ພິທີສົ່ງຜູ້ເຂົ້າຮ່ວມໂຄງການຝຶກອົບຮົມຍົກລະດັບຄວາມເປັນຜູ້ນໍາ ສໍາລັບພະນັກງານນຳພາ-ຄຸ້ມຄອງ ຂອງພັກປະຊາຊົນປະຕິວັດລາວ

ໃນວັນທີ 8 ທັນວາ 2023, ທີ່ສະຖານທູດຍີ່ປຸ່ນປະຈໍາ ສປປ ລາວ ຈັດພິທີລ້ຽງສົ່ງຄະນະຜູ້ເຂົ້າຮ່ວມໂຄງການຝຶກອົບຮົມຍົກລະດັບຄວາມເປັນຜູ້ນໍາສໍາລັບພະນັກງານນຳພາ-ຄຸ້ມຄອງ ຂອງພັກປະຊາຊົນປະຕິວັດລາວກ່ອນການເດີນທາງໄປຍີ່ປຸ່ນ, ໂດຍພະນັກງານການນໍາລະດັບຮອງລັດຖະມົນຕີ, ຫົວໜ້າກົມ ແລະທຽບເທົ່າຈາກທ້ອງຖິ່ນ ທັງ 16 ທ່ານ ຈະເຂົ້າຮ່ວມການຝຶກອົບຮົມ ຕັ້ງແຕ່ວັນທີ 10-17 ທັນວາ 2023. ໃນໄລຍະການຝຶກອົບຮົມບັນດາການນໍາຈະໄດ້ຮັບຟັງການປະທະຄະຖາ, ແລກປ່ຽນປຶກສາຫາລື ກ່ຽວກັບຫົວຂໍ້ຕ່າງໆ ທີ່ສໍາຄັນສໍາລັບວຽກງານການປົກຄອງທີ່ມີປະສິດທິພາບໂດຍອີງຕາມບົດຮຽນທາງດ້ານເສດຖະກິດ ແລະສັງຄົມຂອງຍີ່ປຸ່ນ, ແລະຍັງມີກິດຈະກຳອີກຫຼາກຫຼາຍ ທີ່ທາງສະຖາບັນ GRIPS ໄດ້ຈັດສັນໄວ້.

ທ່ານ ໂຄບະຢະຊິ ເຄັນອິຈິ, ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງຍີ່ປຸ່ນປະຈໍາ ສປປ ລາວ ໄດ້ສະແດງຄວາມຊົມເຊີຍຕໍ່ຄວາມພະຍາຍາມຂອງອຳນາດການປົກຄອງຝ່າຍລາວ ແລະຍີ່ປຸ່ນ, ໂດຍສະເພາະຄະນະຈັດຕັ້ງສູນກາງພັກ ແລະອົງການ JICA ປະຈໍາລາວ ທີ່ຈັດຕັ້ງປະຕິບັດໂຄງການນີ້ອີກຄັ້ງເຊິ່ງແມ່ນຄັ້ງທີ 2 ຂອງປີນີ້, ທ່ານທູດໄດ້ກ່າວວ່າການຝຶກອົບຮົມຄັ້ງນີ້ຈະຊ່ວຍໃຫ້ການນໍາລາວສາມາດປະກອບສ່ວນແກ້ໄຂບັນຫາທີ່ລັດຖະບານລາວກຳລັງປະສົບຢູ່, ແລະສົ່ງເສີມໃຫ້ສາຍພົວພັນ ຍີ່ປຸ່ນ-ລາວ ນັບມື້ນັບເຂັ້ມແຂງຂຶ້ນ.

ໂອກາດນີ້, ທ່ານ ລັນ ແສງອາພອນ, ຮອງລັດຖະມົນຕີ ກະຊວງໂຍທາທິການ ແລະຂົນສົ່ງໃນນາມຕາງໜ້າຜູ້ເຂົ້າຮ່ວມຝຶກອົບຮົມໄດ້ສະແດງຄວາມມຸ່ງໝັ້ນຕໍ່ໂອກາດການຝຶກອົບຮົມໃນຄັ້ງນີ້ວ່າ ຈະພະຍາຍາມ ຈົນສຸດຄວາມສາມາດ ແລະນໍາໃຊ້ຄວາມຮູ້ທີ່ໄດ້ຮັບມາ ເພື່ອສົ່ງເສີມຄວາມຈະເລີນກ້າວໜ້າຂອງປະເທດຊາດໃນອະນາຄົດ.

ສໍາລັບໂຄງການຝຶກອົບຮົມນີ້ແມ່ນໄດ້ຖືກຈັດຂຶ້ນໃນປີ 2017, 2019 ແລະເດືອນ 3 ປີ 2023, ເງິນຄັ້ງນີ້ຈະເປັນຄັ້ງທີ 4. ໂຄງການນີ້ເອງຈະເປີດໂອກາດໃຫ້ການນໍາຮຸ່ນໃໝ່ຂອງລາວໄດ້ຮັບຄວາມຮູ້ດ້ານການພັດທະນາເສດຖະກິດ ສັງຄົມ, ແລະ ການບໍລິຫານຂອງປະເທດຍີ່ປຸ່ນ ຢ່າງເລິກເຊິ່ງ. ແລະຄາດຫວັງວ່າການແບ່ງປັນປະສົບການຂອງຍີ່ປຸ່ນໂດຍຜ່ານໂຄງການນີ້ຈະປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ແລະນໍາໄປສູ່ສາຍພົວພັນມິດຕະພາບຍີ່ປຸ່ນ-ລາວ ອັນດີຍິ່ງຂຶ້ນ.

แชร์