2024 ລັດຖະບານ ຈະຄົ້ນຄວ້າເພີ່ມດັດສະນີເງິນເດືອນ ແກ້ໄຂຄ່າຄອງຊີບ

ຈາກບັນຫາເງິນເຟີ້ ແລະອັດຕາແລກປ່ຽນທີ່ສູງເຮັດໃຫ້ຄ່າຄອງຊີບນັບມື້ເພີ່ມຂຶ້ນເຮັດໃຫ້ເງິນເດືອນພະນັກງານ-ລັດຖະກອນ ບໍ່ພຽງພໍກັບຄ່າໃຊ້ຈ່າຍຕົວຈິງໃນແຕ່ລະເດືອນ, ດັ່ງນັ້ນ ໃນປີ 2024 ທີ່ຈະມາເຖິງນີ້ລັດຖະບານຈະມີການປະເມີນຜົນການຈັດຕັ້ງປະຕິບັດເງິນອຸດໜູນທີ່ໄດ້ຈັດຕັ້ງປະຕິບັດເພື່ອຄົ້ນຄວາເພີ່ມເງິນອຸດໜູນ ຫລື ເພີ່ມດັດສະນີເງິນເດືອນຕື່ມອີກ.

ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ຊີ້ແຈງຄຳຊັກຖາມຂອງສະພາແຫ່ງຊາດ ແລະສະມາຊິກສະພາແຫ່ງຊາດໃນວັນທີ 2 ພະຈິກ 2023, ກ່ຽວກັບການແກ້ໄຂບັນຫາເຄັ່ງຮ້ອນ ເຊັ່ນ: ການຄົ້ນຄວ້າເພີ່ມເງິນນະໂຍບາຍ, ເງິນອຸດໜູນໃຫ້ແກ່ພະນັກງານ-ລັດຖະກອນ,ທະຫານ, ຕຳຫລວດ ແລະພະນັກງານບຳນານ ເພື່ອແກ້ໄຂຄ່າຄອງຊີບທີ່ສູງຂຶ້ນ ເນື່ອງຈາກເງິນເຟີ້ເພີ່ມຂຶ້ນສູງ. ຕໍ່ກັບບັນຫາດັ່ງກ່າວ, ໃນປີ 2023, ລັດຖະບານ ກໍໄດ້ຄົ້ນຄວ້ານະໂຍບາຍ ເພື່ອແກ້ໄຂຄ່າຄອງຊີບທີ່ສູງຂຶ້ນ ເນື່ອງຈາກເງິນເຟີ້ ແລະ ອັດຕາແລກປ່ຽນສູງຂຶ້ນ ໂດຍໄດ້ເພີ່ມເງິນອຸດໜູນຄ່າຄອງຊີບ 150.000 ກີບ ຕໍ່ຄົນຕໍ່ເດືອນ. ຕໍ່ມາໂດຍອີງໃສ່ນະໂຍບາຍຄ່າແຮງຂັ້ນຕ່ຳຈາກ 1.300.000 ກີບ ມາເປັນ 1.600.000 ກີບ, ລັດຖະບານ ກໍໄດ້ມີການຄົ້ນຄວ້າ ເພີ່ມເງິນອຸດໜູນຜູ້ມີເງິນເດືອນຕໍ່າກວ່າ 1.700.000 ກີບ ໃຫ້ພະນັກງານລັດຖະກອນ, ພະນັກງານບຳນານ, ເສຍອົງຄະ ພ້ອມທັງເພີ່ມເງິນອຸດໜູນຄົວລວມ ໃຫ້ສອງກຳລັງ ເລີ່ມປະຕິບັດ ງວດ 4 ປີ 2023 ເປັນຕົ້ນໄປ ໂດຍບໍ່ໄດ້ຄິດໄລ່ຫັກພັນທະອາກອນເງິນເດືອນ ໃນສ່ວນທີ່ອຸດໜູນເພີ່ມ. ສຳລັບປີ 2024 ຈະໄດ້ມີການປະເມີນຜົນການຈັດຕັ້ງປະຕິບັດເງິນອຸດໜູນທີ່ໄດ້ຈັດຕັ້ງປະຕິບັດ ເພື່ອຄົ້ນຄວາເພີ່ມເງິນອຸດໜູນຫລືເພີ່ມດັດສະນີເງິນເດືອນຕື່ມອີກຕາມຄວາມອາດສາມາດຕົວຈິງຂອງງົບປະມານ.

ພ້ອມນີ້, ທ່ານ ສັນຕິພາບ ພົມວິຫານ ຍັງໄດ້ໃຫ້ຄຳຊີ້ແຈງ ກ່ຽວກັບການເກັບລາຍຮັບຈາກການແກ້ໄຂຜົນກວດສອບ-ກວດກາ ຕາມທີ່ໄດ້ກຳນົດໃນມະຕິກອງປະຊຸມສະພາແຫ່ງຊາດ ເພື່ອເອົາເຂົ້າແຜນງົບປະມານ ແລະ ດັດແກ້ແຜນງົບປະມານ ເຊິ່ງບັນຫາດັ່ງກ່າວ, ລັດຖະບານໄດ້ສຳເລັດຜົນການກວດສອບຕາມມະຕິສະບັບເລກທີ 76/ສພຊ ຢູ່ 9 ແຂວງສາມາດແກ້ໄຂ,ເລັ່ງທວງ ແລະສະສາງໄດ້ 694,31 ຕື້ກີບ ແລະ 1,29 ລ້ານໂດລາສະຫະລັດ ເທົ່າກັບ 24% (ມະຕິສະພາ 3.052,68 ຕື້ກີບ), ເງິນຈຳນວນດັ່ງກ່າວໄດ້ມອບເຂົ້າງົບປະມານແລ້ວໂດຍບໍ່ຈຳເປັນສະເໜີດັດແກ້ແຜນງົບປະມານເນື່ອງຈາກໄດ້ຈົດເຂົ້າເປັນລາຍຮັບງົບປະມານປະຈຳປີ.

ທ່ານລັດຖະມົນຕີ ໃຫ້ຮູ້ຕື່ມວ່າ: ກະຊວງການເງິນໄດ້ປະສານສົມທົບກັບກະຊວງແຜນການ ແລະ ການລົງທຶນ ແລະ ພາກສ່ວນກ່ຽວຂ້ອງໄດ້ຈັດຕັ້ງປະຕິບັດຕາມຂັ້ນຕອນ ແລະກຳນົດເວລາການສ້າງແຜນງົບປະມານແຫ່ງລັດທີ່ໄດ້ກຳນົດໄວ້ໃນມາດຕາ 55 ແລະ 56 ຂອງກົດໝາຍວ່າດ້ວຍງົບປະມານແຫ່ງລັດໂດຍກະຊວງການເງິນ ໄດ້ແຈ້ງເພດານງົບປະມານລົງທຶນຂອງລັດ ໃຫ້ກະຊວງແຜນການ ແລະການລົງທຶນໃນເດືອນເມສາຂອງທຸກປີເພື່ອເປັນພື້ນຖານໃນການຄົ້ນຄວ້າ ແລະຈັດສັນ ບັນຊີໂຄງການລົງທຶນຂອງລັດໃຫ້ສອດຄ່ອງກັບກົດໝາຍວ່າດ້ວຍການລົງທຶນຂອງລັດ ແລະລະບຽບການທີ່ກ່ຽວຂ້ອງ.

แชร์