ລັດຖະບານ ປະເທດຝຣັ່ງໃຫ້ທຶນ 550.000 USD ສົ່ງເສີມວຽກງານໂພສະນາການໃນລາວ

ສະຖານທູດຝຣັ່ງ ປະຈຳ ສປປ ລາວ ປະກາດທຶນງົບປະມານ 550.000 ໂດລາສະຫະລັດ ເພື່ອສະໜັບສະໜູນເຂົ້າໃນຄວາມພະຍາຍາມຂອງລັດຖະບານເພື່ອຮັບປະກັນການເຂົ້າເຖິງອາຫານ ໃຫ້ແກ່ປະຊາຊົນ 10.000 ກວ່າຄົນ ໃນແຂວງສາລະວັນ ພາຍໃຕ້ການຈັດຕັ້ງປະຕິບັດຜ່ານໂຄງການຂອງອົງການອາຫານໂລກ ປະຈຳ ສປປ ລາວ (WFP) .

ນຳພາໂດຍກະຊວງກະສິກຳ ແລະປ່າໄມ້ ແລະ ກະຊວງສາທາລະນະສຸກໂຄງການນີ້, ແມ່ນການສານຕໍ່ກິດຈະກຳດ້ານໂພຊະນາການທີ່ໄດ້ມີການຈັດຕັ້ງປະຕິບັດມາແລ້ວ ໂດຍການຮ່ວມມືກັບປະເທດຝຣັ່ງ ແລະອົງການອາຫານໂລກທາງພາກໃຕ້ຂອງລາວ ປະຊາຊົນຈໍານວນ 1.818 ຄອບຄົວ ໃນແຂວງສາລະວັນ ຈະໄດ້ຮັບເງິນຊ່ວຍເຫຼືອຈຳນວນໜຶ່ງ ເພື່ອຕອບສະໜອງຄວາມຕ້ອງການດ້ານສະບຽງອາຫານ ແລະສາມາດນຳໄປລົງທຶນເຂົ້າໃນວຽກງານສົ່ງເສີມຊີວິດການເປັນຢູ່.

ໂຄງການນີ້, ແມ່ນຈະເນັ້ນໃສ່ການສະໜອງການຊ່ວຍເຫຼືອແກ່ ແມ່ຍິງ ແລະເດັກນ້ອຍທີ່ມີຄວາມສ່ຽງ ແລະເດັກນ້ອຍທີ່ມີອາຍຸຕໍ່າກວ່າ 5 ປີ ເປັນຕົ້ນຕໍການຄັດເລືອກຊຸມຊົນແມ່ນອີງໃສ່ລະດັບຄວາມທຸກຍາກສູງຄະແນນການບໍລິໂພກອາຫານອັດຕາການຮູ້ໜັງສືຕໍ່າ ແລະຈໍານວນໄພພິບັດທີ່ເກີດຂຶ້ນລວມເຖິງບັນດາປັດໃຈອື່ນໆນຳອີກ. ປະມານ 43 ສ່ວນຮ້ອຍຂອງເດັກນ້ອຍທີ່ມີອາຍຸຕໍ່າກວ່າ 5 ປີ ຢູ່ໃນແຂວງສາລະວັນທາງພາກໃຕ້ຂອງ ສປປ ລາວ ມີພາວະຂາດສານອາຫານການຈະເລີນເຕີບໂຕຊ້າ ອັດຕານໍ້າໜັກຕໍ່າເມື່ອທຽບກັບລວງສູງຂອງເດັກໃນກຸ່ມອາຍຸດຽວກັນ ແລະຄ່າສະເລ່ຍແຫ່ງຊາດ.

ໃນປັດຈຸບັນປະຊາຊົນໃນເຂດທຸກຍາກທີ່ສຸດຂອງແຂວງສາລະວັນກຳລັງປະສົບກັບຄວາມຫຍຸ້ງຍາກໃນການດຳລົງຊີວິດເປັນຜົນສະທ້ອນຈາກການວິກິດການດ້ານເສດຖະກິດມະຫາພາກໃນທົ່ວປະເທດ.

ທ່ານ ທັດສະກາ ສະພັງທອງ ຫົວໜ້າກົມແຜນການ ແລະການຮ່ວມມືກະຊວງກະສິກຳ ແລະປ່າໄມ້ ກ່າວວ່າ: ການສະໜັບສະໜູນຈາກຝຣັ່ງ ແລະອົງການອາຫານໂລກ ຄັ້ງນີ້, ແມ່ນສອດຄ່ອງກັບເປົ້າໝາຍຂອງລັດຖະບານຂອງພວກເຮົາເປັນການປະກອບສ່ວນເຂົ້າໃນການປະຕິບັດເປົ້າໝາຍການຄໍ້າປະກັນສະບຽງອາຫານ ແລະ ໂພຊະນາການທີ່ໄດ້ກຳນົດໄວ້ໃນແຜນພັດທະນາເສດຖະກິດ-ສັງຄົມ ຄັ້ງທີ 9 ເຊິ່ງເປັນການສານຕໍ່ກິດຈະກຳທີ່ພວກເຮົາກໍ່ຄືຂະແໜງກະສິກຳ ແລະ ປ່າໄມ້ ແລະ ອົງການອາຫານໂລກໄດ້ຮ່ວມມືກັນຈັດຕັ້ງປະຕິບັດໃນໄລຍະຜ່ານມາເພື່ອແນໃສ່ພັດທະນາຊົນນະບົດ ແລະຫຼຸດຜ່ອນຄວາມທຸກຍາກໃນຂອບເຂດທົ່ວປະເທດ” ທ່ານ ຊີບແລງ ຊົວ ເອກອັກຄະລັດຖະທູດຝຣັ່ງ ປະຈຳລາວ ກ່າວວ່າ: ນັບແຕ່ປີ 2019 ເປັນຕົ້ນມາ ປະເທດຝຣັ່ງໄດ້ດຳເນີນໂຄງການຊ່ວຍເຫຼືອດ້ານສະບຽງອາຫານເພື່ອຕອບສະໜອງຄວາມຕ້ອງການຂອງ ສປປ ລາວ ໂຄງການໃໝ່ຂອງພວກເຮົາໃນປີ 2023 ມີເປົ້າໝາຍເນັ້ນໃສ່ຊຸມຊົນຊົນເຂດຫ່າງໄກສອກຫຼີກໃນເຂດພາກໃຕ້ຂອງລາວ ເປັນການເພີ່ມການສະໜັບສະໜູນການຊ່ວຍເຫຼືອທີ່ໄດ້ປະກາດໃນຕົ້ນປີນີ້ໃຫ້ແກ່ແຂວງເຊກອງ.

ທ່ານ ມາກ ອານເດຣ ໂປຣສ ຜູ້ຕາງໜ້າອົງການອາຫານໂລກ ປະຈຳ ສປປ ລາວ ກ່າວວ່າ: ວິກິດການທາງດ້ານເສດຖະກິດໃນປັດຈຸບັນເປັນໄພຂົ່ມຂູ່ໃນການທີ່ຈະທຳລາຍເປົ້າໝາຍຕ່າງໆ ທີ່ ສປປ ລາວ ເຮັດໄດ້ໃນສອງທົດສະວັດທີ່ຜ່ານມາໂດຍສະເພາະແມ່ນກ່ຽວກັບຄວາມໝັ້ນຄົງທາງດ້ານສະບຽງອາຫານ ແລະການປັບປຸງໂພຊະນາການດັ່ງນັ້ນ, ການສະໜອງທຶນການຊ່ວຍເຫຼືອຈາກຝຣັ່ງ ແມ່ນສິ່ງທີ່ຈໍາເປັນເພື່ອຊ່ວຍເຫຼືອບັນດາຄອບຄົວຈາກຜົນກະທົບ ແລະສິ່ງທ້າທາຍໃນປັດຈຸບັນພ້ອມນັ້ນ, ຍັງເປັນການສ້າງຄວາມທົນທານໃຫ້ແກ່ພວກເຂົາໃນໄລຍະຍາວອີກດ້ວຍ.
ທີ່ມາ: ອົງການອາຫານໂລກ

แชร์