ພິທີ​ລົງ​ນາມໃນສັນຍາ ວ່າ​ດ້ວຍ ການ​ສ້າງຕັ້ງສາຍພົວພັນການທູດ ລະ​ຫວ່າງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ແລະສາ​ທາ​ລະ​ນະ​ລັດ ບົດສະວານາ

ເພື່ອເປັນການເສີມຂະຫຍາຍສາຍພົວພັນການທູດກັບບັນດາປະເທດເພື່ອນມິດໃນທົ່ວໂລກພ້ອມທັງເປັນການເສີມຂະຫຍາຍສາຍພົວພັນມິດຕະພາບ ແລະການຮ່ວມມືສອງຝ່າຍ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ບົດສະວານາ, ໃນຕອນເຊົ້າຂອງ ວັນທີ 11 ທັນວາ 2023 ຢູ່ທີ່ ນະຄອນ ນິວຢອກ, ສະຫະລັດອາເມລິກາ, ໄດ້ມີພິທີລົງນາມໃນຖະແຫຼງການຮ່ວມວ່າດ້ວຍການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ບົດສະວານາ, ໂດຍຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການ ສະຫະປະຊາຊາດ,​ ແລະ ຕາງໜ້າໃຫ້ ລັດຖະບານ ແຫ່ງ ສາທາລະນະລັດ ບົດສະວານາ ແມ່ນທ່ານ ດຣ. ເລໂມກັງ ເຄວາເປ (H.E. Dr. Lemogang Kwape), ລັດຖະມົນຕີການຕ່າງປະເທດ ແຫ່ງ ສາທານາລະນະ ບົດສະວານາ ໄດ້ຮ່ວມລົງນາມໃນຖະແຫຼງການ ໂດຍການເຂົ້າຮ່ວມເປັນສັກຂີພິຍານໃນພິທີດັ່ງກ່າວຂອງບັນດານັກການທູດຂອງທັງສອງຝ່າຍ.

ສາທາລະນະລັດ ບົດສະວານາ ຕັ້ງຢູ່ທາງໃຕ້ຂອງທະວີບ ອາຟຣິກາ, ມີຊາຍແດນຕິດກັບ 04 ປະເທດ ຄື:​ ສ. ອາຝຣິກກາໃຕ້, ນາມີບີ, ຊິມບັບເວ ແລະ ຊຳບີ, ມີ​ເນື້ອທີ່ທັງໝົດ 581,730 km² ເຊິ່ງ 70% ຂອງເນື້ອທີ່ແມ່ນເປັນທະເລຊາຍ, ປະກອບດ້ວຍ 17 ແຂວງ; ມີນະຄອນຫຼວງຊື່ວ່າ ກາໂບໂລນີ ແລະມີປະຊາກອນ ປະມານ 2.7  ລ້ານ ຄົນ(ປີ 2023). ປະຊາຊົນບົດສະວານາ ນໍາໃຊ້ພາສາອັງກິດ ແລະສະວານາ ເປັນພາສາ ທາງການ. ປະຊາຊົນ ຫຼາຍກວ່າ 70% ນັບຖືສາສະໜາ ຄຣິດສຕຽນ. ສ. ບົດສະວານາ ໄດ້ຮັບເອກະລາດຈາກ ອັງກິດ ໃນວັນທີ 30 ກັນຍາ 1966, ແຕ່ຍັງຢູ່ໃນກຸ່ມປະເທດເຄືອຈັກກະພົບ. ສ. ບົດສະວາ ມີການປົກຄອງລະບອບປະຊາທິປະໄຕ ໂດຍມີປະທານນາທິບໍດີທັງເປັນປະມຸກລັດ ແລະ ຫົວໜ້າລັດຖະບານ. ບົດສະວານາ ເປັນປະເທດທີ່ອຸດົມສົມບູນດ້ວຍຊັບພະຍາກອນທຳມະຊາດ, ພື້ນຖານເສດຖະກິດສ່ວນໃຫຍ່ ແມ່ນອີງໃສ່ ການກະສິກຳ ແລະ ແຮ່ທາດ, ມີການຜະລິດ ແລະ ສົ່ງອອກ ແຮ່ທອງ, ຖ່ານຫີນ, ຄໍາ, ເງິນ, ແກ້ວປະເສີດ, ແລະ ຫີນກຼານິດ ເຊິ່ງກາຍເປັນພື້ນຖານໃຫ້ແກ່ການພັດທະນາເສດຖະກິດຂອງປະເທດ. ນອກນັ້ນ, ຍັງມີແຫຼ່ງທ່ອງທ່ຽວທາງທຳມະຊາດທີ່ສຳຄັນຫຼາຍແຫ່ງ ແລະ ໄດ້ຮັບການຈົດທະບຽນເປັນມໍລະດົກໂລກ ໂດຍອົງການ UNESCO.

ສ. ບົດສະວານາ ເຂົ້າເປັນສະມາຊິກຂອງອົງການ ສປຊ ໃນວັນທີ 17 ຕຸລາ 1966 ແລະ ຜ່ານມາໄດ້ເຄື່ອນໄຫວຢ່າງຫ້າວຫັນເປັນຕົ້ນໄດ້ປະກອບສ່ວນເຂົ້າໃນກອງກຳລັງຮັກສາສັນຕິພາບຂອງ ສປຊ, ເຄີຍໄດ້ຮັບເລືອກຕັ້ງເປັນສະມາຊິກບໍ່ຖາວອນ ຂອງ ສະພາຄວາມໝັ້ນຄົງ ສປຊ ໃນສົກປີ 1995-1996, ເປັນສະມາຊິກສະພາເສດຖະກິດ-ສັງຄົມ ສປຊ 04 ຄັ້ງ ໃນສົກປີ 1983-1985, 1991-1993, 2014-2016 ແລະ 2020-2022 ແລະເປັນສະມາຊິກສະພາສິດທິມະນຸດໃນປີ 2011-2017. ໃນບໍ່ດົນຜ່ານມານີ້, ສ.ບົດສະວານາ ຫາກໍສຳເລັດການເປັນປະທານສະພາເສດຖະກິດ ແລະສັງຄົມ ສປຊ ສົກປີ 2021-2022. ໃນເວທີ ສປຊ, ສປປ ລາວ ແລະ ບົດສະວານາ ໄດ້ມີການພົວພັນ ແລະ ຮ່ວມມືອັນດີໃນຖານະເປັນສະມາຊິກກຸ່ມຕ່າງໆຮ່ວມກັນ ເຊັ່ນ: ກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ (LLDCs), ກຸ່ມ 77 ແລະຈີນ, ຂະບວນການບໍ່ຮ່ວມກຸ່ມ (NAM) ແລະ ອື່ນໆ.

ໃນໂອກາດນີ້, ທັງສອງຝ່າຍຍັງໄດ້ຢືນຢັນຄືນເພື່ອສືບຕໍ່ຄວາມພະຍາຍາມຮ່ວມກັນໃນການເສີມຂະຫຍາຍການພົວພັນ ແລະຮ່ວມມືໃນດ້ານຕ່າງໆໃນຕໍ່ຫນ້າ, ລວມທັງ ການສະຫນັບສະຫນູນເຊິ່ງກັນ ແລະກັນໃນເວທີສາກົນ. ປັດຈຸບັນ, ສປປ ລາວ ພວມສືບຕໍ່ເຮັດຫນ້າທີ່ເປັນສະມາຊິກສະພາເສດຖະກິດ-ສັງຄົມ ສປຊ (ECOSOC) ສໍາລັບ ສົກປີ 2023-2025 ແລະຈະເລີ້ມຕົ້ນປະຕິບັດຫນ້າທີ່ເປັນປະທານອາຊຽນ ໃນປີ 2024. ການສ້າງຕັ້ງສາຍພົວພັນການທູດຮ່ວມກັບປະເທດບົດສະວານາ ໃນຄັ້ງນີ້ເປັນການສືບຕໍ່ປະກອບສ່ວນໃຫ້ແກ່ການຈັດຕັ້ງປະຕິບັດແນວທາງການຕ່າງປະເທດ “ສັນຕິພາບ,  ເອກະລາດ, ມິດຕະພາບ ແລະການຮ່ວມມື” ອັນສະເໝີຕົ້ນສະເໝີປາຍຂອງ ສປປ ລາວ ແລະເຮັດໃຫ້ ສາທາລະນະລັດ ປະຊາທິປະໄຕ ປະຊາຊົນລາວ ມີສາຍພົວພັນການທູດ ກັບ 149 ປະເທດ ໃນທົ່ວໂລກ.

• 12/12/2023