ເປີດການນຳໃຊ້ໂຄງການເຂື່ອນໄຟຟ້ານໍ້າຮຸ່ງ 1

ເມື່ອບໍ່ດົນມານີ້, ທີ່ເມືອງໄຊຍະບູລີ ແຂວງໄຊະບູລີ ໄດ້ຈັດພິທີເປີດການນຳໃຊ້ໂຄງການເຂື່ອນໄຟຟ້ານໍ້າຮຸ່ງ 1 ຂື້ນຢ່າງເປັນທາງການ. ໃຫ້ກຽດເຂົ້າຮ່ວມໂດຍ ທ່ານ ສຈ.ປອ ກິເເກ້ວ ໄຂຄໍາພິທູນ, ຮອງນາຍົກລັດຖະມົນຕີ, ຜູ້ຊີ້ນຳວຽກງານປົກຄອງ ແລະວັດທະນາທຳ ພ້ອມດ້ວຍຜູ້ຕ່າງໜ້າຈາກພາກສ່ວນທີ່ກ່ຽວຂ້ອງ.

ໂຄງການເຂື່ອນໄຟຟ້ານໍ້າຮຸ່ງ I ແມ່ນໄດ້ຮັບການສໍາປະທານ, ດຳເນີນການກໍ່ສ້າງຕິດຕັ້ງ ໂດຍບໍລິສັດ ສີເມືອງກຣຸບ ແລະຄຸ້ມຄອງການຜະລິດ-ບໍາລຸງຮັກສາ ໂດຍ ບໍລິສັດ ນ້ຳຮຸ່ງ 1 ໄຮໂດຼພາວເວີ ຈໍາກັດ ໂດຍໄດ້ຮັບການອອກແບບການກໍ່ສ້າງທັງໝົດຈາກບໍລິສັດ Shino Hydro ຈໍາກັດ. ໂຄງການດັ່ງກ່າວເປັນໂຄງການເຂື່ອນໄຟຟ້າຂະໜາດນ້ອຍ ມີກໍາລັງຕິດຕັ້ງ 15MW, ໃນມູນຄ່າທັງຫມົດ 34.744.800 USD, ສາມາດຜະລິດພະລັງງານໄຟຟ້າໄດ້ 87.280.000 KWh/ປີ. ແຜນສໍາເລັດໂຄງການໃນເບື້ອງຕົ້ນ ແລະແຜນຊື້ຂາຍໄຟຟ້າຢ່າງເປັນທາງການ (COD) ແມ່ນເດືອນ 8 ປີ 2023 ໂດຍເຊື່ອມຕໍ່ເຂົ້າໃນລະບົບ 22KV ຢູ່ສະຖານີໄຟຟ້າເມືອງໄຊຍະບູລີ ທີ່ມີຄວາມຍາວ 29Km.

ຜ່ານການປະຕິດໜ້າວຽກຂອງໂຄງການດັ່ງກ່າວໄລຍະຜ່ານມາແມ່ນໄດ້ພົບພໍ້ອຸປະສັກຄວາມຫຍຸ້ງຍາກເຊັ່ນ: ຂອບເຂດເຮັດວຽກທີ່ຈໍາກັດໃນການຂະຫຍາຍ,ເຫດການນໍ້ານອງໃນປີ 2018, 2021 (ເຮັດໃຫ້ເກີດມີນໍ້າຖ້ວມສະໜາມກໍ່ສ້າງ) ການແຜ່ລະບາດຂອງພະຍາດໂຄວິດ-19 ແລະລະບາດແກ່ຍາວຫຼາຍປີແຕ່ເຖິງຢ່າງໃດໂຄງການກໍ່ໄດ້ສູ້ຊົນແກ້ໄຂຜ່ານຜ່າຈົນສຳເລັດ ເຮັດໃຫ້ເຂື່ອນໄຟຟ້ານໍ້າຮຸ່ງ 1 ມີກຳລັງຕິດຕັ້ງທັງໝົດຮອດປະຈຸບັນ 15 MW ສາມາດຜະລິດກະແສໄຟຟ້າສົ່ງເຂົ້າລະບົບຂອງໄຟຟ້າລາວໄດ້ເປັນການຊ່ວຍຫຼຸດຜ່ອນການນໍ້າເຂົ້າໄຟຟ້າຈາກພາຍນອກ.
.
ຂ່າວ-ພາບ: ບຸນທີ.

แชร์