2 ບ້ານ ມ.ອະນຸວົງ ພ້ອມສົ່ງງົວ ຕາມສັນຍາຄືນກຸ່ມບໍລິສັດ ຄໍາໄພຊະນະ

ຕາມຂໍ້ມູນຈາກ ຖວທ.ຊສບ ອົງການຂ່າວຂອງແຂວງໄຊສົມບູນ ໃຫ້ຮູ້ວ່າ: ຊາວບ້ານເຂດຈຸດສຸມບ້ານອອມ ແລະ ບ້ານກໍໄຮ, ເມືອງອະນຸວົງ, ແຂວງໄຊສົມບູນ ພ້ອມສົ່ງງົວຄືນໃຫ້ແກ່ກຸ່ມບໍລິສັດ ຄໍາໄພຊະນະ ຕາມສັນຍາໃນໂຄງການ KPG ພັດທະນາກະສິກໍາ ແລະປ່າໄມ້ແຂວງໄຊສົມບູນ ທີ່ໄດ້ນໍາງົວແມ່ພັນ 209 ໂຕມາຊຸກຍູ້ ສົ່ງເສີມປະຊາຊົນທຸກຍາກ ຈໍານວນ 104 ຄອບຄົວທີ່ໄດ້ຄົບຮອບຕາມກໍານົດເວລາ 4 ປີ ດ້ວຍບັນຍາກາດແຫ່ງອົບອຸ່ນຂອງທັງຜູ້ໃຫ້ ແລະຜູ້ໃຫ້ເຊິ່ງໂຄງການດັ່ງກ່າວກໍ່ເພື່ອຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະແຜນພັດທະນາເສດຖະກິດ-ສັງຄົມຂອງລັດຖະບານ; ...

ພິທີດີໆດັ່ງກ່າວ ໄດ້ຈັດຂຶ້ນໃນຕອນເຊົ້າຂອງວັນທີ 7 ທັນວາ 2023 ນີ້ ຢູ່ທີ່ຫ້ອງການບ້ານອອມໂດຍການເຂົ້າຮ່ວມເປັນປະທານຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງ, ມີທ່ານ ບຸນທອນ ປັນແກ້ວ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ, ທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະ ຈໍາກັດຜູ້ດຽວ, ມີພະແນກການທີ່ກ່ຽວຂ້ອງຂັ້ນແຂວງ ແລະ ເມືອງອະນຸວົງ, ອໍານາດການປົກຄອງພ້ອມດ້ວຍປະຊາຊົນທັງ 2 ບ້ານ ເຂົ້າຮ່ວມ.

ໂຄງການຊຸກຍູ້ສົ່ງເສີມການລ້ຽງງົວໃນຮູບ ແບບ 2+3 ຢູ່ບ້ານອອມ ແລະບ້ານກໍໄຮ ໃນໄລຍະ 4 ປີ ຊຶ່ງແຕ່ວັນທີ 11 ພະຈິກ 2019 ຫາ 11 ພະຈິກ 2023 ບໍລິສັດ ໄດ້ສະໜອງດ້ານແນວພັນຫຍ້າ ໃຫ້ເມືອງ 2.500 ກິໂລ ໃນນີ້ບ້ານອອມ ແລະບ້ານກໍໄຮ ໄດ້ຮັບ 1.980 ກິໂລ ໃນເນື້ອທີ່ 128 ຮຕ, ໃນປີ 2019 ປັດຈຸບັນເພີ່ມຂຶ້ນ 250 ຮຕ, ໄດ້ເອົາແນວພັນງົວມາຊຸກຍູ້ສົ່ງເສີມປະຊາຊົນບ້ານອອມ ແລະ ບ້ານກໍໄຮ 209 ໂຕ ລວມມູນຄ່າທັງໝົດ 1,25 ຕື້ກ່ວາກີບ, ມີກຸ່ມລ້ຽງງົວ 10 ກຸ່ມ ໃນນີ້ ບ້ານອອມ 72 ຄອບຄົວ ມີ 7 ກຸ່ມ, ບ້ານກໍໄຮ 32 ຄອບຄົວ ມີ 3 ກຸ່ມ;

ຜ່ານການຈັດຕັ້ງປະຕິບັດໂຄງການ ມາຮອດປັດຈຸບັນມີງົວທັງໝົດ 446 ໂຕ, ງົວຜູ້ 129 ໂຕ ໃນນີ້ງົວເກີດໃໝ່ ຢູ່ 2 ບ້ານ ມີ 292 ໂຕ, ງົວຜູ້ 139 ໂຕ (ງົວນ້ອຍ ຕາຍທັງໝົດ 20 ໂຕ), ງົວທີ່ເກີດໃໝ່ຍັງມີຊີວິດ 272 ໂຕ, ແມ່ພັນ ທີ່ເອົາມາຊຸກຍູ້ປະຊາຊົນຕາຍຍ້ອນສະພາບດິນຟ້າອາກາດປ່ຽນແປງ ແລະ ພະຍາດຕ່າງໆ ທັງໝົດ 36 ໂຕ ຍັງເຫຼືອ 173 ໂຕ, ຜ່ານການລົງປະເມີນ ຖອນງົວຄືນຕົ້ນທຶນຂອງໂຄງການ ສາມາດຖອນຄືນໄດ້ຕົວຈິງທັງໝົດ 179 ໂຕ, ໃນນີ້ ງົວຜູ້ 70 ໂຕ, ງົວແມ່ 109 ໂຕ, ທຽບໃສ່ຕົ້ນທຶນ 209 ໂຕສາ ມາດຖອນໄດ້ 86 %, ຍັງເຫຼືອເປັນແນວພັນໃຫ້ປະ ຊາຊົນ 242 ໂຕ ຄິດເປັນເງິນຕາມມູນຄ່າຕົວ ຈິງ 1.19 ຕື້ກ່ວາກີບ, ໃນນີ້ ຍັງບໍ່ໄດ້ປະເມີນ 2 ຄອບຄົວ;

ພ້ອມດຽວກັນນີ້ຕາງໜ້າແຕ່ລະກຸ່ມລ້ຽງງົວ ທັງ 2 ບ້ານ ກໍ່ໄດ້ມີການແລກປ່ຽນສະແດງຄໍາຄິດ-ຄໍາເຫັນຢ່າງກົງໄປ-ກົງມາ ໃນຂໍ້ສະດວກ ແລະຂໍ້ຫຍຸ້ງຍາກຂອງການເບີ່ງແຍງດູແລຮັກສາສັດລ້ຽງຂອງຕົນໃຫ້ມີສຸຂະພາບແຂງແຮງ, ປັດສະຈາກໂລກໄພຕ່າງໆ ທີ່ຈະເກີດຂື້ນຕາມລະດູການ.

ໃນໂອກາດນີ້; ຄະນະປະທານກໍ່ໄດ້ຜັດປ່ຽນກັນ ມີຄໍາຄິດ-ຄໍາເຫັນໂອ້ລົມ ຕໍ່ພິທີຊຶ່ງແຕ່ລະທ່ານກໍ່ໄດ້ສະແດງຄວາມຍ້ອງຍໍຊົມເຊີຍປະຊາຊົນທັງ 2 ບ້ານ ທີ່ມີຄວາມດຸໝັ່ນຂະ ຫຍັນພຽນ ທີ່ໄດ້ພ້ອມກັນປະຕິບັດ ຕາມຄໍາແນະນໍາຂອງໂຄງການ ຈົນສາມາດບັນລຸຜົນສໍາເລັດ ແລະ ມອບ-ສົ່ງ ງົວຄືນ ໃຫ້ແກ່ກຸ່ມບໍລິສັດທັນຕາມກໍານົດເວລາທີ່ໂຄງການວາງໄວ້ ແລະ ຈໍານວນງົວ ທີ່ສົ່ງຄືນໃຫ້ບໍລິສັດນັ້ນ ທາງບໍລິສັດ ຈະໄດ້ນໍາໄປມອບໃຫ້ຄອບຄົວທຸກຍາກອື່ນໆ ທີ່ມີເງື່ອນໄຂພາຍໃນແຂວງໄຊສົມບູນຕໍ່ໄປ; ພ້ອມນີ້, ຍັງໄດ້ຮຽກຮ້ອງໃຫ້ສະມາຊິກກຸ່ມລ້ຽງງົວຂອງໂຄງການຈົ່ງສືບຕໍ່ເພີ່ມທະວີປະຕິບັດຕາມຫຼັກການຂອງການລ້ຽງສັດ, ປະຕິບັດຕາມຄໍາແນະນໍາຂອງສັດຕະວະແພດເປັນຕົ້ນຕ້ອງໄດ້ສ້າງຄອກໃຫ້ສັດນອນ, ເອົາໃຈໃສ່ດູແລສຸຂະພາບສັດ, ປູກຫຍ້າລ້ຽງສັດໃຫ້ພຽງພໍກັບຈໍານວນຝູງສັດໃນຄອບຄົວ ແລະເກັບຖະໜອມອາຫານສັດໄວ້ໃຫ້ສັດໃນຍາມຂາດແຄນລະດູແລ້ງແຕ່ລະປີ.

แชร์