ຖວທ ພ້ອມຍື່ນມືຊ່ວຍພາກທຸລະກິດທ່ອງທ່ຽວ

ໃນວັນທີ 6 ທັນວາ 2023 ທີ່ກະຊວງຖະແຫຼງຂ່າວ ວັດທະນະທໍາ ແລະທ່ອງທ່ຽວ (ຖວທ); ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍານັບຂອງ ທ່ານ ຈ້າວຫ່າຍເຟີງ ປະທານບໍລິສັດ ກຸ້ຍໂຈໜານຊ່ານຫົ່ວຫ່າວເຢ້ຢວນ ສປ ຈີນ ພ້ອມດ້ວຍຄະນະນັກທຸລະກິດລາວ ມີທ່ານ ນາງ ອານິສາ ໄຊຍະກຸມມານ ປະທານບໍລິສັດ ບໍລະເວນແຜ່ນດິນຄຳ ທ່ອງທ່ຽວ ຈຳກັດຜູ້ດຽວ ແລະນັກທຸລະກິດນະຄອນກຸ້ຍຢາງ ແຂວງກຸ້ຍໂຈ ສປ ຈີນ.

ໂອກາດນີ້; ທ່ານ ຈ້າວຫ່າຍເຟີງ ໄດ້ລາຍງານຄວາມເປັນມາ ແລະຄວາມຄືບໜ້າຂອງໂຄງການພັດທະນາແຫຼ່ງທ່ອງທ່ຽວ ທີ່ນັກທຸລະກິດລາວ ແລະຈີນຮ່ວມມືກັນ ຈັດຕັ້ງປະຕິບັດຢູ່ເມືງປາກຊ່ອງ, ແຂວງຈຳປາສັກ ແລະຢູ່ນະຄອນກຸ້ຍຢາງ ແຂວງກຸ້ຍໂຈ ສປ ຈີນ ກໍຄືລະຫວ່າງບໍລິສັດ ກຸ້ຍໂຈໜານຊ່ານຫົ່ວຫ່າວເຢ້ຢວນ ແລະ ບໍລິສັດບໍລະເວນແຜ່ນດຳນຄຳທ່ອງທ່ຽວ ຈຳກັດ ເຊິ່ງເປັນໂຄງການໜຶ່ງທີ່ເປັນການຈັດຕັ້ງຜັນຂະຫຍາຍໜຶ່ງແລວໜຶ່ງເສັ້ນທາງ ທີ່ຈະໄດ້ຈັດຕັ້ງປະຕິບັດຮ່ວມກັນໂດຍບໍລິສັດ ຈະໄດ້ພັດທະນາແຫຼ່ງທ່ອງທ່ຽວແບບຄົບວົງຈອນ ຢູ່ເມືອງປາກຊ່ອງ; ປັດຈຸບັນ, ໜ້າວຽກຫຼັກຂອງໂຄງການໄດ້ມີການສຳຫຼວດອອກແບບໃນເບື້ອງຕົ້ນແລ້ວ ສ່ວນໂຄງການສ້າງສວນຈຳລອງວັດທະນະທຳລາວ ຢູ່ນະຄອນກຸ້ຍຢາງ ທັງສອງຝ່າຍໄດ້ມີການເຊັນບົດບັນ ທຶກຮ່ວມກັນແລ້ວໃນທ້າຍເດືອນ 11 ຜ່ານມານີ້ ໂດຍລວມແລ້ວທັງສອງໂຄງການທີ່ບໍລິສັດພວມຈັດຕັ້ງປະຕິບັດຢູ່ສອງປະເທດລາວ-ຈີນ ເປັນໂຄງການໜຶ່ງ ທີ່ຈະດຶງດູດນັກທ່ອງທ່ຽວຈີນ ມາທ່ອງທ່ຽວປະເທດລາວ ໃຫ້ນັບມື້ນັບຫຼາຍຂຶ້ນ.

ໃນການຕ້ອນຮັບຄັ້ງນີ້; ທ່ານລັດຖະມົນຕີ ສວນສະຫວັນ ວິຍະເກດ ໄດ້ສະແດງຄວາມຍິນດີຕໍ່ນັກທຸລະກິດຈີນກໍຄືນັກທຸລະກິດແຂວງກຸ້ຍໂຈທີ່ມີຄວາມສົນໃຈມາລົງທຶນພັດທະນາສະຖານທີ່ທ່ອງທ່ຽວ ຢູ່ລາວໂດຍສະເພາະຢູ່ເມືອງປາກຊ່ອງຮ່ວມກັບນັກທຸລະກິດລາວເຊິ່ງໂຄງການບໍລິສັດທີ່ກຳລັງຈັດຕັ້ງປະຕິບັດນີ້ແມ່ນຖືກເປົ້າໝາຍການພັດທະນາການທ່ອງທ່ຽວຂອງກະຊວງ ຖວທ ທີ່ສົ່ງເສີມການທ່ອງທ່ຽວສະອາດ ແລະ ຖືກກັບແນວທາງຂອງລັດຖະບານລາວທີ່ໄດ້ກຳນົດເອົາການທ່ອງທ່ຽວເປັນເສດຖະກິດປາຍແຫຼມໃນການສ້າງລາຍຮັບເພື່ອພັດທະນາປະເທດຊາດ;

ສໍາລັບຢູ່ ສປປ ລາວ ມີສະຖານທີ່ທ່ອງທ່ຽວຫຼາຍແຫ່ງທີ່ຍັງບໍ່ທັນໄດ້ຮັບການພັດທະນາອັນເນື່ອງຈາກລັດຖະບານມີງົບຈຳກັດ, ຖ້າມີນັກທຸລະກິດຕ່າງປະເທດກໍຄືນັກທຸລະກິດຈີນມີຄວາມສົນໃຈມາພັດທະນາແຫຼ່ງທ່ອງທ່ຽວຢູ່ລາວກໍຍິ່ງດີ; ສ່ວນໂຄງການສ້າງສວນຈຳລອງວັດທະນະທຳລາວຢູ່ນະຄອນກຸ້ຍຢາງເປັນໂຄງການໜຶ່ງທີ່ຈະຊ່ວຍເຜີຍແຜ່ວັດທະນະລາວ ແລະປະເທດລາວ ໃຫ້ຊາວຈີນໄດ້ຮັບຮູ້ຫຼາຍຂຶ້ນ ແລະຖ້າໂຄງການຫາກຈັດຕັ້ງປະຕິບັດເຊື່ອວ່າຈະເປັນໂຄງການໜຶ່ງທີ່ຈະດຶງດູດເອົານັກທ່ອງທ່ຽວຈີນ ມາທ່ຽວລາວຫຼາຍຂຶ້ນໃນອະນາຄົດ; ພ້ອມນີ້, ທ່ານລັດຖະມົນຕີ ຍັງແນະນໍາໃຫ້ບໍລິສັດພົວພັນກັບກົມວິຊາການໄດ້ ແລະກະຊວງ ຖວທ ຍິນດີທີ່ຈະສະໜັບສະໜູນຊຸກຍູ້ຊ່ວຍເຫຼືອພາກທຸລະກິດໃຫ້ດຳເນີນທຸລະກິດຖືກຕ້ອງຕາມລະບຽບກົດໝາຍຂອງລາວທັງນີ້ເພື່ອພ້ອມກັນພັດທະນາສອງຊາດລາວ-ຈີນໃຫ້ຈະເລີນຮຸ່ງເຮືອງສີວິໄລເປັນກ້າວໆ.

แชร์