮັກສາສຸຂະພາບ, ຊີວິດ, ຊັບສີນຂອງພັກ -ລັດ, ຂອງລວມໝູ່ ແລະຂອງໝົດທຸກຄົນໃນສັງຄົມ ໃຫ້ມີຄວາມສະຫງົບປອດໄພຈາກບັນຫາອັກຄີໄພ ແລະປະກອບສ່ວນເຂົ້າໃນການປົກປັກຮັກສາຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມ.

ທ່ານ ພອນສະຫວັນ ໄຊປັນຍາ ປະທານບໍລິສັດ ອິນດັດສເທັກ ຈຳກັດ ໃຫ້ຮູ້ຕື່ມອິກວ່າ: ການລົງນາມໃນບົດບັນທຶກຄວາມເຂົ້າໃຈສະບັບນີ້ເພື່ອສົ່ງເສີມການຮ່ວມມືທາງດ້ານວິຊາການກ່ຽວກັບວຽກງານການສະກັດກັ້ນ ແລະ ຕ້ານອັກຄີໄພ; ການອອກແບບ ແລະຕິດຕັ້ງລະບົບມອດໄຟ, ການກວດສອບລະບົບມອດໄຟ, ອຸປະກອນມອດໄຟຕ່າງໆ, ການຝຶກອົບຮົມການນໍາໃຊ້ອຸປະກອນມອດໄຟ, ຝຶກອົບຮົມການມອດໄຟຂັ້ນຕົ້ນ ແລະຂັ້ນສູງ, ວີທີປ້ອງກັນ ແລະວິທີດັບມອດ; ເພື່ອປະຕິບັດຕາມມາດຕະການທີ່ເໝາະສົມ ແລະຍົກລະດັບຄວາມອາດສາມາດຂອງບຸກຄະລາກອນສູ່ລະດັບສາກົນ,ທັງເປັນການປູກຈິດສໍານຶກຄວາມຮູ້ທີ່ກ່ຽວຂ້ອງກັບວຽກງານສະກັດກັ້ນ ແລະຕ້ານອັກຄີໄພໃຫ້ແກ່ສັງຄົມ.

ຈາກນັ້ນສອງຝ່າຍໄດ້ລົງນາມຮ່ວມໃນບົດບັນທຶກຄວາມເຂົ້າໃຈ ລະຫວ່າງ ທ່ານ ພັອ ວິລະພອນ ວົງຄຳມຸນຕີ ຫົວໜ້າກົມຕຳຫຼວດສະກັດກັ້ນ ແລະຕ້ານອັກຄີໄພ ແລະ ທ່ານ ພອນສະຫວັນ ໄຊປັນຍາ ປະທານບໍລິສັດ ອິນດັດສເທັກ ຈຳກັດ ມີພະນັກງານກ່ຽວຂ້ອງເຂົ້າຮ່ວມເປັນສັກຂີພິຍານ.

1.ປ່ອຍສຽງ............ທ່ານ ພອນສະຫວັນ ໄຊປັນຍາ ປະທານບໍລິສັດ ອິນດັດສເທັກ ຈຳກັດ

ພາບ:ສຸວັນ

ກົມມອດໄຟ:ຂ່າວ:ຄຳຫຼ້າ

• 14/12/2023