2024 ສະພາແຫ່ງຊາດ ຈະສ້າງ ແລະປັບປຸງກົດໝາຍ 26 ສະບັບ

ຕອນແລງຂອງວັນທີ 14 ພະຈິກ 2023, ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ຖະແຫລງ ຜົນສຳເລັດການພິຈາລະນາວຽກງານ ຂອງສະພາແຫ່ງຊາດ ໃນການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ 5 ປີ (2021-2025) ຂອງສະພາແຫ່ງຊາດ ຊຸດທີ IX.

ທ່ານນາງ ສູນທອນ ໄຊຍະຈັກ ກ່າວວ່າ: ໃນໄລຍະຜ່ານມາ ສະພາແຫ່ງຊາດ (ສພຊ) ຍາດໄດ້ຜົນສໍາເລັດຫລາຍດ້ານເປັນຕົ້ນດ້ານນິຕິບັນຍັດ, ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ, ດ້ານການຕິດຕາມກວດກາ, ດ້ານການສ້າງຄວາມເຂັ້ມແຂງລວມເຖິງການເຄື່ອນໄຫວວຽກງານການຕ່າງປະເທດ ແລະອື່ນໆ.

ສຳລັບທິດທາງແຜນການທ້າຍສະໄໝ ຮອດປີ 2025 ຈະຈັດຕັ້ງປະຕິບັດແຜນການສ້າງ ແລະປັບປຸງກົດໝາຍ ແຕ່ປີ 2023-2025 ຊຶ່ງລວມມີຈໍານວນ 40 ສະບັບ; ຄົ້ນຄວ້າ ແລະ ກະກຽມໃຫ້ແກ່ການປັບປຸງລັດຖະທໍາມະນູນ; ຄົ້ນຄວ້າ, ໃຫ້ສັດຕະຍາບັນແກ່ສົນທິສັນຍາ-ສັນຍາສາກົນ ທີ່ ສປປ ລາວ ເປັນພາຄີຕາມການສະເໜີຂອງລັດຖະບານ. ພ້ອມທັງຈະເອົາໃຈໃສ່ຊີ້ນໍາໃນການປະສານສົມທົບກັບພາກສ່ວນກ່ຽວຂ້ອງ ເພື່ອປຶກສາຫາລື ແລະເອກະພາບກ່ຽວກັບເນື້ອໃນແຕ່ລະບັນຫາກ່ອນຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 7, ເທື່ອທີ 8, ເທື່ອທີ 9 ແລະເທື່ອທີ 10 ຂອງສະພາແຫ່ງຊາດ ຊຸດທີ IX ແລະ ດໍາເນີນກອງປະຊຸມຄະນະປະຈໍາ ສພຊ ປະຈໍາເດືອນເປັນປົກກະຕິ ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ.

ສ່ວນທິດທາງແຜນການ ປະຈໍາປີ 2024 ສພຊ ຊຸດທີ IX ຈະສ້າງ ແລະປັບປຸງກົດໝາຍ ປະຈໍາປີ 2024 ຈໍານວນ 26 ສະບັບ; ຄົ້ນຄວ້າກະກຽມປັບປຸງລັດຖະທໍາມະນູນ ແຫ່ງ ສປປ ລາວ ເພື່ອຂໍທິດຊີ້ນໍາຈາກກົມການເມືອງສູນກາງພັກ; ຄົ້ນຄວ້າການໃຫ້ສັດຕະຍາບັນແກ່ ສົນທິສັນຍາ-ສັນຍາສາກົນ ທີ່ ສປປ ລາວ ເປັນພາຄີຕາມການສະເໜີຂອງພາກສ່ວນກ່ຽວຂ້ອງ ແລະອື່ນໆ.

แชร์