ສສຂ ແລະ ຖວທ ຫາລືກົນໄກປະສານງານ ແລະຮ່ວມມື

ກອງປະຊຸມປຶກສາຫາລືກົນໄກປະສານງານ ແລະຮ່ວມມືລະຫວ່າງຂະແໜງການສາທາລະນະສຸກ ແລະຂະແໜງການຖະແຫຼງຂ່າວວັດທະນາທຳ ແລະທ່ອງທ່ຽວ (ຖວທ) ສໍາລັບ 18 ແຂວງທົ່ວປະເທດໃນການສື່ສານເພື່ອກັນ ແລະຄວບຄຸມພະຍາດໄດ້ຈັດຂຶ້ນໃນລະຫວ່າງວັນທີ 6-8 ທັນວາ 2023 ທີ່ ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານຂອງທ່ານ ວິສິດ ຄໍາລືຊາ ຫົວຫນ້າສູນສະຖິຕິ ແລະຂ່າວສານສາທາລະນະສຸກ (ສສຂ) ກະຊວງສາທາລະນະສຸກ, ມີທ່ານ ດຣ ອິນປົງ ທົງພະຈັນ ຮອງຫົວຫນ້າ ສສຂ, ພ້ອມດ້ວຍພາກສ່ວນທີ່ກ່ຽວຂ້ອງທັງຂະແຫນງການສາລະນະສຸກ ແລະຂະແໜງ ຖວທ ໃນຂອບເຂດທົ່ວປະເທດເຂົ້າຮ່ວມ.

ທ່ານ ວິສິດ ຄໍາລືຊາ ກ່າວວ່າ: ຈຸດປະສົງຂອງກອງປະຊຸມເພື່ອປຶກສາຫາລືກົນໄກການປະສານງານໃນໄລຜ່ານກໍຄືໄລຍະທີ່ມີການລະບາດຂອງພະຍາດໂຄວິດ-19, ຈຸດດີ, ຈຸດອ່ອນ, ຂໍ້ຄົງຄ້າງຂອງການຈັດຕັ້ງປະຕິບັດ ແລະ ກອບຂອງການຮ່ວມມືກັນໃນ ຕໍ່ໜ້າ ໂດຍສະເພາະສຸມໃສ່ການລະບາດຂອງພະຍາດທີ່ອາດຈະເກີດຂຶ້ນໃນອະນາຄົດ.

ໃນກອງປະຊຸມໄດ້ນໍາສະເຫນີກ່ຽວກັບການຈັດຕັ້ງປະຕິບັດວຽກງານການສື່ສານຄວາມສ່ຽງໃນໄລຍະການເກີດລະບາດພະຍາດໂຄວິດ-19 ຂອງສູນສະຖິຕິ ແລະ ຂ່າວສານສາລະນະສຸກ (ການສື່ສານຄວາມສ່ຽງແມ່ນຫຍັງ, ອົງປະກອບການສື່ສານຄວາມສ່ຽງ, ພາລະບົດບາດຂອງສູນ, ການເຮັດວຽກຮ່ວມກັບສື່ມວນຊົນ, ຂໍ້ສະດວກ, ຂໍ້ຫຍຸ້ງຍາກ ແລະບົດຮຽນທີ່ຖອດຖອນໄດ້); ການຮັບຟັງຄຳຄິດເຫັນຂອງສັງຄົມ; ການຈັດຕັ້ງປະຕິບັດການຮັບຟັງວ່າຄິດເຫັນຂອງສັງຄົມໃນໄລຍະຜ່ານມາ;ການເຊື່ອມສານວຽກງານສື່ມວນຊົນກັບການຄວບຄຸມ,ປ້ອງກັນພະຍາດໂດວິດ-19 (ການເຮັດວຽກຮ່ວມກັນລະຫວ່າງຂະແໜງ ສາທາລະນະສຸກ ແລະຂະແໜງ ຖວທ ແຕ່ສູນກາງຮອດທ້ອງຖິ່ນ); ພ້ອມນີ້ ການຈັດຕັ້ງປະຕິບັດການສື່ສານເພື່ອຫລຸດຜ່ອນຄວາມສ່ຽງ ແລະການເຮັດວຽກຮ່ວມກັນລະຫວ່າງຂະແໜງສາທາ ແລະ ຂະແໜງ ຖວທ ຢູ່ໃນຂັ້ນແຂວງ, ເມືອງ ແລະບ້ານ (ພາກເໜືອ, ພາກກາງ ແລະພາກໃຕ້). ນອກນີ້ ການມີສ່ວນຮ່ວມ ແລະເປັນເຈົ້າການໃນວຽກງານໂຄສະນາ ຕ້ານ ແລະຄວບຄຸມພະຍາດໂດວິດ-19 ຂອງທາງສື່ມວນຊົນຜ່ານທາງວິທະຍຸກະຈາຍສຽງແຫ່ງຊາດລາວ, ໂທລະພາບແຫ່ງຊາດລາວ, ໜັງສືພິມ ແລະຂ່າວທາງອອນລາຍຕື່ມອີກ.

แชร์