ເສດຖະກິດລາວເຖິງຈະມີການເຕີບໂຕ ແຕ່ຄຸນນະພາບຍັງບໍ່ທັນສູງ

ໄລຍະເຄິ່ງສະໄໝຜ່ານມາ ເສດຖະກິດຂອງ ສປປ ລາວ ເຖິງວ່າຈະມີການເຕີບໂຕໃນລະດັບ 4,03% ກໍຕາມແຕ່ເຫັນວ່າຄຸນນະພາບຍັງບໍ່ທັນສູງເທົ່າທີ່ຄວນເນື່ອງຈາກການອ່ອນຄ່າຂອງເງິນກີບ ເຮັດໃຫ້ລວມຍອດຜະລິດຕະພັນພາຍໃນຕໍ່ຫົວຄົນມີທ່າອ່ຽງຫຼຸດລົງ.

ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະການລົງທຶນ (ຜທ) ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ເມື່ອວັນທີ 2 ພະຈິກ 2023 ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ເສດຖະກິດສັງຄົມ ວ່າ: ໃນໄລຍະເຄິ່ງສະໄໝ (2021-2023) ຜ່ານມາ ເຫັນວ່າເສດຖະກິດມີການເຕີບໂຕໃນລະດັບ 4,03% (ປີ 2021 ຂະຫຍາຍຕົວ 3,5% ແລະ ປີ 2022 ບັນລຸໄດ້ 4,4% ແລະ ປີ 2023 ຄາດວ່າຈະບັນລຸໄດ້ 4,2%) ຊຶ່ງການປະເມີນຂອງສາກົນການເຕີບໂຕເສດຖະກິດຂອງລາວ ໃນປີ 2023 ຄື: IMF ຢູ່ໃນລະດັບ 4%, ທະນາຄານໂລກ 3,9%, ທະນາຄານພັດທະນາອາຊີ 3,7%. ເຖິງແມ່ນວ່າເສດຖະກິດຈະມີການເຕີບໂຕ ແຕ່ເຫັນວ່າຄຸນນະພາບຍັງບໍ່ທັນສູງເທົ່າທີ່ຄວນ ເນື່ອງຈາກການອ່ອນຄ່າຂອງເງິນກີບ ເຮັດໃຫ້ລວມຍອດຜະລິດຕະພັນພາຍໃນຕໍ່ຫົວຄົນ ມີທ່າອ່ຽງຫຼຸດລົງຈາກປີ 2021 GDP ຕໍ່ຫົວຄົນເທົ່າກັບ 2.595 ໂດລາ ມາເປັນ 1.824 ໂດລາ ໃນປີ 2023 (ແຜນການ 5 ປີ ໃຫ້ໄດ້ 2.880 ໂດລາ) ຊຶ່ງການອ່ອນຄ່າຂອງເງິນກີບມີຜົນເຮັດໃຫ້ອັດຕາເງິນເຟີ້ເພີ່ມຂຶ້ນ, ກະທົບຕໍ່ຄ່າຄອງຊີບຂອງສັງຄົມ, ສະນັ້ນໃນຕໍ່ໜ້າ ລັດຖະບານ ຈະໄດ້ສືບຕໍ່ເພີ່ມທະວີຈັດຕັ້ງປະຕິບັດວຽກງານທີ່ເຄັ່ງຮ້ອນຕາມມະຕິ 19/ກມສພ.

ທ່ານລັດຖະມົນຕີ ກະຊວງ ຜທ ໃຫ້ຮູ້ຕື່ມວ່າ: ເປົ້າໝາຍທີ 3 ການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ຜ່ານມາລັດຖະບານກໍມີຄວາມພະຍາຍາມຢ່າງຕັ້ງໜ້າໃນການຍົກສູງຄຸນນະພາບຂອງການບໍລິການຂອງລັດ, ສົ່ງເສີມການສ້າງວຽກເຮັດງານທຳ, ພັດທະນາຊົນນະບົດ ແລະແກ້ໄຂຄວາມທຸກຍາກຢູ່ຕາມເຂດຈຸດສຸມບຸລິມະສິດຕ່າງໆດ້ວຍການສະໜອງເງື່ອນໄຂ ແລະໂຄງລ່າງພື້ນຖານທີ່ຈຳເປັນຕາມຄວາມສາມາດຕົວຈິງເພື່ອສົ່ງເສີມການຜະລິດ ແລະການສ້າງລາຍຮັບໃຫ້ກັບປະຊາຊົນ ຊຶ່ງໄດ້ເຮັດໃຫ້ຄອບຄົວ ແລະເມືອງທຸກຍາກຫຼຸດລົງເທື່ອລະກ້າວ.

 

 

แชร์