ເປີດຕະຫຼາດນັດແຮງງານ ສົ່ງເສີມການຈັດຫາງານພາຍໃນ ແລະຕ່າງປະເທດ

ງານຕະຫຼາດນັດແຮງງານ ເພື່ອສົ່ງເສີມການຈັດຫາງານພາຍໃນ ແລະໄປເຮັດວຽກຢູ່ຕ່າງປະເທດແບບຖືກຕ້ອງຕາມກົດຫມາຍ (Job Fair) 2023 ໄດ້ຈັດຂຶ້ນໃນລະຫວ່າງວັນທີ 27-29 ຕຸລາ 2023 ນີ້ທີ່ສູນວາງສະແດງສິນຄ້າລາວ-ໄອເຕັກ ນະຄອນຫຼວງວຽງຈັນ ໂດຍກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ ປະຈຳ ສປປ ລາວ, ສູນກາງສະຫະພັນກຳມະບານລາວ ແລະສະພາການຄ້າ ແລະອຸດສາຫະກຳແຫ່ງຊາດລາວ.

ທ່ານນາງ ໃບຄໍາ ຂັນຕິຍະ ລັດຖະມົນຕີ ກະຊວງ ຮສສ ກ່າວວ່າ: ງານຕະຫຼາດນັດແຮງງານແມ່ນໜຶ່ງໃນກິດຈະກຳສົ່ງເສີມການມີວຽກເຮັດງານທຳ ແລະການເຂົ້າສູ່ຕຳແໜ່ງງານທັງພາຍໃນ ແລະຕ່າງປະເທດ, ຈຸດປະສົງຕົ້ນຕໍແມ່ນເພື່ອເຮັດໃຫ້ຜູ້ຕ້ອງການແຮງງານ ແລະ ຜູ້ຢາກເຮັດວຽກມາພົບກັນ, ຂຶ້ນທະບຽນ, ສຳພາດ, ຕົກລົງ ແລະບັນຈຸເຂົ້າສູ່ຕຳແໜ່ງງານເພື່ອເກີດການຈ້າງງານ; 2. ເພື່ອເປັນການໂຄສະນາປະຊາສຳພັນຕຳແໜ່ງງານທີ່ກຳລັງວ່າງ ແລະຕຳແໜ່ງງານທີ່ຈະເກີດຂຶ້ນໃໝ່ ໃນປະຈຸບັນ ແລະ ອະນາຄົດຂອງບັນດາຫົວໜ່ວຍແຮງງານ; 3. ເພື່ອສ້າງຄວາມເຂົ້າໃຈໃຫ້ແກ່ກຳລັງແຮງງານ ແລະຜູ້ໃຊ້ແຮງງານຕື່ມທາງດ້ານນິຕິກຳວ່າດ້ວຍແຮງງານ ແລະປະກັນສັງຄົມ, ຮັບຮູ້ຂໍ້ມູນຂ່າວສານຕະຫຼາດແຮງງານເພື່ອເປັນຂໍ້ມູນໃຫ້ແກ່ສັງຄົມໃນການຮຽນວິຊາຊີບ ແລະຮຽນລະດັບຕ່າງໆ ຕາມຄວາມຕ້ອງການຂອງຕະຫຼາດແຮງງານ, ທັງເປັນການປັບປຸງກົນໄກການປະສານງານລະຫວ່າງພາກລັດ, ພາກທຸລະກິດ, ສັງຄົມ ໃຫ້ມີຄວາມກົມກຽວ, ຮ່ວມມື ແລະຊຸກຍູ້ສົ່ງເສີມຊຶ່ງກັນ ແລະກັນດ້ານແຮງງານ ແລະສະຫວັດດີການສັງຄົມ. ປັດໄຈສຳຄັນທີ່ສຸດແມ່ນການແກ້ໄຂບັນຫາການຂາດແຄນແຮງງານພາຍໃນໃຫ້ເປັນຮູບປະທຳຫຼາຍຂຶ້ນຕື່ມອີກກ້າວໜຶ່ງ.

ເພື່ອສ້າງເງື່ອນໄຂ ແລະອຳນວຍຄວາມສະດວກໃຫ້ກຳລັງແຮງງານສາມາດເຂົ້າຕຳແໜ່ງງານດ້ວຍຫຼາຍຮູບແບບຂະແໜງແຮງງານ ແລະສະຫວັດດີການສັງຄົມ ໄດ້ຂະຫຍາຍຈຸດບໍລິການຈັດຫາງານໃນຂອບເຂດທົ່ວປະທດແລ້ວຈຳນວນ 51 ຈຸດ, ມີ 48 ບໍລິສັດຈັດຫາງານພາຍໃນເພື່ອດຳເນີນການບໍລິການຈັດຫາງານພາຍໃນ ແລະ ຕ່າງປະເທດ, ນອກນັ້ນພວກເຮົາຍັງເປີດກວ້າງໃຫ້ບັນດາຫົວໜ່ວຍແຮງງານ, ໂຄງການລົງທຶນປະກາດຮັບສະໝັກແຮງງານດ້ວຍຕົນເອງ, ບັນດາກຳລັງແຮງງານຍັງສາມາດເຂົ້າຊອກວຽກຜ່ານລະບົບຂໍ້ມູນຂ່າວສານຈາກແຮງງານ LMIS, (www.lmi.gov.la). ຕາມການສະເໜີຄວາມຕ້ອງການຂອງຜູ້ໃຊ້ແຮງງານ.

ທ່ານນາງ ໃບຄໍາ ຂັນຕິຍະ ກ່າວຕື່ມວ່າ: ງານຄັ້ງນີ້ໄດ້ຮັບການສະໜັບສະໜູນຈາກອົງການເພື່ອການພັດທະນາ ແລະຮ່ວມມືສະວີດເຊີແລນ SDC, ອົງການ IOM ແລະ ສູນວາງສະແດງສິນຄ້າລາວ-ໄອເຕັກ, ຊຶ່ງຈະໄດ້ດຳເນີນໄປເປັນເວລາ 3 ວັນ, ມີບັນດາບູດເຂົ້າຮ່ວມຈຳນວນ 97 ບູດ, ມີບໍລິສັດຫ້າງຮ້ານ 75 ພາກສ່ວນ. ດັ່ງນັ້ນ ຂໍເຊື້ອເຊີນຜູ້ປະກອບການ, ກຳລັງແຮງງານ ແລະມວນຊົນ ຈົ່ງໄດ້ມາຮ່ວມເພື່ອສະໝັກເຂົ້າສູ່ຕຳແໜ່ງງານໃຫ້ຫຼາຍຂຶ້ນ, ແກ້ໄຂການຂາດແຄນແຮງງານພາຍໃນ.

แชร์