ສາເຫດການຂາດແຄນແຮງງານພາຍໃນ ແລະວິທີແກ້ໄຂ

ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະສະຫວັດດີການສັງຄົມ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX , ໃນວັນທີ 3 ພະຈິກ 2023 ວ່າ: ສາເຫດການຂາດແຄນແຮງງານເກີດຈາກສອງປັດໄຈຫຼັກຄື: ປັດໄຈພາຍນອກ ແລະປັດໄຈພາຍໃນປະເທດ.

ປັດໄຈພາຍນອກ ຍ້ອນໄດ້ຮັບຜົນກະທົບຈາກສະພາບການແຜ່ລະບາດຂອງພະຍາດໂຄວິດ 19 ແລະການຜັນແປຂອງເສດຖະກິດໂລກໃນປະຈຸບັນຊຶ່ງເປັນຜົນກະທົບຕໍ່ສະພາບການພັດທະນາເສດຖະກິດ-ສັງຄົມຂອງ ສປປ ລາວ ຢ່າງຫຼີກລ້ຽງບໍ່ໄດ້ ເຮັດໃຫ້ເກີດສະພາບເງີນເຟີສົ່ງຜົນກະທົບຕໍ່ທຸກຫົວໜ່ວຍການຜະລິດເຮັດໃຫ້ຕົ້ນທືນການຜະລິດ, ລາຄາສິນຄ້າໃນທ້ອງຕະຫຼາດສູງຂຶ້ນ; ຊິ່ງສົ່ງຜົນກະທົບໂດຍກົງຕໍ່ສະພາບການດໍາລົງຊີວິດຂອງຊາວຜູ້ອອກແຮງງານລາວ ນອກຈາກນັ້ນປະເທດເພື່ອນບ້ານເຂົາເຈົ້າກໍ່ມີສະພາບຂາດແຄນແຮງງານ ແລະພະຍາຍາມສ້າງນະໂຍບາຍເພື່ອດືງດູດເອົາແຮງງານລາວໄປເຮັດວຽກໃນຕຳແໜ່ງງານດັ່ງກ່າວ.

ສ່ວນປັດໃຈພາຍໃນຕຳແໜ່ງງານພາຍໃນປະເທດທີ່ຕ້ອງການຈຳນວນຫຼວງຫຼາຍແຕ່ຍັງບໍ່ສາມາດຕອບສະໜອງໄດ້ຕາມຄວາມຕ້ອງການຕົວຈິງດ້ານການລ້ຽງຊີບຂອງແຮງງານລາວເປັນຕົ້ນດ້ານເງິນເດືອນ ແລະສະຫວັດດີການຕ່າງໆ ສຳລັບຕຳແໜ່ງງານທີ່ມີເງິນເດືອນສູງເງື່ອນໄຂການເຂົ້າເຖິງຕຳແໜ່ງງານກໍ່ສູງຕາມກັນເຮັດໃຫ້ແຮງງານລາວເຂົ້າເຖິງຕຳແໜ່ງງານເຫຼົ່ານັ້ນໄດ້ໜ້ອຍນອກຈາກນີ້ແນວຄິດຂອງແຮງງານລາວສ່ວນໃຫຍ່ມີຄ່ານິຍົມໄປເຮັດວຽກຢູ່ຕ່າງປະເທດຊຶ່ງສັງເກດເຫັນໄດ້ຊ່ວງການແຜ່ລະບາດຂອງພະຍາດໂຄວິດ 19 ແຮງງານລາວທີ່ກັບມາຈາກຕ່າງປະເທດເປັນຈຳນວນບໍ່ໜ້ອຍ.

ສໍາລັບວິທີການແກ້ໄຂແມ່ນຕ້ອງສ້າງໃຫ້ມີກົນໄກທີ່ສາມາດຕິດຕາມການເຄື່ອນໄຫວຂອງຕະຫຼາດແຮງງານພາຍໃນປະເທດໄດ້ຕະຫຼອດເວລາ ຫຼືຕ້ອງມີການສຳຫລວດກຳລັງແຮງງານ ໃຫ້ຖີ່ຂຶ້ນ (ບົດຮຽນຕ່າງປະເທດທີ່ພັດທະນາແລ້ວ ເດືອນ ຫຼືສາມເດືອນ/ຄັ້ງ, ປະເທດກຳລັງພັດທະນາ 6 ເດືອນ-1ປີ/ຄັ້ງ ດັ່ງນີ້ເປັນຕົ້ນ).

แชร์