ກະຊວງ ຜທ ຊີ້ແຈງການແກ້ໄຂໂຄງການນອກແຜນ

ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX, ໃນວັນທີ 8 ພະຈິກ 2023, ສະມາຊິກສະພາແຫ່ງຊາດໄດ້ຊັກຖາມກ່ຽວກັບການແກ້ໄຂໂຄງການນອກແຜນ ຕາມຜົນການກວດກາຂອງອົງການກວດກາແຫ່ງລັດ ແລະການຈັດຕັ້ງປະຕິບັດການເຈລະຈາຕໍ່ລອງມູນຄ່າໂຄງການຕາມຜົນການກວດກາທີ່ຍັງມີມູນຄ່າລາຄາສູງກວ່າມູນຄ່າລາຄາ ທີ່ກະຊວງກ່ຽວຂ້ອງວາງອອກ 20% ຂຶ້ນໄປນັ້ນ.

ຕໍ່ບັນຫາດັ່ງກ່າວ, ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະການລົງທຶນ (ຜທ) ໄດ້ຊີ້ແຈງວ່າ: ການແກ້ໄຂໂຄງການນອກແຜນຕາມຜົນການກວດກາຂອງ ອົງການກວດກາແຫ່ງລັດ ໂດຍລວມແລ້ວພາກສ່ວນກ່ຽວຂ້ອງທີ່ເປັນເຈົ້າຂອງໂຄງການລ້ວນແຕ່ໄດ້ເອົາໃຈໃສ່ຄົ້ນຄວ້າ ບັນດາໂຄງການນອກແຜນດັ່ງກ່າວ ເພື່ອຈັດສັນເຂົ້າແຜນການລົງທຶນຂອງລັດໃນຂະແໜງການທີ່ຕົນຮັບຜິດຊອບທັງໃຫ້ສອດຄ່ອງກັບກົດໝາຍ ແລະລະບຽບການທີ່ກຳນົດໄວ້, ເຖິງຢ່າງໃດກໍຕາມ ເຫັນວ່າມີໂຄງການນອກແຜນ ຈຳນວນໜຶ່ງບໍ່ສາມາດປະກອບເອກະສານຄືນໄດ້ຍ້ອນຂໍ້ມູນຍັງບໍ່ທັນຄົບຖ້ວນ. ສະນັ້ນ, ທິດທາງຕໍ່ໜ້ານີ້ກະຊວງ ຜທ ຈະໄດ້ສືບຕໍ່ປຶກສາກັບຂະແໜງການທີ່ກ່ຽວຂ້ອງຂອງລັດຖະບານ ປະກອບເອກະສານຄືນຂອງບັນດາໂຄງການນອກແຜນ ໃຫ້ຄົບຖ້ວນຕາມ ມາດຕາ 22 ຂອງກົດໝາຍວ່າດ້ວຍການລົງທຶນຂອງລັດ. ສຳລັບການກວດກາຄືນບັນດາໂຄງການນອກແຜນຈຳນວນ 37 ໂຄງການ, ມູນຄ່າ 1.244,71 ຕື້ກີບ ບໍ່ຖືກຕາມລະບຽບການທີ່ກຳນົດໄວ້ນັ້ນ, ກະຊວງແຜນການ ແລະການລົງທຶນຈະໄດ້ສືບຕໍ່ປະສານສົມທົບກັບອົງການກວດສອບແຫ່ງລັດ ເພື່ອເອົາຂໍ້ມູນລະອຽດ ແລະດໍາເນີນການປະສານພາກສ່ວນກ່ຽວຂ້ອງ ຫລື ທ້ອງຖິ່ນດຳເນີນການໃຫ້ຖືກລະບຽບກົດໝາຍ.

ສ່ວນການຈັດຕັ້ງປະຕິບັດການເຈລະຈາຕໍ່ລອງມູນຄ່າໂຄງການຕາມຜົນການກວດກາທີ່ຍັງມີມູນຄ່າລາຄາສູງກວ່າມູນຄາລາຄາທີ່ກະຊວງກ່ຽວຂ້ອງວາງອອກ 20% ຂຶ້ນໄປ ເຫັນວ່າຂະແໜງການ ແລະ ທ້ອງຖິ່ນ ກໍໄດ້ພະຍາຍາມຈັດຕັ້ງປະຕິບັດຕາມຂໍ້ຕົກລົງວ່າດ້ວຍການນົດຫລັກການ ແລະ ວິທີການໃນການເຈລະຈາຕໍ່ລອງມູນຄ່າໂຄງການລົງທຶນຂອງລັດໂດຍເຈົ້າຂອງໂຄງການໄດ້ແຕ່ງຕັ້ງຄະນະລົງເຈລະຈາຕໍ່ລອງ ແລະດຳເນີນຕາມຂັ້ນຕອນຂອງລະບຽບການກ່ຽວຂ້ອງ, ແຕ່ຜ່ານການການລາຍງານຂອງພາກສ່ວນກ່ຽວຂ້ອງເຫັນວ່າການຈັດຕັ້ງປະຕິບັດການຕໍ່ລອງຕົວຈິງພົບຄວາມຫຍຸ້ງຍາກບໍ່ໜ້ອຍເນື່ອງຈາກຫົວໜ່ວຍລາຄາທີ່ຂະແໜງການກ່ຽວຂ້ອງກຳນົດອອກ ບໍ່ແທດເໝາະກັບກາລະເທສະ, ທັງບໍ່ແທດເໝາະກັບສະພາບຈຸດພິເສດຂອງແຕ່ລະທ້ອງຖິ່ນ ແລະ ອີກດ້ານໜຶ່ງຕົວເລກການຂຶ້ນແຜນຊຳລະໃຫ້ບັນດາໂຄງການ ທີ່ຖືກຕໍ່ລອງໄດ້ແລ້ວກໍ່ມີຄວາມຈຳກັດຫລາຍ, ເຊິ່ງບໍ່ສາມາດປະຕິບັດໄດ້ຕາມສັນຍາ. ໃນບັນຫານີ້ທີ່ຜ່ານມາຜູ້ປະກອບການໄດ້ສະເໜີໃຫ້ກໍານົດໄລຍະການຊໍາລະໃຫ້ລະອຽດ ແລະຊັດເຈນ. ສະນັ້ນ, ຕໍ່ບັນຫາດັ່ງກ່າວນີ້ຂະແໜງການກ່ຽວຂ້ອງລັດຖະບານຈະໄດ້ສືບຕໍ່ຮ່ວມກັນຄົ້ນຄວ້າຫລັກການ ແລະວິທີການໃນການຊຳລະໃຫ້ແກ່ບັນດາໂຄງການທີ່ໄດ້ຮັບການຕໍ່ລອງແລ້ວນັ້ນໃຫ້ສໍາເລັດໂດຍໄວ.

แชร์