ທຫລ-ທຫວ ປະຊຸມທະວິພາຄີ ແລະລົງນາມສົ່ງເສີມສະກຸນເງິນທ້ອງຖິ່ນ ກີບ-ດົງ

ໃນວັນທີ 1 ທັນວາ 2023 ທີ່ນະຄອນຫຼວງພະບາງ, ສປປ ລາວ ໄດ້ມີການຈັດກອງປະຊຸມທະວິພາຄີ ລະຫວ່າງ ທະນາຄານແຫ່ງ ສປປ ລາວ (ທຫລ) ແລະ ທະນາຄານແຫ່ງລັດ ຫວຽດນາມ (ທຫວ) ປະຈໍາປີ 2023 ຂຶ້ນໂດຍການນໍາພາຂອງທ່ານ ບຸນເຫຼືອ ສິນໄຊວໍຣະວົງ, ຜູ້ວ່າການ ທະນາຄານແຫ່ງ ສປປ ລາວ ແລະ ທ່ານ ນາງ ຫງຽນ ທິ ຮົງ, ຜູ້ວ່າການ ທະນາຄານແຫ່ງລັດ ຫວຽດນາມ ພ້ອມດ້ວຍຄະນະຜູ້ແທນຂອງທັງສອງຝ່າຍເຂົ້າຮ່ວມ.

ໃນກອງປະຊຸມໄດ້ປຶກສາຫາລືກັນເພື່ອແລກປ່ຽນບັນຫາ ແລະ ສິ່ງທ້າທາຍກ່ຽວກັບເສດຖະກິດມະຫາພາກ, ການຈັດຕັ້ງປະຕິບັດນະໂຍບາຍເງິນຕາ ແລະ ການພັດທະນາຂະແໜງການທະນາຄານຂອງສອງປະເທດພ້ອມນັ້ນຍັງໄດ້ມີການແລກປ່ຽນບົດ ຮຽນໃນການຄຸ້ມຄອງເງິນຕາຕ່າງປະເທດ ຮັບຟັງການລາຍງານຜົນການຮ່ວມມືສອງຝ່າຍລະຫວ່າງໂຮງພິມທະນະບັດຂອງສອງທະນາ ຄານກາງແລະການຮ່ວມມືທາງດ້ານວິຊາການສອງຝ່າຍປະຈໍາປີ 2023ແລະນໍາສະເໜີແຜນການຮ່ວມມືສອງຝ່າຍປະຈໍາປີ2024. ກອງປະຊຸມດັ່ງກ່າວ ໄດ້ດໍາເນີນໄປດ້ວຍບັນຍາກາດທີ່ເຕັມໄປດ້ວຍໄມຕີຈິດມິດຕະພາບ ແລະ ມີຜົນສໍາເລັດອັນຈົບງາມ ເຮັດໃຫ້ການຮ່ວມມືສອງຝ່າຍຂອງທະນາຄານກາງທັງສອງປະເທດສາມາດຂະຫຍາຍເຂົ້າສູ່ລວງກວ້າງ ແລະລວງເລິກຂຶ້ນຕື່ມອີກລະດັບໜຶ່ງ.

ພາຍຫຼັງກອງປະຊຸມດັ່ງກ່າວ, ກໍ່ໄດ້ມີພິທີມອບຫຼຽນໄຊແຮງງານຊັ້ນ I ໃຫ້ແກ່ ທຫວ ເນື່ອງໃນໂອກາດສະເຫຼີມສະຫຼອງວັນເຊັນສົນທິສັນຍາການຮ່ວມມືລາວ-ຫວຽດນາມ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດ ນາມຄົບຮອບ 60 ປີ; ນອກຈາກນີ້ ຍັງມີພິທີລົງນາມໃນບົດບັນທຶກຄວາມເຂົ້າໃຈວ່າດ້ວຍການສົ່ງເສີມສະກຸນເງິນທ້ອງຖິ່ນ ກີບ-ດົງ ລະຫວ່າງ ທຫລ ແລະ ທຫວ ເພື່ອເປັນການຈັດຕັ້ງຜັນຂະຫຍາຍທິດຊີ້ນໍາຂອງລັດຖະບານສອງປະເທດໃຫ້ນໍາໃຊ້ສະກຸນເງິນທ້ອງຖິ່ນ ເຂົ້າໃນການຊໍາລະການຄ້າ ແລະ ການລົງທຶນສອງຝ່າຍລາວ-ຫວຽດນາມ. ໂດຍຜູ້ຮ່ວມລົງນາມໃນບົດບັນທຶກດັ່ງກ່າວ ແມ່ນທ່ານຜູ້ວ່າການຂອງ ທຫລ ແລະ ທຫວ ແລະມີທ່ານຮອງຜູ້ວ່າການ, ຮອງເຈົ້າແຂວງຫຼວງພະບາງ, ຫົວໜ້າກົງສຸນໃຫຍ່ ສສ.ຫວຽດນາມ ປະຈໍາແຂວງຫຼວງພະບາງ ແລະຕາງໜ້າຈາກກົມກອງກ່ຽວຂ້ອງພາຍໃນຂອງສອງທະນາຄານພ້ອມທັງທະນາຄານທຸລະກິດຈໍານວນໜຶ່ງຈາກ ສປປ ລາວ ແລະ ສສ.ຫວຽດນາມ ເຂົ້າຮ່ວມເປັນສັກຂີພະຍານ.

ນອກຈາກນັ້ນ, ຍັງມີພິທີລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງບໍລິສັດ LAPNETແລະ NAPAS ເພື່ອຄົ້ນຄວ້າການເຊື່ອມລະບົບການຊໍາລະຂ້າມແດນລະຫວ່າງ ສປປ ລາວ ແລະ ສສ ຫວຽດນາມ ຜ່ານ QRCode ໂດຍມີຄະນະຜູ້ວ່າການ, ຕາງໜ້າກົມກ່ຽວຂ້ອງຈາກສອງທະນາຄານກາງ, ບໍລິສັດ LAPNET ແລະ NAPAS, ຕາງໜ້າຈາກທະນາຄານທຸລະກິດລາວ ແລະທະນາຄານທຸລະກິດຫວຽດນາມປະຈໍາ ສປປ ລາວ ກໍ່ເຂົ້າຮ່ວມ.

แชร์