ທ່ານ ບຸນປະເສີດ ກຸນລະບຸດ ໄດ້ໃຫ້ຮູ້ວ່າ: ໃນໄລຍະ 1 ປີທີ່ຜ່ານມາ ເປັນປີທີ່ຂຸ້ນຂ້ຽວການຈັດ ຕັ້ງປະຕິບັດວຽກງານ ແລະມີຫລາຍເຫດການ, ສະພາບເສດຖະກິດມີຜົນກະທົບຕໍ່ການຈັດຕັ້ງປະຕິບັດການເກັບລາຍຮັບ ແລະເປັນປີສຸດທ້າຍຂອງການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ພ້ອມທັງສຸມໃສ່ບັນດາມະຕິຄຳສັ່ງຂອງຂັ້ນເທິງ, ແຜນພັດທະນາຂະແໜງສ່ວຍສາອາກອນ ແຕ່ປີ 2021-2025 ແລະ ແຜນພັດທະນາເສດຖະກິດ-ສັງຄົມແຫ່ງລັດ 5 ປີ. ໃນປີ 2023 ນີ້, ສາມາດເກັບລາຍຮັບໄດ້ທັງໝົດ 25.238 ຕື້ກີບ ເທົ່າກັບ 110% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 22% ເປັນເງິນ 4.521 ຕື້ກີບ. ໃນນັ້ນ, ລາຍຮັບສ່ວຍສາອາກອນ ສາມາດເກັບໄດ້ 16,958 ຕື້ກີບ ເທົ່າກັບ 98% ຂອງແຜນການປີ, ທຽບໄລ ຍະດຽວກັນຂອງປີຜ່ານມາ ເພີ່ມຂຶ້ນ 21% ເປັນເງິນ 2,921 ຕື້ກີບ, ລາຍຮັບຊັບສິນ ເກັບໄດ້ 6,973 ຕື້ກີບ ເທົ່າກັບ 162% ຂອງແຜນການປີ, ທຽບໄລຍະດຽວກັນຂອງປິຜ່ານມາ ເພີ່ມຂຶ້ນ 44% ເປັນເງິນ 2,143 ຕື້ກີບ ແລະ ກົມປະຕິຮູບລັດວິສາຫະກິດ ແລະ ການປະກັນໄພ ເກັບໄດ້ 1,306 ຕື້ກີບ ເທົ່າກັບ 112% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາຫລຸດລົງ 29.4% ເປັນເງິນ 543 ຕື້ກີບ. ແນວໃດກໍຕາມການເກັບການລາຍຮັບປະຈໍາປີ 2023 ສາມາດຍາດໄດ້ຜົນສໍາເລັດດັ່ງກ່າວ ຍ້ອນຄະນະພັກ-ຄະນະນໍາກະຊວງການເງິນເອົາໃຈໃສ່ນຳພາ-ຊີ້ນຳ ຂະແໜງສ່ວຍສາອາກອນໂດຍສະເພາະແມ່ນພະນັກງານສ່ວຍສາອາກອນທົ່ວສູນກາງ, ແຂວງ ແລະບັນດາເມືອງໃນຂອບເຂດທົ່ວປະເທດຮ່ວມກັບບັນດາຂະແໜງການທີ່ກ່ຽວຂ້ອງພວກເຮົາໄດ້ພ້ອມກັນເປັນກຳລັງແຮງໃນການ ຈັດຕັ້ງປະຕິບັດວຽກງານ ແລະສຸມໃສ່ຈັດຕັ້ງປະຕິບັດບັນດາມະຕິຄຳສັ່ງຕ່າງໆຢ່າງເຂັ້ມງວດ.

 

ພ້ອມນີ້, ກອງປະຊຸມຍັງໄດ້ຮັບຟັງລາຍງານຈາກບັນດາທ້ອງຖິ່ນ, ໄດ້ປຶກສາຫາລືຫລາຍບັນຫາກ່ຽວກັບການຂະຫຍາຍລາຍຮັບ ແລະ ການລົງສໍາຫລວດຫົວໜ່ວຍທຸລະກິດ ທີ່ເກີດໃໝ່ ຫລືຢຸດເຊົາກິດຈະການ, ການເອົາຫົວໜ່ວຍເຂົ້າໃນລະບົບ TaxRIS ໃຫ້ໄດ້ 100%; ການຍື່ນບົດລາຍງານການເງິນປະຈຳປີ ແລະ ການສົມທົບກັບຂະແໜງການຄ້າກວດກາບັນດາຫົວໜ່ວຍທຸລະກິດທີ່ຍັງບໍ່ທັນໄດ້ຢັ້ງຢືນໃນລະບົບ ERC; ການຄຸ້ມຄອງ, ຕິດຕາມການແຈ້ງມອບອາກອນຂອງຫົວຫນ່ວຍວິສາຫະກິດ ໃຫ້ຖືກຕ້ອງຄົບຖ້ວນ ແລະການຄຸ້ມຄອງການຈັດເກັບອາກອນທີ່ດິນ, ຄ່າທໍານຽມທາງ ແລະຄ່າບໍລິການ ແລະອື່ນໆ.

ຂ່າວ: ສຸພາສະຫວັນ