ເປີດນຳໃຊ້ສະຖານີລົດໄຟວຽງຈັນ ຄຳສະຫວາດ ຢ່າງເປັນທາງການ

ພິທີເປີດນຳໃຊ້ສະຖານີລົດໄຟວຽງຈັນ (ຄຳສະຫວາດ) ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ຈັດຂຶ້ນ ໃນວັນທີ 30 ຕຸລາ 2023 ຢູ່ສະຖານີດັ່ງກ່າວ ບ້ານຄຳສະຫວາດ ເມືອງໄຊເສດຖາ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ເສດຖາ ທະວີສິນ ນາຍົກລັດຖະມົນຕີແຫ່ງ ຣາຊະອານາຈັກໄທ ພ້ອມດ້ວຍບັນດາລັດຖະມົນຕີ ຮອງລັດຖະມົນຕີ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ກ່າວວ່າ: ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ແມ່ນໂຄງການໜຶ່ງທີ່ໄດ້ຮັບການສະໜັບສະໜູນ ດ້ານການເງິນ ຈາກລັດຖະບານແຫ່ງຣາຊະອານາຈັກໄທ ໂດຍຜ່ານອົງການຮ່ວມມືພັດທະນາທາງດ້ານເສດຖະກິດກັບປະເທດເພື່ອນບ້ານ ຫຼື NEDA ໃນຮູບແບບເງິນກູ້ຢືມດອກເບ້ຍຕໍ່າ ແລະຊ່ວຍເຫຼືອລ້າ ເປັນຈຳນວນເງິນທັງໝົດ 1.650 ລ້ານບາດ (ສະກຸນເງິນໄທ) ລວມທັງຕອນທີ 1 ແລະ ຕອນທີ 2 ເປັນເງິນກູ້ຢືມ 70% ແລະ ຊ່ວຍເຫຼືອລ້າ 30%.

ໂຄງການດັ່ງກ່າວ ປະກອບມີ: ວຽກກໍ່ສ້າງທາງລົດໄຟແຕ່ສະຖານີ ທ່ານາແລ້ງ ຫາ ສະຖານີວຽງຈັນ (ຄຳສະຫວາດ) ຍາວ 7,5 ກິໂລແມັດ ວຽກກໍ່ສ້າງສະຖານີວຽງຈັນ (ຄຳສະຫວາດ) ກໍ່ສ້າງເຮືອນພັກພະນັກງານ ກໍ່ສ້າງທາງເຂົ້າເຂດສະຖານີ ແລະ ເຂດເຮືອນພັກພະນັກງານ ກໍ່ສ້າງທາງຕັດຜ່ານ ທາງດິນແດງ (ສໍາລັບໃຫ້ປະຊາຊົນນຳໃຊ້ ແລະ ສ້ອມແປງທາງລົດໄຟ) ແລະ ວຽກອື່ນໆຈຳນວນໜຶ່ງໂດຍແມ່ນກົມທາງລົດໄຟ ກະຊວງ ຍທຂ ເປັນເຈົ້າຂອງໂຄງການ ແລະໄດ້ວ່າຈ້າງບໍລິສັດ ເອຊຽນ ອິນຈີເນຍຣິງ ຄອນຊາວເຕັນ (AEC) ແລະ ບໍລິສັດ LGE ຈາກລາວ ແລະ ໄທ ເປັນທີ່ປຶກສາຄວບຄຸມການກໍ່ສ້າງ ແລະວ່າຈ້າງບໍລິສັດເສີມສະຫງວນ ກໍ່ສ້າງ ຈຳກັດ ຈາກໄທເປັນຜູ້ຮັບເໝົາກໍ່ສ້າງໂຄງການນີ້ໄດ້ເລີ່ມລົງມືກໍ່ສ້າງຕັ້ງແຕ່ເດືອນ ຕຸລາ 2010 ແລະສໍາເລັດລົງໃນເດືອນ ມີຖຸນາ 2022 ມີໄລຍະເວລາກໍ່ສ້າງ 33 ເດືອນ ມີມູນຄ່າໂຄງການປະມານ 958 ລ້ານບາດ.
ທີ່ມາ: ວຽງຈັນໃໝ່

แชร์