8 ເດືອນ ມີຄົນລັກໃຊ້ໄຟຟ້າເສຍຫາຍ ເກືອບ 108 ຕື້ກີບ

           ຕາມຂໍ້ມູນຈາກເພຈ໌ EDL LAOS (31.10.2023) ໃຫ້ຮູ້ວ່າ: ນັບແຕ່ເດືອນ 01 – 08/2023 ໄດ້ປາກົດການພົບເຫັນລູກຄ້າ ທີ່ລັກໃຊ້ໄຟ ແລະ ດັດແປງໝໍ້ນັບໄຟທັງ 3 ພາກ ໃນທົ່ວປະເທດທັງໝົດ ຈໍານວນ 172 ລູກຄ້າ, ຊໍາລະເງິນຄ່າພະລັງງານຄືນຫຼັງ ແລະ ຄ່າປັບໄໝສໍາເລັດແລ້ວ 107 ລູກຄ້າ, ຍັງເຫຼືອ 65 ລູກຄ້າ, ລວມຄິດໄລ່ພະລັງງານຄືນຫຼັງ ທັງໝົດ 32.667.476 Kwh, ຄິດໄລ່ຄ່າປັບໄໝພະລັງງານ ທັງໝົດ 22.734.870 Kwh, ຄ່າປັບໄໝໝໍ້ນັບໄຟ ແລະ ປັບໄໝອື່ນໆ ລວມ ເປັນຈໍານວນເງິນທັງໝົດ: 107.882.873.471 ກີບ.

ສະເພາະແຕ່ເດືອນ ສິງຫາ 2023; ທົ່ວປະເທດ ມີລູກຄ້າລັກໃຊ້ໄຟ ແລະ ດັດແປງໝໍ້ນັບໄຟໃນ 3 ພາກ ມີຈໍານວນ 23 ລູກຄ້າ, ຊໍາລະເງິນຄ່າພະລັງງານຄືນຫຼັງ ແລະ ຄ່າປັບໄໝສໍາເລັດແລ້ວ 11 ລູກຄ້າ, ຍັງເຫຼືອ 12 ລູກຄ້າ, ລວມຄິດໄລ່ພະລັງງານຄືນຫຼັງ ທັງໝົດ 109.137 Kwh, ຄິດໄລ່ຄ່າປັບໄໝພະລັງງານ 102.893 Kwh, ລວມມູນຄ່າປັບໄໝ - ຄ່າປັບ      ໄໝໝໍ້ນັບໄຟ ແລະ ປັບໄໝອື່ນໆ ລວມເປັນເງິນ ຈໍານວນ 510.485.928 ກີບ.

ຜ່ານມາ; ລັດວິສາຫະກິດໄຟຟ້າລາວ (ຟຟລ) ໄດ້ປະຕິບັດ ສິດ ແລະ ພັນທະຂອງຜູ້ຈໍາໜ່າຍ ແລະ ຕໍ່ຜູ້ຊົມໃຊ້ໄຟ ຟ້າໃຫ້ສອດຄ່ອງ ຕາມລະບຽບກົດໝາຍ ແລະ ເພື່ອຄວາມເປັນເອກະພາບໃນການປະຕິບັດມາດຕະການ ຕໍ່ຜູ້ທີ່ລັກກະແສໄຟ ຟ້າ ຫຼື ດັດແປງໝໍ້ນັບໄຟ ເຊິ່ງກໍ່ໃຫ້ເກີດຄວາມເສຍຫາຍ ທາງດ້ານຊັບສິນໃຫ້ແກ່ ຟຟລ ກໍ່ຄືຊັບສິນຂອງລັດ, ເປັນການຫຼຸດ ຜ່ອນຜົນກະທົບ ແລະ ຜົນເສຍຫາຍ ຕໍ່ລັດ ແລະ ເປັນບັນທັດຖານໃນການເກັບກູ້ພະລັງງານຄືນໃຫ້ລັດ ແລະ ເປັນການສະ ກັດກັ້ນ ບໍ່ໃຫ້ມີການກະທໍາຜິດ ຫຼື ລັກກະແສໄຟຟ້າແຜ່ຫຼາຍ, ຟຟລ ຈໍາເປັນ ຕ້ອງໄດ້ມີມາດຕະການເຂັ້ມງວດ ແລະ ເປັນຫຼັກ ການລວມ ເພື່ອເປັນບ່ອນອີງໃນການປະຕິບັດໃຫ້ເປັນເອກະພາບໃນຂອບເຂດທົ່ວປະເທດ ແລະເປັນບ່ອນອີງໃນການດໍາເນີນ ຄະດີ ຕໍ່ຜູ້ລັກກະແສໄຟຟ້າ.

ຕໍ່ກໍລະນີ ການລັກໃຊ້ໄຟ ແລະ ດັດແປງໝໍ້ນັບໄຟ; ເປັນການຜິດ ຕໍ່ກົດໝາຍ ວ່າດ້ວຍໄຟຟ້າລາວ (ສະບັບປັບປຸງ) 2017 ໃນມາດຕາ 95 ຂໍ້ຫ້າມສໍາລັບປະຊາຊົນ; ຫ້າມປະຊາຊົນ ມີພຶດຕິກໍາ ຊຶ່ງໃນຂໍ້ 2: ບຸກລຸກສະຖານທີ່, ລັກ, ທໍາລາຍອຸ ປະກອນ ແລະ ສິ່ງປະກອບສ້າງດ້ານໄຟຟ້າ;​ ໃນຂໍ້ກໍານົດລັດວິສາຫະກິດໄຟຟ້າລາວ ສະບັບເລກທີ 2162/ຟຟລ.ຝລຈ, ລົງວັນທີ 23 ມິຖຸນາ 2021 ວ່າດ້ວຍການປະຕິບັດມາດຕະການ ຕໍ່ຜູ້ທີ່ລັກກະແສໄຟຟ້າ ແລະ ດັດແປງໝໍ້ນັບໄຟ ໃນມາດຕາ 9 ມາດຕະການປັບໄໝ ຕໍ່ຜູ້ລັກກະແສໄຟຟ້າ: ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ໄດ້ລະເມີດຂໍ້ກໍານົດສະບັບນີ້ ຊຶ່ງໄດ້ກໍ່ຄວາມເສຍຫາຍໃຫ້ແກ່ ລັດວິສາຫະກິດໄຟຟ້າລາວ ຈະຖືກປັບໄໝ ແລະ ຈະໄດ້ຮັບຜິດຊອບ ຕໍ່ຄວາມເສຍຫາຍ ທີ່ຕົນເອງໄດ້ກໍ່ຂຶ້ນ ຕາມລະກໍລະນີ.

ການຄິດໄລ່ຄ່າປັບໄໝ ແມ່ນອີງຕາມການຄິດໄລ່ການຊົມໃຊ້ພະລັງງານ ຕົວຈິງຕາມຂໍ້ 5.1, ຄູນໃຫ້ 3 ເທົ່າຂອງຫົວໜ່ວຍລາຄາກະແສໄຟຟ້າສູງສຸດຕໍ່ kWh ຂອງລາຄາແຕ່ລະປະເພດຜູ້ຊົມໃຊ້ໄຟຟ້າ ທີ່ລັກກະແສໄຟຟ້າ ໂດຍແຍກອອກເປັນ 2 ກໍລະນີ ໃນການຄິດໄລ່ຄ່າປັບໄໝຄື: ກໍລະນີບໍ່ຮູ້ຈັກໄລຍະເວລາ ໃຫ້ຄິດໄລ່ພະລັງງານປັບໄໝ 6 ເດືອນ, ກໍລະນີຮູ້ຈັກໄລຍະເວລາແມ່ນຄິດໄລ່ເອົາເວລາຕົວຈິງ ຖ້າໄລຍະເວລາຕົວຈິງ ຫາກລັກກະແສໄຟຟ້າບໍ່ຮອດ 6 ເດືອນ ໃຫ້ຄິດໄລ່ພະລັງງານປັບໄໝເອົາ 6 ເດືອນ ເປັນຂັ້ນຕໍ່າສຸດ. ສໍາລັບ ຕໍ່ຜູ້ທີ່ດັດແປງໝໍ້ນັບໄຟ ຈະຖືກປັບໄໝ 3 ເທົ່າ ຂອງລາຄາບໍລິການຕິດຕັ້ງໝໍ້ນັບໄຟ ຕາມຂະໜາດໝໍ້ນັບໄຟຂອງຜູ້ຊົມໃຊ້ຕົວຈິງໃນລາຄາປັດຈຸບັນ.

ຕໍ່ປາກົດການ ທີ່ພົບເຫັນຄົນລັກໃຊ້ໄຟ ແລະ ດັດແປງໝໍ້ນັບໄຟທົ່ວປະເທດ ໃນ 8 ເດືອນ/2023 ຜ່ານມາ ມີທັງໝົດ ຈໍານວນ 172 ລູກຄ້າ; ທາງລັດວິສາຫະກິດໄຟຟ້າລາວ, ເຈົ້າໜ້າທີ່ຕໍາຫຼວດ ແລະ ພາກສ່ວນດັ່ງກ່າວ ໄດ້ດໍາເນີນຄະດີ ແລະ ປະ ຕິບັດລະບຽບ ຕໍ່ພວກກ່ຽວ ຕາມກົດໝາຍ ເປັນທີ່ຮຽບຮ້ອຍແລ້ວ; ດັ່ງນັ້ນ, ຈຶ່ງຂໍຮຽກຮ້ອງ ມາຍັງອົງການປົກຄອງທ້ອງຖິ່ນ, ທະຫານ, ຕໍາຫຼວດ, ກອງຫຼອນ-ປກສ ແລະ ທຸກພາກສ່ວນ ລວມທັງພົນລະເມືອງດີ ຈົ່ງພ້ອມກັນເຂົ້າຮ່ວມ ຕ້ານ ແລະ ສະກັດ ກັ້ນບັນຫາດັ່ງກ່າວ ໃຫ້ຫຼຸດໜ້ອຍຖອຍລົງ; ເມື່ອທ່ານໃດຫາກພົບເຫັນຄົນລັກໃຊ້ໄຟຟ້າ ແລະ ດັດແປງໝໍ້ນັບໄຟ ກະລຸນາແຈ້ງ ໄປຍັງເບີສາຍດ່ວນໄຟຟ້າລາວ 1199 ຕະຫຼອດ 24 ຊົ່ວໂມງ ຫຼື ຫ້ອງການບ້ານ, ປກສ ກຸ່ມບ້ານ ຫຼື ເຈົ້າໜ້າທີ່ ທີ່ຢູ່ໃກ້ທ່ານ “ຮັກຊາດ ຊ່ວຍກັນປົກປັກຮັກສາໄຟຟ້າ ທີ່ເປັນສົມບັດຂອງຊາດ”.

แชร์