ຮອງນາຍົກ ມີຄໍາເຫັນຫລາຍບັນຫາ ຕໍ່ກອງ​ປະຊຸມ ຄຊກມດ

ກອງ​ປະຊຸມຄົບຄະນະເປີດກວ້າງ ຄະນະ​ກຳມາ​ທິການ​ແຫ່ງ​ຊາດ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ,​ ​ແມ່ ແລະເດັກ ​(ຄຊກມດ) ປະຈຳ​ປີ 2023 ​ໄດ້​ໄຂ​ຂຶ້ນ​​ໃນ​ວັນ​ທີ 22 ພະຈິກ 2023 ທີ່ຫໍປະຊຸມແຫ່ງຊາດພາຍໃຕ້ການເປັນ​ປະທານ​ຂອງ ທ່ານ ກິແກ້ວ ໄຂຄຳພິທູນ  ຮອງ​ນາຍົກລັດຖະມົນຕີ, ປະທານ ຄຊກມດ, ມີທ່ານ​ລັດຖະມົນຕີ, ບັນດາທ່ານຮອງລັດຖະມົນຕີ, ຮອງຫົວໜ້າອົງການທຽບເທົ່າກະຊວງທີ່ເປັນຮອງ​ປະທານ ແລະກໍາມະການໃນ ຄຊກມດ; ບັນດາທ່ານຮອງເຈົ້າແຂວງ ແລະຮອງເຈົ້າຄອງນະຄອນທັງເປັນປະທານ ຄກມດ ແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ກິແກ້ວ ໄຂຄຳພິທູນ  ກ່າວວ່າ: ກອງປະຊຸມ ຄັ້ງນີ້ຈັດຂຶ້ນເພື່ອໃຫ້ ຄະນະ ຄຊກມດ ແລະ ຄກມດ ແຕ່ຂັ້ນຂະແໜງການ ແລະທ້ອງຖິ່ນໄດ້ປຶກສາຫາລື ແລກປ່ຽນຄຳຄິດຄຳເຫັນເພື່ອຊອກໃຫ້ເຫັນບັນຫາສິ່ງທ້າທາຍ ແລະອຸປະສັກກີດຂວາງໃນການຈັດຕັ້ງປະຕິບັດວຽກງານ ແລະ ເພື່ອຮ່ວມກັນຊອກຫາວິທີແກ້ໄຂ, ລວມໄປເຖິງການແລກປ່ຽນບົດຮຽນໃນການຈັດຕັ້ງປະຕິບັດວຽກດັ່ງກ່າວໃນຂັ້ນສູນກາງ ແລະທ້ອງຖິ່ນ, ເປັນເອກະພາບຮ່ວມກັນໃນກໍານົດແຜນວຽກຈຸດສຸມສຳລັບປີ 2024 ແລະປຶກສາຫາລືວຽກດ່ວນໃນຕໍ່ໜ້າລວມທັງການປະຕິບັດພັນທະຕໍ່ສົນທິສັນຍາສາກົນຢູ່ໃນຄວາມຮັບຜິດຊອບຂອງ ຄຊກມດ, ຄກມດ ແຕ່ລະຂັ້ນ.

ຈາກນັ້ນ ທ່ານ ນາງ ອາລີ ວົງໜໍ່ບຸນທຳ ປະທານສູນກາງສະຫະພັນແມ່ຍິງລາວ, ຮອງປະທານ ຄຊກມດ ຜູ້ປະຈຳການ ຜ່ານຮ່າງບົດລາຍງານໂດຍສັງເຂບວຽກງານພົ້ນເດັ່ນກາງສະໄຫມ (2021-2023) ແລະ ທິດທາງທ້າຍສະໄຫມ (2023-2025) ຂອງ  ຄຊກມດ  ແລະ ການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການ ປະຈຳປີ 2024. ພ້ອມນີ້ ທ່ານ ນາງ ຈັນໂສດາ ພອນທິບ ຮອງປະທານສູນກາງສະຫະພັນແມ່ຍິງລາວ, ຮອງປະທານ ຄຊກມດ ຍັງໄດ້ນຳສະເໜີ ກ່ຽວກັບສະຫຼຸບການຈັດຕັ້ງປະຕິບັດ ແຜນດຳເນີນງານຫ່ງຊາດ ເພື່ອຄວາມສະເໝີພາບຍິງ-ຊາຍ, ແມ່ນດຳເນີນງານແຫ່ງຊາດ ເພື່ອແມ່ ແລະ ເດັກ ແລະ ແຜນດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ປີ 2023 ແລະ ທິດທາງແຜນການ ປະຈຳປີ 2024.

ເພື່ອຮັບປະກັນໃຫ້ການຈັດຕັ້ງປະຕິບັດວຽກຄວາມກ້າວໜ້າຂອງແມ່ຍິງ ແລະວຽກແມ່ ແລະ ເດັກ ບັນລຸຕາມແຜນການ ແລະຄາດໝາຍທີ່ວາງໄວ້ທ່ານຮອງນາຍົກໄດ້ມີບາງຄໍາເຫັນດັ່ງນີ້:

1). ຄະນະ ຄຊກມດ, ຄກມດ ແຕ່ລະຂັ້ນ ຕ້ອງເຂົ້າໃຈໃຫ້ເລິກເຊິ່ງຈະແຈ້ງ ກ່ຽວກັບພາລະບົດບາດ, ສິດ ແລະໜ້າທີ່ຂອງຕົນເພື່ອເພື່ອຮັບປະກັນໃນການຊີ້ນຳນຳພາຈັດຕັ້ງປະຕິບັດວຽກງານດັ່ງກ່າວມີຄວາມຖືກຕ້ອງ, ບໍ່ຊ້ຳຊ້ອນ ແລະ ສອດຄ່ອງກັນແນວທາງນະໂຍບາຍຂອງພັກ. 2) ບັນດາທ່ານຕ້ອງເຂົ້າໃຈນຳກັນວ່າວຽກຄວາມກ້າວໜ້າແມ່ຍິງ, ຄວາມສະເໝີພາບຍິງ-ຊາຍ , ການພັດທະນາ ແລະ ປົກປ້ອງເດັກ ເປັນວຽກທີ່ຕິດພັນກັບຫລາຍຂະແໜງການ, ແມ່ນຄວາມຮັບຜິດຊອບຂອງທຸກພາກສ່ວນທັງພາກລັດ ແລະເອກະຊົນ,ອົງການຈັດຕັ້ງທາງສັງຄົມແມ່ນຕ້ອງໄດ້ເປັນເຈົ້າການຮ່ວມກັນໃນການຈັດຕັ້ງປະຕິບັດແຕ່ແນວໃດກໍຕາມເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງເປັນລະບົບຈຶ່ງມີຄວາມຈໍາເປັນຕ້ອງໄດ້ມີກົນໄກທີ່ເປັນເສນາທິການ ແລະຈຸດໃຈກາງໃນການປະສານງານວຽກງານດັ່ງກ່າວ ເພື່ອເບິ່ງບັນຫາ ແລະ ວິທີການແກ້ໄຂ ເພື່ອເຮັດໃຫ້ແມ່ຍິງ, ຜູ້ຊາຍ ໄດ້ຮັບການສົ່ງເສີມຄວາມກ້າວໜ້າ,  ຄວາມສະເໝີພາບຍິງ-ຊາຍ, ປາສະຈາກການໃຊ້ຄວາມຮຸນແຮງຕໍ່ແມ່ຍິງ ແລະເດັກ.

3).  ເອົາໃຈໃສ່ປະສານສົມທົບ ແລະ ຊຸກຍູ້ບັນດາຂະແໜງການ, ທ້ອງຖິ່ນກໍຄືຄູ່ຮ່ວມພັດທະນາໃນການຈັດຕັ້ງປະຕິບັດບັນດານິຕິກຳ, ຍຸດທະສາດ ແລະແຜນດໍາເນີນງານຕ່າງໆຂອງລັດຖະບານທີ່ໄດ້ຮັບຮອງແລ້ວຜ່ານຂະບວນການສົ່ງເສີມ ແລະສ້າງຄວາມເຂັ້ມແຂງໃຫ້ແມ່ຍິງເພື່ອບັນລຸຄວາມສະເໝີພາບຍິງ-ຊາຍ ໃນດ້ານຕ່າງໆ
4.)  ຊຸກຍູ້ສົ່ງເສີມ, ສ້າງເງື່ອນໄຂ ແລະໂອກາດໃຫ້ແມ່ຍິງໄດ້ຮັບການບັນຈຸສັບຊ້ອນເຂົ້າໃນຕໍາແໜ່ງນຳພາແຕ່ລະຂັ້ນໃຫ້ມີຈໍານວນເພີ່ມຂຶ້ນ.

5).  ເອົາໃຈໃສ່ປະຕິບັດພັນທະຕໍ່ສົນທິສັນຍາສາກົນວ່າດ້ວຍການລຶບລ້າງທຸກຮູບແບບການຈໍາແນກຕໍ່ແມ່ຍິງ, ສົນທິສັນຍາວ່າດ້ວຍສິດທິເດັກ, ອານຸສັນຍາວ່າດ້ວຍ ການເອົາເດັກເຂົ້າໃນກໍາລັງປະກອບອາວຸດ, ອານຸສັນຍາວ່າດ້ວຍການຄ້າຂາຍເດັກ ຄ້າປະເວນີເດັກ ແລະສິ່ງລາມົກອານາຈານກ່ຽວກັບເດັກ, ຖະແຫຼງການ ແລະ ແຜນປະຕິບັດປັກກິ່ງ ໂດຍການຜັນຂະຫຍາຍ ແລະ ຈັດຕັ້ງປະຕິບັດ ບັນດາຄໍາແນະນຳຂອງ ອົງການ ສປຊ ຕໍ່ກັບການຈັດຕັ້ງປະຕິບັດສົນທິສັນຍາດັ່ງກ່າວໃນແຕ່ລະໄລຍະ.
6).ໃຫ້ທຸກພາກສ່ວນເອົາໃຈໃສ່ໃນການປູກຈິດສຳນຶກກ່ຽວກັບການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ວຽກແມ່ ແລະເດັກດ້ວຍຫຼາຍຮູບການ ແລະວິທີການ.
7). ຄຊກມດ ແລະ ຄກມດ ເອົາໃຈໃສ່ເຄື່ອນໄຫວຕາມພາລະບົດບາດ ແລະ ກົດໝາຍວ່າດ້ວຍຄວາມສະເໝີພາບຍິງ-ຊາຍ ແລະ ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະເດັກ ແລະແຜນດໍາເນີນງານແຫ່ງຊາດທີ່ຮັບຮອງແລ້ວ. ສະນັ້ນ, ຕ້ອງມີການລາຍງານການເຄື່ອນໄຫວປະຕິບັດວຽກງານຂອງຕົນ ໃຫ້ກັບ ລັດຖະບານ, ເຈົ້າກະຊວງ, ເຈົ້າອົງການ, ເຈົ້າຄອງນະຄອນຫຼວງວຽງຈັນ, ເຈົ້າແຂວງ ແລະເຈົ້າເມືອງຢ່າງເປັນລະບົບໃນ ທຸກໆ ໄຕມາດ, 6 ເດືອນ, 9 ເດືອນ, ປີ ແລະຂາດຕົວ.

แชร์