ຫາລືອະນາຄົດ ຂອງເຄື່ອງຫັດຖະກຳ ລາວ-ຍີ່ປຸ່ນ

ສະຖານທູດຍີ່ປຸ່ນ ຮ່ວມກັບສະມາຄົມຫັດຖະກຳລາວ ຈັດງານເວີກຊອບການ ອອກແບບຜະລິດຕະພັນສີນໍ້າກ້ຽງ ຂຶ້ນໃນວັນທີ 11 ທັນວາ 2023 ທີ່ນະຄອນຫຼວງວຽງຈັນ ພາຍໃຕ້ເວີກຊັອບທີ່ຊື່ວ່າ “ການອອກແບບ Urushi: ສິລະປະເຄື່ອງສີນໍ້າກ້ຽງ ແລະ ເຄື່ອງຫັດຖະກຳຍີ່ປຸ່ນ”, ໂດຍໃຫ້ກຽດເຂົ້າຮ່ວມມີທ່ານ ເຄັນອິຈີ ໂຄະບະຢະຊິ ເອກອັກຄະລາຊະທູດຍີ່ປຸ່ນປະຈໍາ ສປປ ລາວ, ທ່ານນາງ ສຸວິຕາ ປະເສີດ ປະທານສະມາຄົມຫັດຖະກຳລາວ, ທ່ານ ນາງ ທຳມາ ເພັດວິໄຊ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ພ້ອມດ້ວຍນັກສິນລະປິນສີນໍ້າກ້ຽງທີ່ມີຊື່ສຽງຂອງຍີ່ປຸ່ນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ງານຄັ້ງນີ້ຈັດຂຶ້ນເພື່ອປຶກສາຫາລືກ່ຽວກັບອະນາຄົດຂອງເຄື່ອງຫັດຖະກຳລາວ ແລະຍີ່ປຸ່ນ, ເນື່ອງຈາກວ່າສີນໍ້າກ້ຽງໄດ້ຖືກຊົມໃຊ້ຢ່າງກວ້າງຂວາງໃນການຜະລິດເຄື່ອງຕົກແຕ່ງ ເຄື່ອງຫັດຖະກຳ ແລະ ການຟື້ນຟູພະພຸດທະຮູບໃນປະເທດລາວ ແລະເປັນວັດຖຸດິບທີ່ຜູ້ຄົນທັງໃນຍີ່ປຸ່ນ ແລະລາວສະຫງວນຮັກມາເປັນເວລາດົນນານ. ເຖິງຢ່າງໃດກໍຕາມ, ໃນຊຸມປີທີ່ຜ່ານມາອຸດສາຫະກຳເຄື່ອງຫັດຖະກໍາພື້ນເມືອງຫຼາຍຂະແໜງການຕ້ອງປະເຊີນກັບຄວາມສ່ຽງທີ່ຈະດັບສູນໄປເພາະຄົນຮຸ່ນໜຸ່ມທີ່ມີສ່ວນຮ່ວມໃນການເຮັດເຄື່ອງຫັດຖະກຳພື້ນເມືອງລວມທັງເຄື່ອງສີນໍ້າກ້ຽງມີໜ້ອຍລົງ.


ພາຍໃນງານ ທ່ານ ໂຄເຮ ຄິລິໂມໂຕະ ສິລະປິນເຄື່ອງສີນໍ້າກ້ຽງທີ່ມີຊື່ສຽງຂອງຍີ່ປຸ່ນ ແລະເປັນຮຸ່ນທີ 8 ຂອງຕະກູນຄິລິໂມ ໂຕະ ເຊິ່ງເປັນຕະກູນທີ່ຜະລິດເຄື່ອງສີນໍ້າກ້ຽງມາແຕ່ທ້າຍສະໄໝເອໂດະຂອງຍີ່ປຸ່ນໄດ້ໃຫ້ກຽດຂຶ້ນບັນຍາຍກ່ຽວກັບສີນໍ້າກ້ຽງ ແລະໄດ້ຍົກໃຫ້ເຫັນຫຍີ່ຫໍ້ສິນຄ້າໃໝ່ທີ່ນຳໃຊ້ສີນໍ້າກ້ຽງຊື່ວ່າ "IKI -by KOHEI KIRIMOTO" ໃນຕອນທີ່ອາຍຸພຽງ 25 ປີ ລວມທັງການສືບຕໍ່ຮ່ວມມືຢ່າງກວ້າງຂວາງກັບສິລະປິນ, ກັບຫຍີ່ຫໍ້ສິນຄ້າພາຍໃນ ແລະ ຕ່າງປະເທດ.
ທ່ານເອກອັກຄະລາຊະທູດຍີ່ປຸ່ນປະຈຳ ສປປ ລາວ ໄດ້ກ່າວວ່າ “ປີນີ້ໝາຍເອົາວາລະຄົບຮອບ 50 ປີແຫ່ງການສ້າງຕັ້ງສາຍພົວພັນ ມິດຕະພາບ ແລະການຮ່ວມມືຍີ່ປຸ່ນ-ອາຊຽນ ແລະນັບແຕ່ຕົ້ນປີໜ້າ, ປະເທດລາວຈະເປັນເຈົ້າພາບຈັດກອງປະຊຸມອາຊຽນ ແລະໃນປີ 2025 ລາວ ແລະຍີ່ປຸ່ນ ຈະສະເຫຼີມສະຫຼອງວາລະຄົບຮອບ 70 ປີແຫ່ງການສ້າງຕັ້ງສາຍພົວພັນການທູດ. ແລະຫວັງຢ່າງຍິ່ງວ່າພວກເຮົາຈະນຳໃຊ້ໂອກາດເຫຼົ່ານີ້ສົ່ງເສີມການແລກປ່ຽນໃນຂະແໜງການສິລະປະພື້ນເມືອງ ແລະ ຫັດຖະກຳລະຫວ່າງລາວ ແລະ ຍີ່ປຸ່ນ ແລະຮ່ວມກັນສົ່ງເສີມອຸດສາຫະກຳເຄື່ອງຫັດຖະກຳໃຫ້ຍືນຍົງ.

แชร์