ກຽມພັດທະນາແຫຼ່ງທ່ອງທ່ຽວສວນກາເຟ

ພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການສຶກສາສໍາຫຼວດ​-ອອກແບບການພັດທະນາແຫຼ່ງທ່ອງທ່ຽວສວນກາເຟ ເມືອງປາກຊ່ອງ ແຂວງຈຳປາສັກ ລະຫວ່າງ​ກຸ່ມບໍລິສັດ​ດາວເຮືອງ​ ຈໍາກັດຜູ້ດຽວ​ ແລະ​ບໍລິສັດ​ ກຸຍໂຈ ນານຊານ​ ຮົວຫ້າວເຢ້ (GUIZHOU NANSHAN HUAHAOYUE CO.LTD) ແຫ່ງ​ ສປ​ ຈີນ​ ຮ່ວມກັບ​ບໍລິສັດ ອາລິສາມະຫາຊັບສຳຫຼວດ ແລະ ຂຸດຄົ້ນບໍ່ແຮ່ຈຳກັດ ໄດ້ຈັດຂຶ້ນເມື່ອບໍ່ດົນມານີ້ ທີ່ໂຮງແຮມຈໍາປາສັກແກຣນ​ ນະຄອນປາກເຊ​ ແຂວງຈໍາປາສັກ​, ຮ່ວມລົງນາມໃນຄັ້ງນີ້ລະຫວ່າງທ່ານນາງ ເຫຼື້ອງ ລິດດັງ ປະທານກຸ່ມບໍລິສັດດາວເຮືອງ ຈໍາກັດຜູ້ດຽວ, ທ່ານ ລີ ຈິງ (Li JING) ປະທານບໍລິສັດ ກຸຍໂຈ ນານຊານ ຮົວຫ້າວເຢ້ ແຫ່ງ ສປ ຈີນ ແລະ ທ່ານ ນາງ ອານິສາ ໄຊຍະກຸມ ມານ ປະທານບໍລິສັດ ອາລິສາມະຫາຊັບສໍາຫຼວດ ແລະ ຂຸດຄົ້ນບໍ່ແຮ່ຈໍາກັດເປັນກຽດເຂົ້າຮ່ວມເປັນສັກຂີພິຍານຂອງ​ທ່ານ​ ນາງ​ ວາດສະໜາ​ ສີລິ​ມາ​ ປະທານ​ແນວ​ລາວ​ສ້າງ​ຊາດ​ແຂວງ,​ ທ່ານ​ ວັນ​ນະໄຊ ຊາດຕະກຸນ ຫົວໜ້າ​ຫ້ອງວ່າການແຂວງ,​ ມີນັກທຸລະກິດ, ຜູ້ປະກອບການ​, ພະນັກງານວິຊາການ​ທີ່ກ່ຽວຂ້ອງ​ພາຍໃນ 3 ບໍລິສັດ​ເຂົ້າຮ່ວມ.​

ການເຊັນບົດບັນທຶກຄັ້ງນີ້ຈັດຂຶ້ນເພື່ອດໍາເນີນການຮ່ວມມືສໍາຫຼວດ-ອອກແບບການລົງທຶນພັດທະນາສວນກາເຟຂອງກຸ່ມບໍລິ ສັດດາວເຮືອງ ຈຳກັດຜູ້ດຽວຢູ່ 2 ບ້ານຂອງເມືອງປາກຊ່ອງ ແຂວງຈຳປາສັກຄື: ບ້ານຈັນສະຫວ່າງ ແລະບ້ານໜອງເຂືອງ ເພື່ອສ້າງເປັນແຫຼ່ງທ່ອງທ່ຽວທຳມະຊາດ-ວັດທະນະທໍາ ແລະການເພີ່ມມູນຄ່າຜະລິດຕະພັນກາ ເຟ-ວັດທະນະທໍາທີ່ກ່ຽວຂ້ອງກັບກາເຟລາວຮ່ວມມືກັນພັດທະນາສວນກາເຟເພື່ອການທ່ອງທ່ຽວ ແລະຍົກລະດັບມູນຄ່າຜະລິດ ຕະພັນກາເຟລາວຊຶ່ງລວມທັງບັນດາວັດທະນະທຳ-ວິຖີການດຳລົງຊີວິດຂອງຊົນເຜົ່າທີ່ກ່ຽວຂ້ອງກັບວົງຈອນ, ການຜະລິດກາເຟ, ການປູກກາເຟຈົນຮອດຂັ້ນຕອນການດື່ມກາເຟລາວ ແນໃສ່ໃຫ້ນັກທ່ອງທ່ຽວຮູ້ຈັກກັບກຳມະວິທີຂອງຂະບວນການຜະ ລິດກາເຟລາວ, ການດຳ ເນີນການສຶກສາຄວາມເປັນໄປໄດ້ເບື້ອງຕົ້ນໃນການສໍາຫຼວດທີ່ໄດ້ລະບຸໄວ້ໃນບົດບັນທຶກທີ່ເຊັນຄັ້ງນີ້. ບໍລິສັດທີ່ສຶກສາສໍາຫຼວດຈະໄດ້ສໍາຫຼວດນັບແຕ່ດ້ານພູມສັນຖານ ແລະລະດັບຂອງເນື້ອທີ່ດິນ, ພູມອາກາດ-ທໍາມະຊາດ ແລະສິ່ງແວດລ້ອມ ລວມທັງວິຖີການດຳລົງຊີວິດ-ວັດທະນະທໍາຂອງຊົນເຜົ່າທີ່ຕິດພັນໃນຂອບເຂດອ້ອມຮອບໂຄງການພັດທະນາການທ່ອງທ່ຽວສວນກາເຟດັ່ງກ່າວ.
( ຂ່າວ: ວັນເພັງ

• 11/12/2023