ຮ່າໂນ້ຍ ໃນຮອບ 8 ປີ ຈຶ່ງໄດ້ຕ່າວຄືນ

ສຽງເພງ ຮ່າໂນ້ຍ-ວຽງຈັນ (ເຮົາຮັກແພງກັນ ເຮົາສາມັກຄີ ສາມັກຄີ ...)ກາຍເປັນເພງອໍາມະຕະທີ່ມີຄວາມໝາຍຢ່າງເລິກເຊິ່ງພັນລະນາເຖິງຄວາມສາມມັກຄີແບບພິເສດ -ການຮ່ວມືຢ່າງຮອບດ້ານລະຫວ່າງ ລາວ-ຫວຽດນາມ ໄດ້ດັ່ງກ້ອງກັງວານໃນເວລາຈັດກິດຈະກໍາມ່ວນຊື່ນລື່ນເລີງໃນໝູ່ພະນັກງານການນໍາລາວເຮົາໄປຝຶກອົບຮົບຍົກລະດັບໄລຍະສັ້ນ, ນັກສຶກສາລາວທຸກລະດັບທີ່ໄປຮຽນໃນສາຂາວິຊາອາຊີບຕ່າງໆຢູ່ນະຄອນຫຼວງຮ່າໂນ້ຍ ສ.ສ ຫວຽດນາມ.

ໃນຮອບ 8 ປີ ທີ່ໄດ້ຕ່າວຄືນ ນະຄອນຫຼວງຮ່າໂນ້ຍ ສັງເກດເຫັນວ່າ ມີການປ່ຽນແປງໃໝ່ຫຼາຍດ້ານໄປສູ່ການພັດທະນາທີ່ດີຂື້ນຢ່າງປະຈັກຕາ. ເມື່ອເຮົາຂີ່ລົດອອກຈາກສະໝາມບິນໂນ້ຍບາຍ ຜ່ານຂົວແມ່ນໍາແດງ ມາຫາໃຈກາງຕົວເມືອຮ່າໂນ້ຍປະມານ 60 ກິໂລແມັດ ແນມເບິ່ງສອງຝາກຂ້າງທາງຈະເຫັນການປັບປຸ່ງປ່ຽນແປງທັດສະນີຍະພາບຂອງນະຄອນຫຼວງຮ່າໂນ້ຍຢ່າງສວຍງາມ, ມີການປູກຕົ້ນໄມ້ຕາມຄູ່ກາງທາງ, ສອງຝາກຂ້າງທາງຕາມທິດສີຂຽວຍືນຍົງຮັກສາສິ່ງແວດລ້ອມໄດ້ດີ.ສໍານັກງານອົງການສະໄໝກ່ອນຍັງປົກປັກຮັກສາອານຸລັກໄດ້ເປັນຢ່າງດີ. ບໍລິສັດ, ຮ້ານຄ້າ, ເຮືອນຊານບ້ານຊ່ອງຂອງປະຊົນທີ່ຊຸດໂຊມທີ່ເຄີຍເຫັນໃນໄລຍະຜ່ານມາແມ່ນໄດ້ຮັບການ ກໍ່ສ້າງເປັນຕຶກສູງຫຼາຍແຫ່ງມີຄວາມຫຼາກຫຼາຍ ແລະທັນສະໄໝຂື້ນຢ່າງສວຍງາມ, ຖະນົນຫົນທາງແຄບ, ທາງດ່ວນ, ຂົວຫຼາຍແຫ່ງໄດ້ຮັບການປັບປຸ່ງກໍ່ສ້າງຢ່າງກວ້າງຂວາງຮອງຮັບການສັນຈອນຂອງປະຊາຊົນທີ່ໜາແໜ້ນ, ສະແດງໃຫ້ເຫັນວ່າ:ການນໍາພັກ-ລັດ ຫວຽດນາມ, ເຈົ້າຄອງນະຄອນຮ່າໂນ້ຍມີວິໄສທັດ ມຸ້ງໝັ້ນປະຕິຮູບໃນການປັບປຸ່ງຕົວເມືອງໃຫ້ໄປສູ່ຄວາມເປັນລະບຽບຮຽບຮ້ອຍທັນສະໄໝສ້າງສາທາລະນຸປະໂພກອໍານວຍຄວາມສະດວກໃຫ້ກັບປະຊາຊົນສ້າງນະຄອນຫຼວງໄປສູ່ຄວາມທັນສະໄໝຂື້ນເປັນກ້າວໆ.

ເມື່ອເວົ້າເຖິງພາຫານະກ່ອນໜ້ານີ້ຢູ່ນະຄອນຫຼວງຮ່າໂນ້ຍລົດຖີບຈໍານວນຫຼາຍຈະເປັນພາຫານະຕົ້ນຕໍທີ່ປະຊາຊົນຊົມໃຊ້ລອງລົງມາແມ່ນລົດຈັກ ແລະລົດໃຫ່ຍມີຈໍານວນໜ້ອຍ. ແຕ່ປັດຈຸບັນໃນນະຄອນຫູວງລົດຖີບເກືອບວ່າບໍ່ເຫັນເລີຍ, ລົດຈັກ ແລະລົດໃຫ່ຍເພີ່ມຂື້ນຫຼາຍເທົ່າສະແດງວ່າປະຊາຊົນຫວຽດນາມ ມີລາຍຮັບເພີ່ມຂື້ນ ຊີວິດການເປັນຢູ່ດີຂື້ນ. ຕາມສະຖິຕິໃນເດືອນພະຈິກ ປີ 2022 ຮ່າໂນ້ຍ ມີຈໍານວນພາຫະນະທັງໝົດ 7.784,657 ຄັນ, ໃນນີ້, ມີລົດໃຫ່ຍ 1.056,423 ຄັນ,ລົດຈັກ 6.545.317 ຄັນ ແລະລົດຈັກໄຟຟ້າ 182.917 ຄັນ.

ປັດຈຸບັນ,ນະຄອນຫຼວງຮ່າໂນ້ຍ ມີປະຊາກອນທັງໝົດ 11 ລ້ານ ກວ່າຄົນ (ຜູ້ມີສໍາມະໂນຄົວ) ຄວາມໜາແໜ້ນຂອງພົນລະເມືອງສະເລ່ຍ 2.398.ຄົນຕໍ່/ກມ 2.

ໃນເດືອນສິງຫາປີ 2023 ນີ້, ນະຄອນຫຼວງຮ່າໂນ້ຍ ໄດ້ຈັດພິທີສະເຫຼີມສະຫຼອງຄົບຮອບ 15 ປີ ຂອງການສ້າງຕັ້ງເປັນເຂດປົກຄອງຕົນເອງ. ສະພາບເສດຖະກິດ ຂອງນະຄອນຮ່າໂນ້ຍແມ່ນມີຄວາມເຕີບໂຕເປັນລໍາດັບ. ຕາມສະຖິຕິ ໃນສົກ 2011-2022 (GRDP)ເພີ່ມຂື້ນ ສະເລ່ຍ 6,67% ໃນນີ້ການບໍລິການເພິ່ມຂື້ນ 6,77 % ອຸດສະຫະກໍາ-ກໍ່ສ້າງ ເພີ່ມຂື້ນ 8,19%, ກະສິກໍາເພີ່ມຂື້ນ 2,87% ອັດຕາເຕີບໂຕສະເລ່ຍ 5,24%. ລາຍຮັບຂອງປະຊາຊົນ ໃນປີ 2023 ນີ້ ໄດ້  291 ລ້ານດົງຕໍ່ຄົນຕໍ່ປີ .ເພີ່ມຂື້ນ 180 ກວ່າລ້ານດົງຕໍ່ຄົນຕໍ່ປີ ທຽບໃສ່ ປີ 2011.ປີ 2022 ຍອດມູນຄ່າການສົ່ງອອກ ແລະນໍາເຂົ້າບັນລຸ 58 ຕື້ໂດລາ, ອັດຕາເງິນເຟີ້ສາມາດຄວບຄຸມໄດ້ໃນລະດັບດີ.

ນະຄອນຮ່າໂນ້ຍ ນອກຈາກເອົາໃຈໃສ່ພັດທະນາດ້ານການຜະລິດກະສິກໍາ. ອຸດສະຫະກໍາ-ປຸ່ງແຕ່ງ, ຜະລິດ, ພັດທະນາເຕັກໂນໂລຊີລະດັບສູງແລ້ວຍັງໄດ້ຖືສໍາຄັນຍົດລະດັບຫັດຖະກໍາຈັກສານເປັນສິນຄ້າໃຊ້ສອຍພາຍໃນປະເທດ ແລະເປັນສິນຄ້າສົ່ງອອກ. ປັດຈຸບັນທົ່ວ,ນະຄອນຮ່າໂນ້ຍມີບ້ານເຮັດອາຊີບຫັດຖະກໍາ 1.350 ບ້ານ,ໃນນີ້ ມີ 313 ບ້ານທີ່ໄດ້ຮັບຮອງເປັນບ້ານຫັດຖະກໍາທີ່ສົມບູນແບບ.

ດ້ານການທ່ອງທ່ຽວກໍມີການພັດທະນາຄ່ຽງຄູ່ກັນໄປກັບຂະແໜງການອື່ນໆ ໃນປີ 2022 ຜ່ານມາ, ຈໍານວນນັກທ່ອງທ່ຽວມີທັງໝົດ 18,7 ລ້ານເທື່ອຄົນ, ໃນນັ້ນມີນັກທ່ອງທ່ຽວສາກົນ 1,5 ລ້ານເທື່ອຄົນ, ຄາດວ່າໝົດປີ 2023 ຈະດຶ່ງດູດນັກທ່ອງທ່ຽວເຂົ້າມາທັງໝົດ 22 ລ້ານຄົນ. ການທ່ອງທ່ຽວຮ່າໂນ້ຍກາຍເປັນຂະແໜງເສດຖະກິດທີ່ສໍາຄັນຖືກຈັດຢູ່ໃນ 10 ນະຄອນທີ່ມີການຂະຫຍາຍຕົວທາງດ້ານການທ່ອງທ່ຽວໄວທີ່ສຸດໃນໂລກ.

ໂດຍ:ໄຊ ຕະວິຍານ

 

 

แชร์