ຈັດງານກຸສົນ ເພື່ອຊ່ວຍເຫຼືອແມ່ຍິງ ແລະເດັກນ້ອຍທີ່ທຸກຈົນ

ງານເດີນແບບການກຸສົນ ເພື່ອຊ່ວຍເຫຼືອແມ່ຍິງແລະເດັກນ້ອຍທີ່ທຸກຈົນຢູ່ເຂດຊົນນະບົດ ຫ່າງໄກສອກຫຼີກ ໄດ້ຈັດຂຶ້ນຕອນຄໍ່າວັນທີ 12 ພະຈິກ 2023 ທີ່ສູນວາງສະແດງສິນຄ້າລາວ-ໄອເຕັກ ນະຄອນຫລວງວຽງຈັນ ໂດຍການເຂົ້າຮ່ວມຂອງ ທ່ານ ປ້າ ນາລີ ສີສຸລິດ ພັນລະຍາ ປະທານປະເທດ ແຫ່ງ ສປປ ລາວ,ປະທານຄະນະທີ່ປືກສາສະມາຄົມຫັດຖະກຳລາວ, ທ່ານນາງ ປານີ ຢາທໍ່ຕູ້ ຮອງປະທານປະເທດພ້ອມດ້ວຍບັນດາຄອບຄົວການນໍາ, ບັນດາທູດທຸຕານຸທູດ, ອົງການຈັດຕັ້ງສາກົນ ພ້ອມດ້ວຍມວນຊົນບໍລິສັດຫ້າງຮ້ານ ແລະຜູ້ໃຫ້ການສະໜັບສະໜູນເຂົ້າຮ່ວມ.

ທ່ານນາງ ຈັນເທົາ ປະຖັມມະວົງ ປະທານ ກິດຕິມະສັກ ສະມາຄົມຫັດຖະກຳລາວ ກ່າວວ່າ: ງານເພື່ອການກຸສົນຄັ້ງນີ້ຈັດຂຶ້ນໃນໂອກາດງານມະຫາກໍາສີມືຫັດຖະກໍາລາວ ຄັ້ງທີ 22, ຈຸດປະສົງເພີ່ມທະວີຄວາມສາມັກຄີ,ມິດຕະພາບແລະຮ່ວມແຮງຮ່ວມໃຈກັນເພື່ອແນໃສ່ປະຕິບັດຕາມແຜນການເຄື່ອນໄຫວກິດຈະກຳຂອງໂຄງການວາງອອກມີດັ່ງນີ້: ໃຫ້ການຊ່ວຍເຫຼືອແມ່ຍິງ ແລະເດັກນ້ອຍໃນເຂດ ເມືອງທີ່ຖືກໄພນໍ້າຖ້ວມ ໃນນັ້ນ ເລັ່ງສ້ອມແປງເຮືອນ ແລະໂຮງຮຽນ; ປະກອບອຸປະກອນເຄື່ອງມືການແພດ (ເຄື່ອງຊ່ວຍຫາຍໃຈ ຫ້ອງ ICU) ແລະ ຢາປົວພະຍາດໃຫ້ໂຮງໝໍ ແລະ ສຸກສາລາ; ການສົ່ງເສີມດ້ານຫັດຖະກຳໃຫ້ມີການຂະຫຍາຍຕົວ (ສົ່ງເສີມການປູກມອນລ້ຽງມ້ອນ); ມອບທຶນການສືກສາໃຫ້ນັກຮຽນເກັ່ງຈາກຄອບຄົວທຸກຈົນຂາດເຂີນ. ສໍາລັບການຊ່ວຍເຫຼືອແມ່ຍິງ ແລະ ເດັກນ້ອຍຜູ້ທຸກຍາກໃນຮູບແບບການເດີນແບບ ໄດ້ຈັດຂຶ້ນແຕ່ປີ 2020 ເປັນຕົ້ນມາ ເຖິງປະຈຸບັນກໍ່ເປັນປີທີ 3 ພາຍໃຕ້ "ໂຄງການຫ່ວງໄຍໄປເຖິງ" ເຊິ່ງການປະກອບສ່ວນຊຸກຍູ້ທົ່ວສັງຄົມໃນປີ 2020 ນັ້ນ ແມ່ນໄດ້ນໍາໄປຊ່ວຍເຫຼືອປະຊາຊົນໃນເຂດທ້ອງຖິ່ນທີ່ຂາດເຂີນ ແລະປະສົບໄພພິບັດຕ່າງໆຄື: ຊ່ວຍຕັ້ງເຮືອນໃຫ້ປະຊາຊົນທຸກຍາກທີ່ສຸດ, ຄອບຄົວພິການ,ຄອບຄົວກໍ້າພ້າກໍ້າພອຍ, ລູກຫຼານນັກຮົບວິລະຊົນຢູ່ບ້ານຜາລະແວກ ເມືອງຮົ່ມ ແຂວງໄຊສົມບຸນ ຈໍານວນ 14 ຫຼັງຄາເຮືອນ; ສ້າງໂຮງຮຽນບ້ານປາກເພ ເມືອງໃຫມ່ ແຂວງຜົ້ງສາລີ (ບ້ານວິລະຊົນ); ມອບທຶນຮອນໃນການເຮັດກະເສດຄົວເຮືອນໃຫ້ພະນັກງານບໍານານ, ພະນັກງານປະຕິວັດບໍານານ ແຂວງເຊກອງ; ຊ່ວຍເຫຼືອສະມາຄົມ ຫັດຖະກຳລາວໃນການສົ່ງເສີມສີໄມ້ລາຍມືຂອງແມ່ຍິງຈາກນັ້ນໃນປີ 2022ໂຄງການຫ່ວງໄຍໄປເຖິງກໍ່ໄດ້ສືບຕໍ່ລະດົມທຶນໃນຮູບແບບດຽວກັນໂດຍການສະໜັບສະໜູນຈາກມວນຊົນຢ່າງກວ້າງຂວາງ ເປັນຕົ້ນນັກທຸລະກິດລາວໄດ້ຮັບປະກອບສ່ວນເປັນມູນຄ່າ 2,77 ຕື້ກີບ ແລະ ຮັບເປັນວັດຖຸຈໍານວນ 265 ລ້ານກີບ ໃນນັ້ນໄດ້ນໍາໄປເຄື່ອນໄຫວຮັບໃຊ້ສັງຄົມຄື: ມອບໃຫ້ ສະມາຄົມ ຫັດຖະກຳລາວ ເພື່ອໄປຊຸກຍູ້ວຽກງານຫັດຖະກຳ 200 ລ້ານກີບ; ຊຸກຍູ້ສະມາຄົມຫັດຖະກຳແຂວງຈໍາປາສັກ 50 ລ້ານກີບ; ຊ່ວຍເຫຼືອເຮັດນໍ້າລິນໃຫ້ເມືອງລອງ ແຂວງຫຼວງນໍ້າທາ 62 ລ້ານກີບ; ສ້າງໂຮງຮຽນມັດທະຍົມຕອນຕົ້ນ ບ້ານພູວາ ເມືອງນາແລ ຈໍານວນ 2 ຫຼັງ ມູນຄ່າ 1,03 ຕື້ກີບ ແລະ ມອບເງິນສົດ 50 ລ້ານກີບ ເພື່ອສ້າງນໍ້າລິນ, ສ້າງຫໍພັກນັກຮຽນຊາຍ-ຍິງ ໂຮງຮຽນ ມສ ບ້ານນໍ້າເງິນ ເມືອງວຽງພູຄາ ແຂວງຫຼວງນໍ້າທາ 2ຫຼັງ ມູນຄ່າ 761 ລ້ານກີບ ແລະເງິນສົດ 50 ລ້ານກີບ ສໍາລັບເຮັດເດີ່ນກິລາ.

ຈາກນັ້ນ ທ່ານ ປ້າ ນາລີ ສີສຸລິດ ກໍໄດ້ກ່າວວ່າ: ງານຫັດຖະກຳ-ເດີນແບບເພື່ອການກຸສົນມັນໄດ້ສ້າງເສັ້ນທາງທີ່ເຂັ້ມແຂງຮຸ່ງເຮືອງ (ກະແສນໍ້າຕົກຕາດ+ເສັ້ນສາຍໄໝທີ່ເຫຼຶ້ອມໃສງົດງາມ) ບວກໃສ່ກັບເຮັດໃຫ້ຜົນສໍາເລັດຂອງແລວທາງ "ຫ່ວງໄຍໄປເຖິງ" ຢ່າງອະມະຕະ ສອດຄ່ອງກັບແນວທາງຂອງພັກເພື່ອນໍາເອົາປະເທດຊາດກ້າວສູ່ຄວາມສີວິໄລຮຸ່ງເຮືອງ ເມື່ອໃດປະຊາຊົນຫຼຸດພົ້ນຄວາມທຸກ, ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງພວກເຮົາຫ່ວງໄຍ ແລະເອົາການຈັດຕັ້ງປະຕິບັດຫັນສູ່ຮາກຖານໃຫ້ເປັນໂຕຕົນ.

ພວກເຮົາວາແຂນເດ່ມືຮັບເອົາການອຸປະຖັມຄໍ້າຊູຈາກຜູ້ໃຈບຸນສະເໜີຄຸນຄ່າຂອງການໃຫ້ບຸນຂອງບັນດາທ່ານມັນເກີດຜົນສໍາເລັດຢ່າງທັນເວລາຈະແຈ້ງ, ຈາກນໍ້າຕາຂອງຄວາມທຸກໃຈຂອງຜູ້ເປັນແມ່ທັງຫຼາຍມັນເປັນກະແສນໍ້າຕາ ແລະຮອຍຍີ້ມແຫ່ງຄວາມສົມຫວັງ. ພວກເຮົາຈົ່ງເພີ່ມທະວີຄວາມຮັກແພງຊ່ວຍເຫຼືອເຊິ່ງກັນແລະກັນໃຫ້ຫຼາຍຂຶ້ນ, ເຮັດໃຫ້ບາດກ້າວເດີນຂອງເສັ້ນສາຍໄໝເຂັ້ມແຂງຮັ່ງມີຫຼາຍຂຶ້ນ, ສືບຕໍ່ອົດທົນສູ້ຊົນຕໍ່ຄວາມຫຍຸ້ງຍາກຜ່ານຜ່າສ້າງສາພັດທະນາປະເທດຊາດ, ຄູ່ກັບການອານຸລັກຮັກສາມູນເຊຶ້ອວັດທະນະທໍາ, ການນຸ່ງຖືອັນດີງາມຂອງຊາດໄວ້ໃຫ້ດີ, ພ້ອມກັນປ່ຽນແປງດິນອັນໃດທີ່ຍັງຄົງຄ້າງແບບເກົ່າແກ່ຫຼ້າຫຼັງ, ເພື່ອອານາຄົດຂອງລູກຫຼານທີ່ແສນຮັກ, ເພື່ອຜຶນແຜ່ນດິນວິລະຊົນລາວທີ່ເຕັມໄປດ້ວຍປະຫວັດສາດອັນງົດງາມພວກເຮົາສືບຕໍ່ບຸກໜ້າກ້າວໄປ.

แชร์