ເມືອງໂຂງ ທຳລາຍອາວຸດລ່າເນື້ອ ແລະວັດຖຸຕ້ອງຫ້າມ

ເມືອງໂຂງ ແຂວງຈຳປາສັກ ໄດ້ທຳລາຍອາວຸດລ່າເນື້ອ ແລະວັດຖຸຕ້ອງຫ້າມຈຳນວນຫລາຍລາຍການ ເປັນຕົ້ນ ຈັກສະຕິນ, ປືນແກັບ ແລະອຸປະກອນຊ໊ອດປາ ໃນວັນທີ 27 ຕຸລາ 2023 ທີ່ຫ້ອງການກະສິກຳ-ປ່າໄມ້ເມືອງໂຂງ ໂດຍການເຂົ້າຮ່ວມຂອງທ່ານນາງ ຄຳພູ ລິດທິສັກ ເຈົ້າເມືອງໆໂຂງ, ມີຫົວໜ້າກອງບັນຊາການ ປກສ-ປກຊ ເມືອງ, ປະທານສານປະຊາຊົນເຂດ II ແລະອຳນາດການປົກຄອງບ້ານຫາດຊາຍຄູນເຂົ້າຮ່ວມ.

ທ່ານ ທອງໃສ ສິມຈະເລີນ ຫົວໜ້າຫ້ອງການກະສິກຳ-ປ່າໄມ້ເມືອງ ໄດ້ລາຍງານວ່າ: ຕະຫລອດໄລຍະຜ່ານມາລັດຖະບານແຫ່ງ ສປປ ລາວ ເຫັນໄດ້ຄວາມສຳຄັນ ຂອງວຽກງານຄຸ້ມຄອງປົກປັກຮັກສາຊັບພະຍາກອນປ່າໄມ້ ແລະ ສັດນໍ້າ-ສັດປ່າ. ສະນັ້ນ, ເມືອງໂຂງໄດ້ຜັນຂະຫຍາຍເນື້ອໃນກົດໝາຍວ່າດ້ວຍສັດນໍ້າ ແລະສັດປ່າ ສະບັບເລກທີ 07/ສພຊ, ກົດໝາຍວ່າດ້ວຍການປະມົງສະບັບເລກທີ 03/ສພຊ, ຄຳສັ່ງນາຍົກລັດຖະມົນຕີສະບັບເລກທີ 15/ນຍ ແລະ ສະບັນເລກທີ 11/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງປົກປັກຮັກສາ, ພັດທະນາ ແລະ ນຳໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນການບຸກລຸກທຳລາຍໄປ່ໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ ໃຫ້ໄດ້ຮັບຜົນດີ ແລະ ມີປະສິດທິຜົນສູງ. ຈາກນັ້ນ ບັນດາກຸ່ມບ້ານ ແລະ ເຈົ້າໜ້າທີ່ກ່ຽວຂ້ອງກໍໄດ້ໂຮມອາວຸດລ່າເນື້ອ, ວັດຖຸຕ້ອງຫ້າມອື່ນໆ ເຊິ່ງສອງກອງບັນຊາການປ້ອງກັນຊາດ-ປ້ອງກັນຄວາມສະຫງົບເມືອງ ໄດ້ປະສານສົມທົບກັນເພື່ອເຄື່ອນໄຫວເກັບກູ້, ທ້ອນໂຮມອາວຸດອາວຸດລ່າເນື້ອ ແລະ ວັດຖຸຕ້ອງຫ້າມທຸກຊະນິດ ທີ່ເປັນອັນຕະລາຍ ແລະ ເປັນປະກົດການຫຍໍ້ທໍ້ໃນສັງຄົມ ກ່ຽວກັບການນຳໃຊ້ອາວຸດປືນ, ອາວຸດລ່າເນື້ອຢ່າງຊະຊາຍ ໂດຍບໍ່ຄຳນຶງເຖິງກົດໝາຍ ແລະ ລະບຽບການ ເຊິ່ງໄດ້ສ້າງຄວາມເສຍໃຫ້ໃຫ້ແກ່ຊີວິດ ແລະຊັບສິນຂອງພົນລະເມືອງເປັນຕົ້ນການນຳໃຊ້ອາວຸດປືນເຂົ້າໃນການນາບຂູ່, ປຸ້ນຈີ້ຊີງຊັບ, ຄາດຕະກຳ ເຊິ່ງປະກົດການທັງໝົດມັນໄດ້ສົ່ງຜົນກະທົບ ແລະຜົນເສຍຫາຍຢ່າງໃຫຍ່ຫລວງຕໍ່ສັງຄົມ.

ຜ່ານການທ້ອນໂຮມວັດຖຸຕ້ອງຫ້າມອື່ນໆ ໃນໄລຍະ 5 ປີຜ່ານມາສາມາດກັກຢືດ ແລະຮີບໂຮມເຄື່ອງຈັກຕັດໄມ້ເປັນປະເພດຈັກສະຕິນ ໄດ້ຈຳນວນ 150 ເຄື່ອງ, ກັກຢືດອາວຸດລ່າເນື້ອປະເພດປືນແກັບໄດ້ຈຳນວນ 296 ກະບອກ, ກັກຢືດເຄື່ອງຊ໊ອດປາໄດ້ຈຳນວນ 48 ເຄື່ອງ ໄດ້ນຳມາທຳລາຍໃນພິທີຄັ້ງນີ້.

ຂ່າວ-ພາບ: ພຸດທະສິນ ວົງວິໄລທອງ

แชร์