ລາວ-ຫວຽດນາມ ສືບຕໍ່ການຮ່ວມມືວຽກໄອຍະການປະຊາຊົນ

ໃນວັນທີ 5 ທັນວາ 2023 ນີ້, ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມຄະນະ ໄດ້ພົບປະກັບຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ນຳໂດຍ ສະຫາຍ ເລມິງ ຈີ ກໍາມະການສູນກາງພັກຄອມມຸຍນິດຫວຽດນາມ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໂອກາດເດີນທາງໄປເຂົ້າຮ່ວມກອງປະຊຸມ ໄອຍະການສູງສຸດ ຈີນ-ອາຊຽນ ຄັ້ງທີ 13 ທີ່ຈັດຂຶ້ນທີ່ ນະຄອນຫລວງ ຮ່າໂນ້ຍ ສສ ຫວຽດນາມ.

ໃນວະລະດັ່ງກ່າວ, ສະຫາຍ ໄຊຊະນະ ໂຄດພູທອນ ໄດ້ສະແດງຄວາມຂອບໃຈເປັນຢ່າງສູງ ມາຍັງ ສະຫາຍ ເລມິງ ຈີ ທີ່ໄດ້ເຊື້ອເຊີນ ແລະ ຕ້ອນຮັບດ້ວຍໄມຕິຈິດມິດຕະພາບອັນອົບອຸ່ນ ໃນການມາຢ້ຽມຢາມ ແລະເຮັດວຽກຢູ່ ສສ ຫວຽດນາມ ແລະ ຂໍສະແດງຄວາມຊົມເຊີຍ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ທີ່ໄດ້ຮັບກຽດເປັນເຈົ້າພາບຈັດກອງປະຊຸມຫົວໜ້າອົງການໄອຍະການ ຈີນ-ອາຊຽນ ຄັ້ງທີ່ 13 ນີ້.

ໂອກາດນີ້, ສອງຝ່າຍພ້ອມກັນຕີລາຄາສູງຕໍ່ຜົນສໍາເລັດຂອງການພົວພັນ-ຮ່ວມມື ສອງຝ່າຍເປັນຢ່າງດີ, ໃນຕໍ່ໜ້າຈະສືບຕໍ່ແລກປ່ຽນຄະນະຜູ້ແທນໃນຂັ້ນສູນກາງ ແລະ ທ້ອງຖິ່ນ, ແລກປ່ຽນບົດຮຽນກ່ຽວກັບການຕິດຕາມກວດກາການດຳເນີນຄະດີປົກຄອງ, ການຕ້ານ ແລະ ສະກັດກັ້ນອາຊະຍາກຳຂ້າມຊາດ; ສ້າງພະນັກງານໄອຍະການປະຊາຊົນຢູ່ ສສ ຫວຽດນາມ ລະດັບປະລິນຍາຕີ, ປະລິນຍາໂທ ຢູ່ມະຫາວິທະຍາໄລໄອຍະການ; ກໍ່ສ້າງ ແລະບຳລຸງພະນັກງານໄອຍະການຢູ່ ສສ ຫວຽດນາມ ແລະ ວຽກງານອື່ນໆ, ປະກອບສ່ວນເຂົ້າໃນການຕ້ານອາຊະຍາກຳຂ້າມຊາດ, ພັດທະນາອົງການໄອຍະການປະຊາຊົນຂອງສອງປະເທດໃຫ້ມີຄວາມເຂັ້ມແຂງ ແລະກ້າວໜ້າຢ່າງບໍ່ຢຸດຢັ້ງ.
ທີ່ມາ: ຂປລ

แชร์