ໂຄະໂຄໂຣະ ສົ່ງເສີມຄົນລາວໄປເຮັດວຽກຕ່າງແດນ ຫວັງນຳເງິນຕາເຂົ້າປະເທດ

ບໍລິສັດຈັດຫາງານ ໂຄະໂຄໂຣະ ລາວ ມີຄວາມມຸ່ງໝັ້ນຈັດຫາງານແບບຖືກຕ້ອງຕາມກົດໝາຍໃຫ້ກັບຄົນລາວເພື່ອໄປເຮັດວຽກຢູ່ຕ່າງປະເທດຫວັງຈະນຳເງິນຕາເຂົ້າປະເທດໃຫ້ຫຼາຍເທົ່າທີ່ຈະຫຼາຍໄດ້, ຊຶ່ງປະຈຸບັນທາງບໍລິສັດມີຄວາມຕ້ອງການແຮງງານຈໍານວນຫຼາຍເພື່ອບັນຈຸເຂົ້າໃນບັນດາໂຮງຈັກໂຮງງານໃນຕ່າງປະເທດ.

ທ່ານນາງ ວົງຈັນ ບົວແພງ ປະທານບໍລິສັດຈັດຫາງານ ໂຄະໂຄໂຣະ ລາວ ຈຳກັດຜູ້ດຽວ ໃຫ້ສໍາພາດໃນງານຕະຫຼາດນັດແຮງງານເພື່ອສົ່ງເສີມການຈັດຫາງານພາຍໃນ ແລະການໄປເຮັດວຽກຢູ່ຕ່າງປະເທດ ແບບຖືກຕ້ອງຕາມກົດໝາຍ (Job Fair) ທີ່ຈັດຂຶ້ນຢູ່ສູນການຄ້າ ລາວ-ໄອເຕັກ ເມື່ອບໍ່ດົນຜ່ານມານີ້ ວ່າ: ບໍລິສັດຈັດຫາງານ ໂຄະໂຄໂຣະ ລາວ ເປັນບໍລິສັດຈັດຫາແຮງງານທີ່ສ້າງຕັ້ງຂຶ້ນໃໝ່ ມີຈຸດປະສົງ ຢາກສົ່ງເສີມຄົນລາວໃຫ້ໄປເຮັດວຽກຢູ່ຕ່າງປະເທດເພື່ອນຳເງິນຕາເຂົ້າປະເທດ ພ້ອມນີ້ ຍັງຈັດຫາແຮງງານ ຕ່າງປະເທດເຂົ້າມາເຮັດວຽກຢູ່ ສປປ ລາວ ແບບຖືກຕ້ອງຕາມກົດໝາຍ. ປະຈຸບັນທາງບໍລິສັດມີຄວາມຕ້ອງການແຮງງານຈໍານວນຫຼາຍ ເພື່ອໄປເຮັດວຽກຢູ່ປະເທດຍີ່ປຸ່ນ ເສຍເລ່ຍ 1 ປີປະມານ 500 ຄົນ ບັນຈຸເຂົ້າໃນຂະແໜງກະສິກຳ, ບັນດາໂຮງຈັກໂຮງງານ ແລະ ບໍລິການເບິ່ງແຍງຜູ້ສູງອາຍຸຢູ່ຕາມໂຮງໝໍຕ່າງໆ,ເງິນເດືອນພື້ນຖານແມ່ນ 25 ລ້ານກີບ, ໂດຍໃນເດືອນພະຈິກ 2023 ນີ້ ທາງບໍລິສັດ ຈະຈັດສົ່ງແຮງງານລາວໄປເຮັດວຽກຢູ່ປະເທດຍີ່ປຸ່ນງວດທຳອິດ ຈໍານວນ 4 ຄົນ, ຊຶ່ງແຮງງານດັ່ງກ່າວໄດ້ຜ່ານການຝຶກອົບຮົມ ແລະຮູ້ຮຽນພາສາຍີ່ປຸ່ນມາແລ້ວ. ຫຼັງຈາກແຮງງານຖືກສົ່ງໄປແລ້ວທາງບໍລິສັດຈະໄດ້ມີການຕິດຕາມ ແລະຖ້າກໍລະນີ ແຮງງານພົບບັນຫາອຸປະສັກ ທາງບໍລິສັດກໍຈະໄດ້ໃຫ້ການຮ່ວມມືຊ່ວຍເຫຼືອ ແລະຍັງສາມາດຕິດຕໍ່ພົວພັນກັບບໍລິສັດໄດ້ຕະຫຼອດເວລາ.

ທ່ານນາງ ວົງຈັນ ບົວແພງ ໃຫ້ຮູ້ຕື່ມວ່າ: ແຮງງານລາວຈຳນວນຫຼວງຫຼາຍແມ່ນມີຄວາມຕ້ອງການໄປເຮັດວຽກຢູ່ປະເທດຍີ່ປຸ່ນແຕ່ມີຄວາມຫຍຸ້ງຍາກທາງດ້ານພາສາ ແລະ ການຮູ້ຮຽນພາສາຍີ່ປຸ່ນ ທີ່ທາງບໍລິສັດໄດ້ຈັດສົ່ງຍັງແມ່ນຢູ່ປະເທດໄທ ເຮັດໃຫ້ບາງແຮງງານທີ່ມີຄວາມຕັ້ງໃຈໄປເຮັດວຽກຢູ່ຍີ່ປຸ່ນໄດ້ຍຸດຕິລົງ, ເພື່ອແກ້ໄຂບັນຫາດັ່ງກ່າວ ແລະເພື່ອເປັນການສ້າງຄວາມສະດວກໃຫ້ກັບແຮງງານທາງບໍລິສັດຈະເປີດສູນສອນພາສາຍີ່ປຸ່ນຂຶ້ນທີ່ນະຄອນຫຼວງວຽງຈັນ ໃນຕົ້ນປີ 2024 ທີ່ຈະມາເຖິງນີ້ ຊຶ່ງສູນດັ່ງກ່າວສາມາດຮອງຮັບນັກຮຽນໄດ້ 100 ກວ່າຄົນ. ນອນຈາກນີ້ຄ່າໃຊ້ຈ່າຍເດີນທາງ ບໍລິສັດ ໂຄະໂຄໂຣະ ລາວ ຍັງສາມາດອອກໃຫ້ກ່ອນໄດ້.

ສ່ວນເງື່ອນໄຂການສະໝັກແມ່ນມີອາຍຸ 18  ປີຂຶ້ນໄປ, ເປັນຄົນດຸໝັ່ນຕັ້ງໃຈເຮັດວຽກ, ມີສຸຂະພາບແຂງແຮງສົມບູນ, ທ່ານໃດສົນໃຈສອບຖາມລາຍລະອຽດໄດ້ທີ່ ບໍລິສັດຈັດຫາງານ ໂຄະໂຄໂຣະ ລາວ ຈຳກັດຜູ້ດຽວ ຫ້ອງການຕັ້ງຢູ່ ບ້ານໜອງບົວທອງເໜືອ ເມືອງສີໂຄດຕະບອງ ນະຄອນຫຼວງວຽງຈັນ.

แชร์