.

ບໍລິສັດ ພູເບ້ຍ ມາຍນິງ ມອບເງິນປັນຜົນ 15.83 ລ້ານໂດລາສະຫະລັດ ໃຫ້ລັດຖະບານລາວໃນປີ 2023 ຊຶ່ງລວມມູນຄ່າການປະກອບສ່ວນທັງໝົດແມ່ນຫຼາຍກວ່າ 1 ຕື້ໂດລາສະຫະລັດ

-

ບໍລິສັດ ພູເບ້ຍ ມາຍນິງ ໄດ້ມອບເງິນປັນຜົນເປັນຈໍານວນທັງໝົດ 15.83 ລ້ານໂດລາສະຫະລັດ ໃຫ້ລັດຖະບານລາວໃນປີນີ້. ການປະກອບສ່ວນລ້າສຸດໃນຄັ້ງນີ້ ໝາຍເຖິງບໍລິສັດ ພູເບ້ຍ ມາຍນິງ ໄດ້ມອບຫຼາຍກວ່າ 1 ຕື້ໂດລາສະຫະລັດໃຫ້ແກ່ລັດຖະບານລາວໃນໄລຍະເວລາ 15 ປີ ທີ່ບໍລິສັດໄດ້ດໍາເນີນງານຢູ່ລາວ. ພັນທະໂດຍກົງດັ່ງກ່າວນີ້ ແມ່ນໄດ້ມອບຜ່ານການລວມກັນຂອງເງິນປັນຜົນ, ຄ່າຊັບພະຍາກອນ, ພັນທະອາກອນທີ່ກ່ຽວຂ້ອງ ແລະການບໍລິການນໍາເຂົ້າຕ່າງໆ.

ພັນທະສະສົມຂອງພວກເຮົາທີ່ມອບໃຫ້ລັດຖະບານ ລວມມີອາກອນກໍາໄລຈໍານວນ 315 ລ້ານໂດລາສະຫະລັດ, ຄ່າຊັບພະຍາກອນ 460.3 ລ້ານໂດລາສະຫະລັດ, ອາກອນລາຍໄດ້ສ່ວນບຸກຄົນ 59.2 ລ້ານໂດລາສະຫະລັດ ແລະອາກອນທາງ 35.4 ລ້ານໂດລາສະຫະລັດ. ເງິນປັນຜົນທີ່ມອບໃຫ້ລັດຖະບານລາວທັງໝົດ 84.91 ລ້ານໂດລາສະຫະລັດ. ນອກຈາກນັ້ນ, ພວກເຮົາຍັງໄດ້ມອບຄ່າທໍານຽມບໍລິການນໍາເຂົ້າຈໍານວນ 24 ລ້ານໂດລາສະຫະລັດ, ກອງທຶນປະກັນສັງຄົມ 17.9 ລ້ານໂດລາສະຫະລັດ, ເງິນບໍລິຈາກ ແລະ ອຸປະຖໍາຕ່າງໆຈໍານວນ 3 ລ້ານໂດລາສະຫະລັດ ແລະອາກອນການສຶກສາຂອງນັກຮຽນກ່ຽວຂ້ອງ ແລະສິ່ງອໍານວຍຄວາມສະດວກໃຫ້ພະນັກງານ ແລະ ຄ່າສໍາປະທານຈໍານວນປະມານ 1 ລ້ານໂດລາສະຫະລັດ. ເງິນປັນຜົນ, ຄ່າຊັບພະຍາກອນ, ພັນທະອາກອນຕ່າງໆທີ່ກ່ຽວຂ້ອງ ແລະ ຄ່າທໍານຽມບໍລິການນໍາເຂົ້າທີ່ໄດ້ມອບໃຫ້ລັດຖະບານລາວ ລວມແລ້ວແມ່ນຫຼາຍກວ່າ 1 ຕື້ໂດລາສະຫະລັດ ໃນໄລຍະ 15 ປີ ທີ່ບໍລິສັດ ພູເບ້ຍ ມາຍນິງ ໄດ້ດໍາເນີນງານຢູ່ລາວ.   

ການມອບເງິນປັນຜົນດັ່ງກ່າວນີ້ແມ່ນມາຈາກຮຸ້ນທີ່ລັດຖະບານຖືກໍາມະສິດ 10 ສ່ວນຮ້ອຍໃນບໍລິສັດ ພູເບ້ຍ ມາຍນິງ. ການຮ່ວມມືອັນເຂັ້ມແຂງຂອງພວກເຮົາ ສືບຕໍ່ເຮັດໃຫ້ການພັດທະນາເສດຖະກິດ-ສັງຄົມຂອງລາວເຕີບໃຫຍ່ຂະຫຍາຍຕົວ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານຂອງບໍລິສັດ ແພນອອສ໌ ໄດ້ກ່າວວ່າການມອບເງິນປັນຜົນດັ່ງກ່າວນີ້ແມ່ນສະແດງໃຫ້ເຫັນເຖິງການປະກອບສ່ວນທາງດ້ານການເງິນຢ່າງຫຼວງຫຼາຍຂອງບໍລິສັດ ພູເບ້ຍ ມາຍນິງ ໃນຖານະທີ່ເປັນຜູ້ນໍາໃນອຸດສາຫະກໍາບໍ່ແຮ່ອັນເຂັ້ມແຂງຂອງລາວ.

ແບບໂຄງສ້າງຍຸດທະສາດທາງທຸລະກິດຂອງພວກເຮົາໃນການຮັກສາການຜະລິດໃນຕົ້ນທຶນທີ່ຕໍ່າກວ່າຢູ່ໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ ແລະໂຄງການຂຸດຄົ້ນ-ປຸງແຕ່ງ ຄໍາ-ເງິນ ບ້ານຫ້ວຍຊາຍ ໄດ້ຊ່ວຍໃຫ້ບໍລິສັດ ພູເບ້ຍ ມາຍນິງ ສາມາດມອບເງິນປັນຜົນເຫຼົ່ານີ້.

ທ່ານ ດາລິງ ກ່າວວ່າ: “ພັນທະອາກອນຕ່າງໆ, ຄ່າຊັບພະຍາກອນ, ເງິນປັນຜົນ ແລະຄ່າທໍານຽມອື່ນໆ ທີ່ພວກເຮົາໄດ້ມອບໃຫ້ນັ້ນແມ່ນເປັນຈໍານວນຫຼາຍເຂົ້າໃນລາຍຮັບຂອງລັດຖະບານລາວ. ຂ້າພະເຈົ້າເຊື່ອໝັ້ນວ່າໂຄງການຂອງພວກເຮົາຈະສືບຕໍ່ສ້າງໂອກາດຕ່າງໆໃນການເຮັດໃຫ້ການພັດທະນາເສດຖະກິດ-ສັງຄົມເຕີບໃຫຍ່ຂະຫຍາຍຕົວໃນໄລຍະຍາວຢູ່ລາວກໍ່ຄືຢູ່ໃນບັນດາຊຸມຊົນທ້ອງຖິ່ນທີ່ພວກເຮົາເຂົ້າໄປດໍາເນີນງານ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ໃຫ້ຮູ້ຕື່ມອີກວ່າ: “ໃນປີ 2021, ກິດຈະກໍາວຽກງານຂອງບໍລິສັດ ພູເບ້ຍ ມາຍນິງທັງໝົດ, ລວມມີການລົງທຶນຕ່າງໆ ແລະລາຍຈ່າຍກໍ່ສ້າງພື້ນຖານແມ່ນຄິດເປັນ 2.3 ສ່ວນຮ້ອຍຂອງລວມຍອດຜະລິດຕະພັນພາຍໃນຂອງລາວ. ຂໍຂອບໃຈສະພາບການດໍາເນີນທຸລະກິດທີ່ເຂັ້ມແຂງ ແລະລະບຽບການຕ່າງໆທີ່ລັດຖະບານໄດ້ອໍານວຍຄວາມສະດວກໃຫ້, ພວກເຮົາມີຄວາມໝັ້ນຄົງທາງດ້ານການເງິນທີ່ເຂັ້ມແຂງ ແລະເປັນໜຶ່ງໃນຜູ້ເສຍອາກອນລາຍໃຫຍ່ທີ່ສຸດໃນປະເທດ.”

แชร์