ສະຫວັນ-ຈຳປາສັກ ແຂ່ງຂັນກີລາມວຍມິດຕະພາບ

ການແຂ່ງຂັນຊົກມວຍມິດຕະພາບລະຫວ່າງສະຫະພັນມວຍ ແຂວງສະຫວັນນະເຂດ ແລະແຂວງຈຳປາສັກ ໄດ້ຈັດຂຶ້ນໃນຄໍ່າຄືນຂອງວັນທີ 29 ມີນາ ຜ່ານມາທີ່ສະໜາມກີລາມວຍຫຼັກ 4 ແຂວງສະຫວັນນະເຂດ ໃນລາຍການ ມວຍມັນເມືອງສະຫວັນ. ໂດຍ ການຮ່ວມກັນຈັດຂອງທ່ານ ຫົງ ຄຳ ໂພທິສານ ຮອງປະທານສະ ຫະພັນມວຍສະຫວັນນະເຂດ ແລະ ທ່ານ ຈີຣະ ຊະນະວົງໄຊ ລູກຫຼານ ບ້ານທ່າຊະໂນໃຫຍ່ ນະຄອນໄກ ສອນພົມວິຫານ.

ໃນການແຂ່ງຂັນຊົກມວຍຄັ້ງນີ້ ໄດ້ມີການແຂ່ງຂັນກັນລະຫວ່າງ ນັກມວຍຈາກແຂວງສະຫວັນນະ ເຂດ ແລະແຂວງຈຳປາສັກ ມີທັງໝົດ 8 ຄູ່, ຊຶ່ງຄູ່ເປີດລາຍການ ມວຍປະເພດຍິງ, ໃນຮຸ່ນ 51 ກິໂລ: ແກ້ວຄູນເຮືອນຂວັນໃຈເຊໂນ(ສະຫວັນນະເຂດ) ພົບກັບລັດສະໝີ ຄູອ໋ອດ ເມືອງໂພນທອງ (ຈຳປາສັກ) ສຳລັບຄູ່ນີ້ກໍ່ໄດ້ສ້າງບັນຍາ ກາດໃຫ້ກອງເຊຍໄດ້ລະທຶກ ແລະ ລຸ້ນກັບການຊົກ ຊຶ່ງຕ່າງຝ່າຍຕ່າງ ກໍ່ງັດໄມ້ຕາຍອອກມາ, ເມື່ອຊົກ ກັນຄົບຫ້າຍົກນັກມວຍຈາກສະ ຫວັນນະເຂດ ກໍ່ໄດ້ເອົາຊະນະຄະແນນຄູ່ຕໍ່ສູ້ໄປໄດ້. ສຳລັບຄູ່ທີສອງ ພົບກັນໃນຮຸ່ນ 52 ກິໂລ: ເພັດຈະ ເລີນສິດຄູອິນ (ສະຫວັນນະເຂດ) ເອົາຊະນະນ໋ອກແລັມໂບ້ຈິ໋ວຄູອ໋ອດ ເມືອງໂພນທອງ (ຈຳປາສັກ) ໃນຍົກ 2, ແຕ່ມາຄູ່ທີສາມໃນຮຸ່ນ 54 ກິໂລ: ຊຸບເປີ້ແຈ໊ກ ສິດຄູອິ (ສະ ຫວັນນະເຂດ) ຖືກສັ່ງຟ້າສິດພຽນ ນິຍົມ (ຈຳປາສັກ) ນ໋ອກໃນຍົກສອງ, ຍັງບໍ່ພໍຄູ່ທີສີ່ໃນຮຸ່ນ 57 ກິ ໂລ: ຊະນະເສິກກຽດ ດາວທອງ (ສະຫວັນນະເຂດ) ຖືກອັດຕະໄຊ ລໍໄພມະນີ (ຈຳປາສັກ) ນ໋ອກໃນຍົກສອງເຊັ່ນດຽວກັນ.ຄູ່ທີຫ້າໃນ ຮຸ່ນ 51 ກິໂລ: ມົນດຳ ສິດຄູຕອງ (ສະຫວັນນະເຂດ) ເອົາຊະນະຄະ ແນນແລັມໂບ້ເລັກ ຄູອ໋ອດ ເມືອງ ໂພນທອງ (ຈຳປາສັກ), ມາເຖິງຄູ່ຮອງຄູ່ເອກໃນຮຸ່ນ 51 ກິໂລ: ເຈົ້າເວຫາ ສິດຄູຕອງ (ສະຫວັນນະ ເຂດ) ຖືກແດນຈຳປາ ຄູອ໋ອດ ເມືອງໂພນທອງ (ຈຳປາສັກ) ໃຊ້ ສອກເຂົ້າທີ່ໜ້າລົງນອນກັບພື້ນໃນ ຍົກທີໜຶ່ງ.

ສ່ວນຄູ່ເອກຂອງລາຍການເປັນການພົບກັນໃນຮຸ່ນ 54 ກິໂລ ລະ ຫວ່າງລູກນ້ຳທິບຂວັນໃຈເຊໂນ (ສະຫວັນນະເຂດ) ພົບກັບເພັດໂພນ ທອງ ຄູອ໋ອດ ເມືອງໂພນທອງ (ຈຳປາສັກ) ສຳລັບຄູ່ນີ້ເປັນຄູ່ສົມນ້ຳ ສົມເນື້ອ (ພາສາມວຍເພິ່ນວ່າ) ເປັນມວຍຄົບເຄື່ອງ,ຍົກໜຶ່ງຜ່ານ ໄປ, ພໍກາງຍົກສອງລູກນ້ຳທິບຂວັນໃຈເຊໂນກໍ່ໃຊ້ເຂົ່າທີ່ແຫຼມຄົມແທງເຂົ້າໄປທີ່ທ້ອງຄູ່ຕໍ່ສູ້ຫຼາຍເທື່ອຕໍ່ຫຼາຍທີເຮັດໃຫ້ເພັດໂພນທອງ ຄູອ໋ອດ ທົນຕ້ານທານບໍ່ໄຫວເລີຍລົງໄປນອນໃຫ້ກຳມະການນັບແຕ່ກໍ່ບໍ່ລຸກເຮັດໃຫ້ລູກນ້ຳທິບຂວັນໃຈເຊໂນເອົາຊະນະໄປໄດ້ຢ່າງສວຍງາມ.ຈາກນັ້ນມວຍຄູ່ພິເສດປະກອບລາຍການເປັນການພົບກັນລະ ຫວ່າງເງາະປ່າລູກໂນນຍາງ (ສະຫວັນນະເຂດ) ພົບກັບເພັດພັນສາຄູອ໋ອດ (ຈຳປາສັກ) ຄູ່ນີ້ໃນຍົກທີໜຶ່ງຊົກກັນປະມານສອງນາທີເງາະປ່າກໍ່ສາມາດນ໋ອກຄູ່ຕໍ່ສູ້ຢ່າງສິ້ນເຊີງ.

ໃນການຈັດການແຂ່ງຂັນຊົກມວຍຄັ້ງນີ້ກໍ່ເພື່ອເປັນການສະເຫຼີມສະຫຼອງ ແລະຊົມເຊີຍວັນສ້າງພັກປະຊາຊົນປະຕິວັດລາວຄົບຮອບ64 ປີ, ຄືໃນວັນທີ 22 ມີນາທີ່ ຜ່ານມາ, ອີກຢ່າງກໍ່ເພື່ອເປັນການຮັດແໜ້ນຄວາມສາມັກຄີ ແລະເປັນ ການສົ່ງເສີມກີລາມວຍລາວໃຫ້ ກ້າວໄປເວທີສາກົນເທື່ອລະກ້າວ.

ນສພ ເສດກິດ-ສັງຄົມ

แชร์