2024 ຍັງເປັນປີທີ່ທ້າທາຍໃນແງ່ຂອງການຄຸ້ມຄອງອັດຕາແລກປ່ຽນ ແລະເງິນເຟີ້

ການຈັດຕັ້ງປະຕິບັດແຜນເງິນຕາຂອງລັດຖະບານຍັງມີຄວາມທ້າທາຍຫຼາຍດ້ານເນື່ອງຈາກຖານະເງິນຕາຂອງປະເທດແມ່ນອ່ອນແອ (ຂາດດຸນເງິນຕາ ບວກກັບ ຄັງສຳຮອງເງິນຕາຕ່າງປະເທດຕໍ່າ).

ທ່ານ ບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຊີ້ແຈງຕໍ່ຂໍ້ຊັກຖາມຂອງສາມະຊິກສະພາແຫ່ງຊາດກ່ຽວກັບການຄຸ້ມຄອງອັດຕາແລກປ່ຽນ ແລະເງິນເຟີ້ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ສະໄໝທີ IX ວ່າ: 2024 ຍັງເປັນປີທີ່ທ້າທາຍໃນແງ່ຂອງການຄຸ້ມຄອງອັດຕາແລກປ່ຽນ ແລະເງິນເຟີ້ໃນນັ້ນທ່ານໄດ້ຍົກໃຫ້ເຫັນຈຸດພິເສດ ເງິນເຟີ້ ຂອງ ສປປ ລາວ ແມ່ນຂຶ້ນກັບອັດຕາແລກປ່ຽນເປັນປັດໄຈຕົ້ນຕໍເນື່ອງຈາກເສດຖະກິດຊົມໃຊ້ສິນຄ້ານຳເຂົ້າ 70-80%, ນອກນັ້ນ ກໍ່ມີປັດໄຈຕົ້ນທຶນການຜະລິດ, ການຄຸ້ມຄອງລາຄາ, ການຄຸ້ມຄອງລະບົບການຄ້າຍົກ-ຄ້າຍ່ອຍ; ສະນັ້ນການຈະຫຼຸດອັດຕາເງິນເຟີ້ກໍ່ຕ້ອງສຸມໃສ່ການສ້າງສະເຖຍລະພາບໃຫ້ອັດຕາແລກປ່ຽນບໍ່ໃຫ້ຜັນຜວນໃຫ້ຄົງຄ່າ ແລະແຂງຄ່າ (ຂຶ້ນກັບສະພາບ); ຈະເຮັດໃຫ້ອັດຕາແລກປ່ຽນມີສະເຖຍລະພາບຈະຕ້ອງສ້າງຄວາມສົມດຸນດ້ານຄວາມຕ້ອງການ ແລະຄວາມສາມາດສະໜອງດ້ານເງິນຕາ ຄື: 1) ເພີ່ມລາຍຮັບເປັນເງິນຕາເຂົ້າເສດຖະກິດ; 2) ຫຼຸດຄວາມຕ້ອງການເງິນຕາລົງ; 3) ສ້າງກົນໄກການແລກປ່ຽນໃນລະບົບທະນາຄານໃຫ້ຄົບຊຸດບໍລິການໃຫ້ສັງຄົມຢ່າງທົ່ວເຖິງຕາມກົດໝາຍ ແລະເຂົ້າເຖິງງ່າຍ; 4) ຈໍາກັດການຄ້າຂາຍນອກລະບົບ, ການລັກລອບສິນຄ້າເຂົ້າປະເທດ.

ສ່ວນການຈັດຕັ້ງປະຕິບັດແຜນເງິນຕາໃນປີ 2023 ນີ້, ຜູ້ວ່າການທະນາຄານແຫ່ງ ສປປ ລາວ ກ່າວວ່າປີທີ່ມີຄວາມຫຼໍ່ແຫຼມຫຼາຍ ແລະທ້າທາຍຫຼາຍດ້ານເນື່ອງຈາກ ຖານະເງິນຕາຂອງປະເທດແມ່ນອ່ອນແອ (ຂາດດຸນເງິນຕາ ບວກກັບ ຄັງສຳຮອງເງິນຕາຕ່າງປະເທດ ຕໍ່າ), ຈຸດປະສົງຕົ້ນຕໍ ແລະ ເປັນບູລິມະສິດທີ່ສຸດ ຄື: ຈະຕ້ອງບໍ່ໃຫ້ເກີດສະພາບຂາດເງິນຕາໃນການນຳເຂົ້າສິນຄ້າບູລິມະສິດເປັນຕົ້ນນໍ້າມັນເຊື້ອໄຟ ແລະຄ່ອຍດັດສົມຊ່ວຍຕະຫຼາດເພື່ອບໍ່ໃຫ້ອັດຕາແລກປ່ຽນຜັນຜວນກໍ່ຄືເງິນກີບອ່ອນເກີນໄປ, ສະນັ້ນ,ວຽກທີ່ທະນາຄານແຫ່ງ ສປປ ລາວ ປະຕິບັດ ຄື: ດຳເນີນນະໂຍບາຍຢ່າງຮັດກຸມເພື່ອປະສິດທິພາບເຄື່ອງມືເງິນຕາໃຫ້ສູງຂຶ້ນ (ອັດຕາດອກເບ້ຍພື້ນຖານ, ເງິນແຮຝາກບັງຄັບ, ພັນທະບັດ, ຕະຫຼາດປິດ); ເກັບຊື້ເງິນຕາຈາກເສດຖະກິດໃນຊ່ວງເງິນຕາເຫຼືອ ເພື່ອສ້າງຄວາມເຂັ້ມແຂງໃຫ້ຄັງສຳຮອງເງິນຕາໄວ້ດັດສົມສິນຄ້າທີ່ຈໍາເປັນ (ນໍ້າມັນເຊື້ອໄຟ ແລະ ອື່ນໆ); ສືບຕໍ່ຫັນການແລກປ່ຽນເຂົ້າລະບົບທະນາຄານ, ຊຸກຍູ້ໃຫ້ທະນາຄານທຸລະກິດສ້າງລະບົບແລກປ່ຽນໃຫ້ກວ້າງຂວາງທົ່ວສັງຄົມ, ສະດວກ ແລະເຂົ້າເຖິງງ່າຍ; ສົມທົບກັບ ເຈົ້າໜ້າທີ່ ປກສ ໃນການກວດກາບຸກຄົນ ແລະກຸ່ມຄົນທີ່ເຄື່ອນໄຫວແລກປ່ຽນເງິນຕາບໍ່ຖືກຕ້ອງຕາມລະບຽບກົດໝາຍ; ຮີບຮ້ອນເຮັດວຽກກັບບໍລິສັດສົ່ງອອກສິນຄ້າເພື່ອໃຫ້ເຂົ້າໃຈສະພາບຂອງແຕ່ລະຂະແໜງການ, ເກັບກຳຂໍ້ມູນ, ຄົ້ນຄວ້າກົນໄກຕິດຕາມສ້າງລະບຽບນິຕິກໍາການລົງທຶນໂດຍກົງຈາກຕ່າງປະເທດ (FDI), ເຮັດໃຫ້ເງິນຕາເຂົ້າຜ່ານລະບົບໃຫ້ຫຼາຍຂຶ້ນ; ຮັບປະກັນຄວາມໝັ້ນຄົງຂອງລະບົບທະນາຄານ ແລະ ສະຖາບັນການເງິນມີຄວາມເຂັ້ມແຂງຫຼາຍຂຶ້ນ.

แชร์