ພິທີເປີດຫໍພິພິທະພັນປະຫວັດສາດກອງທັບປະຊາຊົນລາວ ພາຍຫຼັງສຳເລັດການປັບປຸງໃໝ່
ພິທີເປີດຫໍພິພິທະພັນປະຫວັດສາດກອງທັບປະຊາຊົນລາວ ໄລຍະປັບປຸງໃໝ່ ຈັດຂຶ້ນວັນທີ 13 ທັນວາ 2023 ທີ່ນະຄອນຫຼວງວຽງຈັນ ເປັນກຽດເຂົ້າຮ່ວມມີທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ທ່ານ ຟາມ ມິງຈຽນ ອຸປະທູດຊົ່ວຄາວ ສະຖານຖະທູດ ສສ ຫວຽດນາມ ປະຈຳ ສປປ ລາວ ພ້ອມການນໍາກະຊວງປ້ອງກັນປະເທດ ແລະແຂກທີ່ຖືກເຊີນເຂົ້າຮ່ວມ.
ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ເນື່ອງໃນໂອກາດທົ່ວພັກ-ລັດ ທົ່ວກອງທັບ ແລະທົ່ວປວງຊົນລາວບັນດາເຜົ່າໄດ້ສ້າງຂະບວນການ ແລະຜົນງານດ້ານຕ່າງໆ ເພື່ອກະກຽມຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນວັນທີ 20 ມັງກອນ 2024 ທີ່ຈະມາເຖິງ ກະຊວງປ້ອງກັນປະເທດ ໄດ້ມອບໝາຍໃຫ້ກົມໃຫ່ຍການເມືອງກອງທັບ ຮ່ວມກັບວິຊາການກົມກອງທີ່ກ່ຽວຂ້ອງເຮັດໜ້າທີ່ຄົ້ນຄ້ວາຮຽບຮຽງບັນດາຂໍ້ມູນປະຫັວດສາດເກັບກຳຮູບພາບວັດຖຸກໍາທາງປະຫວັດສາດທັງເກົ່າ ແລະໃໝ່ພ້ອມກັບການບູລະນະສ້ອມແປງຫໍພິພິທະພັນຄືນໃໝ່ໃຫ້ຖືກຕ້ອງຕາມລະບົບມາດຕະຖານຂອງຫໍພິພິທະພັນໂດຍນຳໃຊ້ທຶນຊ່ວຍເຫຼືອລ້າຂອງກະຊວງປ້ອງກັນປະເທດ ສສ ຫວຽດ ນາມ.
ການກໍ່ສ້າງຫໍພິພິທະພັນຄັ້ງນີ້ແນ່ໃສ່ປັບປຸງຄືນລະບົບໂຄງຮ່າງວາງສະແດງ ແລະເນື້ອໃນດ້ານຕ່າງໆສ້າງໃຫ້ເປັນສູນລວມປະຫວັດສາດທ້ອນໂຮມວັດຖຸກໍາ ຄຸ້ມຄອງ ປົກປັກຮັກສາ ແລະຈັດວາງສະແດງປະຫວັດມູນເຊື້ອຜົນງານໄຊຊະນະຂອງກອງ ທັບປະຊາຊົນລາວ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ໃຫ້ມວນຊົນທຸກຊັ້ນຄົນທັງພາຍໃນ ແລະຕ່າງປະເທດໄດ້ເຂົ້າມາຄົ້ນຄ້ວາສຶກສາຮໍ່າຮຽນ ແລະຢ້ຽມຊົມດ້ວຍຄວາມປະທັບໃຈຄືບັນຍາກາດໄດ້ຮ່ວມເຄື່ອນໄຫວຊີວິດຕົວຈິງຢູ່ໃນເຫດການປະຫວັດສາດຕ່າງໆ.
