ກະຊວງ ອຄ ຊີ້ແຈງການເໜັງຕີງຂຶ້ນສູງຂອງລາຄາສິນຄ້າ ແລະມາດຕະການແກ້ໄຂ

ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ສະໄໝທີ IX, ໃນວັນທີ 2 ພະຈິກ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຊີ້ແຈງຕອບຄຳຊັກຖາມຂອງສະພາແຫ່ງຊາດ ແລະສະມາຊິກສະພາແຫ່ງຊາດກ່ຽວກັບລາຄາສິນຄ້າວ່າ: ການເໜັງຕີງຂຶ້ນສູງຂອງລາຄາສິນຄ້າ ແມ່ນເກີດຂຶ້ນຍ້ອນຫລາຍສາເຫດໃນນັ້ນຕົ້ນຕໍແມ່ນຍ້ອນເງິນເຟີ້, ຍ້ອນເງິນກີບອ່ອນຄ່າ, ຍ້ອນຕົ້ນທຶນການຜະລິດສູງ ແລະຍ້ອນຄວາມຄາດຫວັງຜູ້ນຳເຂົ້າ ແລະຜູ້ຜະລິດອາດຄາດຄະເນລາຄາສິນຄ້າຈະເພີ່ມຂຶ້ນໃນອະນາຄົດແລ້ວປັບລາຄາເພື່ອຮັບມື ຫລືຫລຸດຄວາມສ່ຽງຂອງຕົນເຊິ່ງເປັນບັນຫາທີ່ພາກລັດພະຍາຍາມກວດກາ ແລະຄວບຄຸມ.

ທ່ານ ມະໄລທອງ ກົມມະສິດ ກ່າວວ່າ: ປະຈຸບັນລັດຖະບານໄດ້ວາງຫລາຍມາດຕະການເພື່ອຄວບຄຸມລາຄາສິນຄ້າໃຫ້ກັບສູ່ສະພາບປົກກະຕິໂດຍໄວ ໃນນັ້ນ ໄດ້ກຳນົດໂຄງປະກອບລາຄາ, ກຳນົດລາຄາສູງສຸດ,ລາຄາຕໍ່າສຸດ ຫລືຂອບລາຄາ,ຄວບຄຸມສິນຄ້າໃນຄັງແຮສຳຮອງ,ຖົມຂຸມສິນຄ້າ ແລະການບໍລິການ,ການດັດສົມການສະໜອງ ແລະ ຄວາມຕ້ອງການ, ພ້ອມທັງອອກບົດແນະນຳການຈັດຕັ້ງປະຕິບັດໃຫ້ຂັ້ນແຂວງເປັນຜູ້ຄຸ້ມຄອງ, ຄິດໄລ່ລາຄາສິນຄ້າຕາມໂຄງປະກອບລາຄາສິນຄ້າທີ່ສູນກາງກໍານົດ ແລະຮ່ວມມືກັບພາກທຸລະກິດເພື່ອຂາຍສິນຄ້າຫລຸດລາຄາເພື່ອໃຫ້ປະຊາຊົນຜູ້ມີລາຍຮັບຕໍ່າໄດ້ຊື້ສິນຄ້າໃນລາຄາທີ່ເໝາະສົມ.

ສ່ວນແຜນການແກ້ໄຂໃນຕໍ່ໜ້າ: 1) ຈະສືບຕໍ່ປະສານສົມທົບກັບຂະແໜງການ ແລະອົງການປົກຄອງທ້ອງຖິ່ນ ຄົ້ນຄວ້າ ແລະກຳນົດໂຄງສ້າງລາຄາສິນຄ້າທີ່ຈຳເປັນ ທັງຢູ່ໃນ ບັນຊີ ກ ແລະ ບັນຊີ ຂ ເພື່ອໃຫ້ມີລາຄາທີ່ສົມເຫດສົມຜົນ. ພ້ອມທັງຕິດຕາມການເໜັງຕີງລາຄາ ແລະ ໃຊ້ມາດຕະການຕໍ່ຜູ້ລະເມີດຂຶ້ນລາຄາສິນຄ້າທີ່ບໍ່ສອດຄ່ອງ. 2) ຈະປະສານສົມທົບກັບກະຊວງການເງິນ ແລະ ທະນາຄານແຫ່ງ ສປປ ລາວ ເພື່ອຄົ້ນຄວ້າ, ກໍານົດນະໂຍບາຍເງິນຕາ ແລະ ນະໂຍບາຍການເງິນທີ່ເໝາະສົມເພື່ອຫລຸດອັດຕາເງິນເຟີ້ ເເລະຄຸ້ມຄອງອັດຕາແລກປ່ຽນ ໃຫ້ມີຄວາມໝັ້ນທ່ຽງ. 3) ຈະປະສານສົມທົບກັບຂະແໜງການກະສິກຳ ແລະປ່າໄມ້, ຂະແໜງພະລັງງານ ແລະບໍ່ແຮ່, ຂະແໜງການທີ່ກ່ຽວຂ້ອງ ແລະອົງການປົກຄອງທ້ອງຖິ່ນ ເພື່ອພ້ອມກັນຄົ້ນຄວ້າ ເພື່ອຫລຸດຜ່ອນຕົ້ນທຶນການຜະລິດເປັນຕົ້ນ: ການສົ່ງເສີມການຜະລິດຝຸ່ນ, ຫົວອາຫານ, ເຄື່ອງມື-ເຕັກນິກການຜະລິດ, ການໃຫ້ຄວາມຮູ້-ສ້າງຄວາມເຂັ້ມແຂງໃຫ້ແກ່ຜູ້ປະກອບການ. 4) ຈະປັບປຸງຂໍ້ຄົງຄ້າງໃນການຊຸກຍູ້-ສົ່ງເສີມ ໃຫ້ພາກທຸລະກິດ ທີ່ເຮັດແທ້ທຳຈິງສາມາດເຂົ້າເຖິງແຫລ່ງທຶນເພື່ອການຜະລິດເປັນສິນຄ້າ ໂດຍສະເພາະສິນຄ້າ ທີ່ມີຜົນກະທົບແຮງ, ຈຳເປັນຕໍ່ຊີວິດການເປັນຢູ່ຂອງປະຊາຊົນ; 5) ຈະເລັ່ງຄົ້ນຄວ້າປັບປຸງບັນດານິຕິກຳທີ່ຕິດພັນກັບວຽກລາຄາ ເປັນຕົ້ນການຍົກລະດັບ ດໍາລັດ ວ່າດ້ວຍລາຄາສິນຄ້າ ແລະຄ່າບໍລິການ, ບັນຊີຄວບຄຸມ, ຄຳແນະນຳກ່ຽວກັບການກຳນົດໂຄງສ້າງລາຄາ ເເລະອື່ນໆ ເພື່ອໃຫ້ຕອບສະໜອງຕາມຄວາມຮຽກຮ້ອງຕ້ອງການຕົວຈິງ; 6) ຈະປຶກສາຫາລື ແລະ ປັບປຸງກົນໄກການປະສານງານ ແລະ ແບບແຜນວິທີການເຮັດວຽກຂອງຄະນະຄຸ້ມຄອງລາຄາທັງຂັ້ນສູນກາງ ແລະ ຂັ້ນທ້ອງຖິ່ນໃຫ້ມີປະສິດທິພາບ ແລະປະສິດທິຜົນສູງຂຶ້ນຕື່ມ. ພ້ອມນີ້ກໍຈະປະສານສົມທົບກັບຄະນະກໍາມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມ ເພື່ອແລກປ່ຽນຂໍ້ມູນ, ຄໍາຄິດເຫັນ ແລະຄຳສະເໜີຂອງ ສສຊ ແລະປະຊາຊົນເພື່ອປັບປຸງການປະຕິບັດວຽກງານຄຸ້ມຄອງລາຄາສິນຄ້າຂອງລັດຖະບານໃຫ້ນັບມື້ນັບດີຂຶ້ນ.

 

แชร์