ເສດຖະກິດລາວ ຍັງສືບຕໍ່ຂະຫຍາຍຕົວ ແລະສາມາດປະຄັບປະຄອງບໍ່ໃຫ້ຕົກສູ່ວິກິດ

ເຖິງວ່າເສດຖະກິດ ຂອງ ສປປ ລາວ ຈະຕົກຢູ່ໃນສະພາບຝຶດເຄືອງ ແລະການອ່ອນຄ່າຂອງເງິນກີບທີ່ເຮັດໃຫ້ລວມຍອດຜະລິດຈະພັນພາຍໃນ (GDP) ຕໍ່ຫົວຄົນມີທ່າອ່ຽງຫລຸດລົງກໍຕາມແຕ່ລັດຖະບານກໍຍັງສາມາດຂັບເຂື່ອນໃຫ້ເສດຖະກິດສືບຕໍ່ຂະຫຍາຍຕົວຕໍ່ເນື່ອງ ແລະສາມາດປະຄັບປະຄອງເສດຖະກິດຂອງຊາດບໍ່ໃຫ້ຕົກເຂົ້າສູ່ວິກິດທີ່ໜັກໜ່ວງ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ກ່າວລາຍງານກ່ຽວກັບສະພາບການເຄື່ອນໄຫວວຽກງານທີ່ພົ້ນເດັ່ນກາງສະໄໝ 5 ປີ ຄັ້ງທີ IX (2021-2025), ທິດທາງແຜນການທ້າຍສະໄໝ ຮອດປີ 2025 ແລະການຈັດຕັ້ງປະຕິບັດແຜນການປະຈໍາປີ 2023 ແລະທິດທາງແຜນການປະຈໍາປີ 2024 ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 31 ຕຸລາ 2023 ວ່າ:

ໃນໄລຍະ 2 ປີເຄິ່ງຜ່ານມາ ເຖິງແມ່ນວ່າສະພາບສາກົນ, ພາກພື້ນ ແລະພາຍໃນປະເທດຈະມີຄວາມຫຍຸ້ງຍາກ ແລະສິ່ງທ້າທ້າຍຫຼາຍປະການແບບບໍ່ເຄີຍມີໃນຮອບຫຼາຍປີຜ່ານມາກໍຕາມ, ແຕ່ພາຍໃຕ້ການນໍາພາ-ຊີ້ນໍາຢ່າງໃກ້ຊິດຂອງຄະນະບໍລິຫານງານສູນກາງພັກ, ກົມການເມືອງ ແລະຄະນະເລຂາທິການສູນກາງພັກ ແລະ ການຮ່ວມມືຊ່ວຍເຫຼືອຂອງບັນດາປະເທດເພື່ອນມິດ, ບວກໃສ່ກັບຄວາມພະຍາຍາມຢ່າງຕັ້ງໜ້າຂອງລັດຖະບານໃນການແກ້ບັນຫາລວມຂອງຊາດຈຶ່ງເຮັດໃຫ້ເສດຖະກິດຂອງປະເທດເຮົາສືບຕໍ່ຂະຫຍາຍຕົວ ແລະ ສາມາດປະຄັບປະຄອງ ເສດຖະກິດຂອງຊາດບໍ່ໃຫ້ຕົກເຂົ້າສູ່ວິກິດທີ່ໜັກໜ່ວງ, ຮັກສາໄດ້ສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ.

ຜົນສໍາເລັດທີ່ພົ້ນເດັ່ນ ໃນເຄິ່ງສະໄໝຜ່ານມາ ເສດຖະກິດປະເທດໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງສະເລ່ຍ ໃນລະດັບ 4,03% (ແຜນການ 5 ປີ ສະເລ່ຍໃນລະດັບ 4% ຂຶ້ນໄປ), ສໍາລັບປີ 2023 ຄາດວ່າຈະບັນລຸໄດ້ 4,2% (ແຜນການປີ 2023 ແມ່ນ 4,5%). ຍ້ອນການອ່ອນຄ່າຂອງເງິນກີບ, ລວມຍອດຜະລິດຕະພັນພາຍໃນ (GDP) ຕໍ່ຫົວຄົນມີທ່າອ່ຽງຫຼຸດລົງ. ແຕ່ກໍຄາດວ່າໃນປີ 2023 ນີ້, ຈະໄດ້ 1.824 ໂດລາ (ແຜນການປີ: 1.625 ໂດລາ ແລະ ແຜນການ 5 ປີ: 2.880 ໂດລາ); ລວມຍອດລາຍໄດ້ແຫ່ງຊາດ (GNI) ຕໍ່ຫົວຄົນ ປີ 2023 ຄາດວ່າຈະບັນລຸໄດ້ 1.712 ໂດລາ (ແຜນການປີ: 1.534 ໂດລາ ແລະ ແຜນການ 5 ປີ: 2.280 ໂດລາ).

ນອກຈາກນີ້, ໃນເຄິ່ງສະໄໝຜ່ານມາ, ລັດຖະບານ ໄດ້ສຸມໃສ່ປັບປຸງຂົງເຂດລາຍຮັບ-ລາຍຈ່າຍ ດ້ວຍການປັບປຸງກົງຈັກການຈັດຕັ້ງ, ການປັບປຸງໂຄງສ້າງລາຍຮັບ-ລາຍຈ່າຍ, ຕິດພັນກັບການສືບຕໍ່ຫັນເປັນທັນສະໄໝໃນວຽກງານການເງິນ-ງົບປະມານ ດ້ວຍການປະກອບເຄື່ອງມື, ພັດທະນາລະບົບຄຸ້ມຄອງ ແລະ ບໍລິການເປັນທັນສະໄໝ ອັນໄດ້ເຮັດວຽກງາານໃນຂົງເຂດນີ້ມີການຫັນປ່ຽນທີ່ຕັ້ງໜ້າກວ່າເກົ່າ ແລະ ເຮັດໃຫ້ລັດຖະບານສາມາດເກັບລາຍຮັບໄດ້ເກີນແຜນໃນ 2 ປີຕິດຕໍ່ກັນ ແລະ ຄາດວ່າປີ 2023 ກໍຈະລື່ນແຜນການ. ຂະນະດຽວກັນ, ກໍໄດ້ເອົາໃຈໃສ່ແກ້ໄຂໜີ້ສິນການລົງທຶນຂອງລັດ ແລະ ໜີ້ສິນຕ່າງປະເທດ ດ້ວຍມາດຕະການ ແລະວິທີການຕ່າງໆຢ່າງເປັນລະບົບ ແລະສາມາດປະຕິບັດໄດ້ຕາມແຜນທີ່ກໍານົດໄວ້ ແລະມີທ່າອ່ຽງດີຂຶ້ນເປັນກ້າວໆສາມາດຮັບປະກັນການຊໍາລະໜີ້ສິນທີ່ຄົບກໍານົດໄດ້ທັງໝົດ ຈຶ່ງເຮັດໃຫ້ປະເທດພວກເຮົາບໍ່ຕົກເປັນປະເທດທີ່ບໍ່ສາມາດຊໍາລະໜີ້ສິນໄດ້.

ທ່ານນາຍົກລັດຖະມົນຕີ ລາຍງານຕື່ມວ່າ: ໃນສະພາບທີ່ອັດຕາເງິນເຟີ້ສູງ ແລະອັດຕາແລກປ່ຽນມີຄວາມຜັນຜວນ, ເພື່ອແກ້ໄຂບັນຫາດັ່ງກ່າວລັດຖະບານໄດ້ຊີ້ນໍາໃຫ້ທະນາຄານແຫ່ງ ສປປ ລາວ ຈັດຕັ້ງປະຕິບັດມາດຕະການ ທີ່ຢຶດໝັ້ນປະຕິບັດນະໂຍບາຍເງິນຕາແບບຮັດກຸມ ໂດຍນໍາໃຊ້ທຸກເຄື່ອງມືທີ່ທະນາຄານແຫ່ງ ສປປ ລາວ ມີ ຢ່າງປະສົມປະສານໃນການຄວບຄຸມປະລິມານເງິນ M2 ໃຫ້ຢູ່ໃນລະດັບເໝາະສົມ ແລະ ສາມາດຊຸກຍູ້ການຂະຫຍາຍຕົວຂອງເສດຖະກິດ; ດໍາເນີນນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດ ໃນທິດທາງທີ່ມີຄວາມຍືດຍຸ່ນຫຼາຍກວ່າເກົ່າ ແລະດັດສົມຄວາມຕ້ອງການເງິນຕາຕ່າງປະເທດ. ພ້ອມນີ້, ກໍປັບປຸງສະພາບແວດລ້ອມ ໃນການດຳເນີນທຸລະກິດ ແລະການລົງທຶນ, ປະຕິຮູບລັດວິສາຫະກິດ, ຄຸ້ມຄອງລາຄາສິນຄ້າ ແລະອື່ນໆ.

แชร์