ສ້າງຄວາມເຂົ້າໃຈກ່ຽວກັບແຜນງານການຢັ້ງຢືນລາວຍືນຍາວ

ສະພາການຄ້າ ແລະອຸດສາຫະກຳແຫ່ງຊາດລາວ ພາຍໃຕ້ໂຄງການ SUSTOUR ລາວ ຈັດກອງປະຊຸມເຜີຍແຜ່ຂໍ້ມູນຂ່າວສານກ່ຽວກັບແຜນງານການຢັ້ງຢືນລາວຍືນຍາວຄັ້ງທີ2 ຂຶ້ນວັນທີ 30 ພະຈິກ 2023 ຢູ່ໂຮງແຮມເສດຖາປາຣັດ ນະຄອນຫຼວງວຽງຈັນ ໂດຍເປັນປະທານຂອງທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະຫັດຖະກຳ ກະຊວງອຸດສາຫະກຳ ແລະການຄ້າ ທ່ານນາງ ຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກຳຊາດລາວ ມີຜູ້ຕາງໜ້າອົງການຈັດຕັ້ງສາກົນທີ່ໃຫ້ການສະໜັບສະໜູນໂຄງການ ແລະພາກສ່ວນກ່ຽວຂ້ອງເຂົ້າຮ່ວມ.

ແຜນງານດັ່ງກ່າວນີ້ເປັນໜຶ່ງໃນໂຄງການ SUSTOUR ລາວ ທີ່ໄດ້ການສະໜັບສະໜູນໂດຍ ສະຫະພາບເອີຣົບ ຜ່ານການຈັດຕັ້ງປະຕິບັດຂອງອົງການແພລນສາກົນປະຈຳ ລາວ ຮ່ວມກັບກະຊວງອຸດສາຫະກຳ ແລະການຄ້າ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະສູນສະຫະພາບເອີຣົບທາງດ້ານລະບົບນິເວດເພື່ອການທ່ອງທ່ຽວ ແລະກະສິກຳ ຈຸດປະສົງເພື່ອຈັດຕັ້ງປະຕິບັດວຽກງານຄວາມຍືນຍົງໃນອຸດສາຫະກຳການທ່ອງທ່ຽວລາວ ໂດຍແຜນງານດັ່ງກ່າວເປັນການຢັ້ງຢືນໃຫ້ຫົວໜ່ວຍທຸລະກິດທ້ອງຖິ່ນທີ່ນອນຢູ່ໃນຂະແໜງການທ່ອງທ່ຽວທີ່ມີຄວາມຕັ້ງໃຈລິເລີ່ມເຮັດທຸລະກິດແບບຍືນຍົງໃຫ້ຄວາມສຳຄັນເລື່ອງສິ່ງແວດລ້ອມສັງຄົມ ແລະເສດຖະກິດເຊິ່ງໄດ້ຮັບການສ້າງຂຶ້ນຈາກແຮງບັນດານໃຈທີ່ມາຈາກແຜນງານການຢັ້ງຢືນຄວາມຍືນຍົງຂອງ ທຣາເວວໄລຟ໌ ເຊິ່ງຢູ່ໃນແຖວໜ້າຂອງສາກົນ ແລະເປັນທີ່ຮູ້ຈັກກ່ຽວກັບການໃຫ້ການຢັ້ງຢືນຄວາມຍືນຍົງແຜນງານການຢັ້ງຢືນລາວຈຶ່ງຖືກປັບດັດມາຈາກແຜນງານດັ່ງກ່າວອອກແບບມາເພື່ອໃຫ້ຍົກລະດັບຄວາມຍືນຍົງຢູ່ໃນຕ່ອງໂສ້ອຸດສາຫະກຳການທ່ອງທ່ຽວລາວຖ້າຜ່ານແຜນງານການຢ້ງຢືນນີ້ ຫົວໜ່ວຍທຸລະກິດໃນລາວຈະໄດ້ຮັບແນວທາງລວມທັງຄຳແນະນຳ ແລະເຝີກອົບຮົມໃນການປັບປຸງການດຳເນີນທຸລະກິດໃຫ້ເຂົ້າເຖິງຄວາມຍືນຍົງໄດ້ຫຼາຍຂຶ້ນເຊິ່ງຈະເລັງໃສ່ 4 ຂະແໜງການທຸລະກິດຄື: ຄົມມະນາຄົມ ແລະຂົນສົ່ງ ອາຫານ ເຄື່ອງດື່ມ ຫັດຖະກຳ ຂອງທີ່ລະນຶກ ແລະການທ່ອງທ່ຽວຮູບແບບວັດທະນະທຳ.

ທ່ານນາງ ແຄຣໍ ໂມເທນເຊັນ ຜູ້ອຳນວຍການອົງການແພຣນສາກົນ ປະຈຳລາວ ກ່າວວ່າ: "ພວກເຮົາມີແຜນຍຸດທະສາດໃນການທີ່ຈະສະໜັບສະໜູນຫົວໜ່ວຍທຸລະກິດຢູ່ລາວເພື່ອຫັນປ່ຽນມາດຳເນີນທຸລະກິດແບບຍືນຍົງ ເພື່ອປະກອບສ່ວນເຂົ້າໃນການຂະຫຍາຍຕົວຂອງເສດຖະກິດແຫ່ງຊາດ” ນີ້ແມ່ນໂອກາດດີໃນການສ້າງຄວາມສາມາດໃຫ້ແກ່ຫົວໜ່ວຍທຸລະກິດຢູ່ໃນຂະແໜງການທ່ອງທ່ຽວເພື່ອໃຫ້ໄດ້ປຽບໃນການແຂ່ງຂັນ ແລະເຂົ້າໃຈກ່ຽວກັບໂຄງການ SUSTOUR ລາວ ແລະ ແຜນງານການຢັ້ງຢືນຂອງລາວຍືນຍາວການໄດ້ຮັບການຢັ້ງຢືນຄວາມຍືນຍົງຈາກລາວຍືນຍາວແມ່ນການຍົກລະດັບທຸລະກິດຂອງເຂົາເຈົ້າໃຫ້ຢູ່ໃນແຖວໜ້າດ້ານຄວາມຍືນຍົງຂອງຂະແໜງການທ່ອງທ່ຽວຢູ່ໃນລາວ.

ທ່ານ ນາງ ຈັນທະຈອນ ວົງໄຊ ກ່າວຕື່ມວ່າ: “ການສົ່ງເສີມຜູ້ປະກອບການກໍຄືຈຸນລະວິສາຫະກິດວິສາຫະກິດຂະໜາດນ້ອຍ ແລະກາງໃນການຮັບເອົາການຢັ້ງຢືນມາດຖານ "ລາວຍືນຍາວ" ຖືເປັນອີກບາດກ້າວໜຶ່ງ ເພື່ອຍົກລະດັບມາດຖານດ້ານຄຸນນະພາບຂອງຜະລິດຕະພັນ ແລະການບໍລິການຂອງລາວໃຫ້ມີຄຸນນະພາບດ້ານສາກົນເພື່ອກ້າວສູ່ການສົ່ງອອກພ້ອມທັງເປັນທີ່ຮັບຮູ້-ຮູ້ຈັກ ທັງພາຍໃນ ແລະຕ່າງປະເທດ” ການເຜີຍແຜ່ແຜນງານລາວຍືນຍາວຍັງແມ່ນບາດກ້າວໜຶ່ງໃນການສ້າງຄວາມຍືນຍົງໃນອຸດສາຫະກຳການທ່ອງທ່ຽວລາວໂດຍການໂຄສະນາເຊີນຊວນຫົວໜ່ວຍທຸລະກິດຫັ້ນປ່ຽນມາເປັນການດຳເນີນທຸລະກິດແບບມີຄວາມຮັບຜິດຊອງຕໍ່ສິ່ງແວດລ້ອມ ແລະສັງຄົມ ແນໃສ່ເພື່ອຮັກສາຄວາມເປັນທຳມະຊາດອັນສວຍງາມຂອງປະເທດ ແລະມໍລະດົກອັນລໍ້າຄ່າທາງວັດທະນະທຳໄປພ້ອມໆກັບການສົ່ງເສີມການຂະຫຍາຍຕົວຂອງເສດຖະກິດໃນປະເທດໃຫ້ນັບມື້ດີຂຶ້ນເທື່ອລະກ້າວ.

ໃນພິທີຍັງໄດ້ມອບໃບຢັ້ງຢືນລາວຍືນຍາວໃຫ້ແກ່ 4 ຫົວໜ່ວຍທີ່ດຳເນີນການເຄື່ອນໄຫວທຸລະກິດໃນຂົງເຂດດັ່ງກ່າວຕື່ມອີກ.

แชร์