ປີທ່ອງທ່ຽວລາວ 2024 ຈະເປີດເປັນທາງການໃນວັນທີ 23 ພະຈິກ ນີ

ທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ລາຍງານການກະກຽມຄວາມພ້ອມໃນການເປີດປີທ່ອງທ່ຽວລາວ ປີ 2024 ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 6 ພະຈິກ 2023 ວ່າ: ປີທ່ອງທ່ຽວລາວ 2024 ໄດ້ກຳນົດຄຳຂວັນ: ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ (Laos: A Paradise of Culture, Nature and History) ໃນນັ້ນ ວັນທີ 13 ພະຈິກ 2023 ຈະຈັດພິທີຖະແຫຼງຂ່າວໃນການຈັດປີທ່ອງທ່ຽວລາວ 2024 ທີ່ໂຮງແຮມດອນຈັນພາເລດ ແລະ ໃນວັນທີ 23 ພະຈິກ 2023 ຈະໄດ້ຈັດພິທີເປີດປີທ່ອງທ່ຽວລາວ 2024 ຢ່າງເປັນທາງການ, ບຸນນະມັດສະການພຣະທາດຫຼວງ ແລະ ງານວາງສະແດງສິນຄ້າປະຈຳປີ 2023.

ທ່ານນາງ ສວນສະຫວັນ ວິຍະເກດ ກ່າວວ່າ: ຈຸດປະສົງຂອງການເປີດປີທ່ອງທ່ຽວລາວ 2024 ມີດັ່ງນີ້: 1 ເຜີຍແຜ່ແນວທາງນະໂຍບາຍຂອງພັກ-ລັດ ເຮົາ, ກໍຄືຜົນສຳເລັດໃນການສ້າງສາພັດທະນາປະເທດຂອງປະຊາ ຊົນລາວບັນດາເຜົ່າ; ສະແດງພາບພົດອັນຈົບງາມຂອງ ສປປ ລາວ ທັງໃນດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ. 2 ເພື່ອປະກອບສ່ວນເຂົ້າໃນວຽກງານການພັດທະນາເສດຖະກິດ-ສັງຄົມ ແຫ່ງຊາດ ຕາມການກຳນົດຂອງພັກ-ລັດໃຫ້ຂະແໜງການທ່ອງທ່ຽວ ເປັນຂະແໜງການເສດຖະກິດປາຍແຫຼມໜຶ່ງ ທີ່ພາໃຫ້ມີການສະສົມເງິນຕາ, ມີການໝູນວຽນເງິນຕາພາຍໃນປະເທດເປັນຢ່າງດີ, ສ້າງວຽກເຮັດງານທຳໃຫ້ແກ່ປະຊາຊົນໃນຂົງເຂດວຽກງານບໍລິການ ແລະ ການຜະລິດ. 3 ຊຸກຍູ້ປຸກລະດົມຂະບວນການພັດທະນາ ແລະ ສົ່ງເສີມການທ່ອງທ່ຽວຂອງ ສປປ ລາວ ທີ່ຖືເອົາການ ທ່ອງທ່ຽວທາງທຳມະຊາດ, ວັດທະນະທຳ, ປະຫວັດສາດ ແລະ ກະສິກຳ ໃຫ້ມີການຂະຫຍາຍຕົວຢ່າງແຂງແຮງ, ຕໍ່ເນື່ອງ ແລະ ມີຄວາມຍືນຍົງ ໂດຍການມີສ່ວນຮ່ວມຂອງທົ່ວສັງຄົມ ແລະ ຂອງປະຊາຊົນບັນດາເຜົ່າ. 4 ຖືເອົາໂອກາດນີ້ສຸມໃສ່ການຟື້ນຟູການທ່ອງທ່ຽວຢ່າງເປັນຮູບປະທໍາ, ປັບປຸງໂຄງລ່າງພື້ນຖານສິ່ງອຳນວຍຄວາມສະດວກ ແລະ ການບໍລິການ, ຍົກສູງຄຸນນະພາບຂອງການບໍລິການການທ່ອງທ່ຽວໃຫ້ໄດ້ມາດຕະຖານ, ພັດທະນາການທ່ອງທ່ຽວໃຫ້ກາຍເປັນຂະແໜງເສດຖະກິດໜຶ່ງ ທີ່ສາມາດແຂ່ງຂັນ ແລະ ເຊື່ອມໂຍງກັບການທ່ອງທ່ຽວຢູ່ບັນດາປະເທດໃນ ພາກພື້ນ ແລະ ສາກົນ. 5 ດຶງດູດນັກທ່ອງທ່ຽວສາກົນເຂົ້າມາທ່ຽວລາວນັບມື້ນັບຫຼາຍຂື້ນແນໃສ່ສ້າງວຽກເຮັດງານທຳໃຫ້ແກ່ສັງ ຄົມ ແລະ ສ້າງລາຍຮັບເງິນຕາເຂົ້າສູ່ປະເທດ ແລະ ກະຈາຍລາຍໄດ້ ລົງສູ່ທ້ອງຖິ່ນ. 6 ສ້າງຈິດສຳນຶກ ແລະ ຍົກສູງຄວາມຮັບຮູ້ຂອງສັງຄົມ ແລະ ປະຊາຊົນເຮົາກ່ຽວກັບບົດບາດ ແລະ ຄວາມສຳຄັນຂອງວຽກງານທ່ອງທ່ຽວ ໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ແລະ ຂອງທ້ອງຖິ່ນ. 7 ສົ່ງເສີມ ແລະໂຄສະນາຜະລິດຕະພັນການທ່ອງທ່ຽວທີ່ເປັນທ່າແຮງ, ສົ່ງເສີມກິດຈະກຳບຸນປະເພນີອັນເປັນເອກະລັກຂອງປະຊາຊົນລາວບັນດາເຜົ່າ ໃນຂອບເຂດທົ່ວປະເທດ.

ປີທ່ອງທ່ຽວລາວ ປີ 2024 ໄດ້ກຳນົດເອົາ 79 ກິດຈະກຳ, ໃນນີ້ ມີ 14 ກິດຈະກໍາລະດັບຊາດ ແລະ 65 ກິດຈະກໍາລະດັບແຂວງ ເພື່ອສ້າງຂະບວນການໃຫ້ຟົດຟື້ນໃນຂອບເຂດທົ່ວປະເທດ ຊຶ່ງຄາດວ່າຈະສາມາດຮັບນັກທ່ອງທ່ຽວໄດ້ປະມານ 3,5 ລ້ານເທື່ອຄົນ. ສະເພາະໃນ 9 ເດືອນ ຂອງປີ 2023 ມີນັກທ່ອງທ່ຽວຕ່າງປະເທດມາທ່ຽວລາວ 2.498.691 ເທື່ອຄົນ, ຄາດວ່າໝົດປີ 2023 ຈະມີນັກທ່ອງທ່ຽວຕ່າງປະເທດ ຈຳນວນ 2,9 ຫາ 3,3 ລ້ານເທື່ອຄົນ.

แชร์